Зул сарын баярыг тохиолдуулан энэ сарын 6-ны үдээс хойш байлдааны”гал зогсоох дэглэм” нэвтрүүлсэн гэж Оросын Батлан хамгаалах яам мэдэгдсэн ч Оросын талаас буудах явдал зогсоогүй учир олон украинчууд Христийн мэндэлсний баярын өмнөх оройг тэсрэх бөмбөгний хоргодох байранд өнгөрөөхөөс өөр аргагүйд хүрсэн байна.

Луганск мужийн дарга Сергей Гайдай “Оросууд 14 удаа их буугаар буудаж, манай нэг суурин руу гурван удаа дайрсан” гэж өөрийн “Telegram” сувагтаа бичжээ.”Чөлөөлөгдсөн тосгоны хүмүүс хоргодох байрандсууж байна. Ортодокс оросууд ийм л байдаг. Алуурчид бидэнд Зул сарын баярын мэнд хүргэж байгаа нь энэ” гэж бичсэн байна. Үүнийг Оросын тал зөвхөн хариу буудсан гэж тайлбарласан бол Украины эрх баригчид “гал зогсоох дэглэм” нэг минут ч үргэлжилсэнгүй гэж мэдэгдэв. Украины Ерөнхийлөгчийн Тамгын газрын орлогч дарга Кирило Тимошенко Москвагийн цагаар үд дундын үед Херсон хотыг буудсан тухай “ Тэд цохилтоо гал унтраах ангид өгсөн” гэж мэдэгдсэн. Хожим нь Херсон мужийн дарга Ярослав Янушевич уг буудлагын улмаас нэг аврагч амиа алдаж, өөр дөрвөн хүн шархадсан болохыг баталжээ. Мөн Краматорск хотод 14 хувийн байшин буудлагын улмаас сүйдсэн ч азаар хүний амь эрсдээгүй байна. Мөн 6-ны үдээс хойш Донецк мужийн Курахово хот мөн хүчтэй буудлагад өртжээ. Хотын дарга Роман Падун орон сууцны өндөр барилгуудад гэмтэл учруулж, орон нутгийн эмнэлгийн халдварт өвчний тасагт буудлагад өртөж, эмнэлгийн ажилчдаас нэг хүн шархадсан гэж мэдэгдэв.

ОХУ-ын Ерөнхийлөгч Владимир Путин үнэн алдартны шашинтнуудын улаан өндөгний баяртай холбогдуулан Украины бүх фронтод 36 цагийн хугацаанд дайны галыг зогсоох тушаалыг Батлан хамгаалахын сайд Сергей Шойгуд өгчээ. Түүнчлэн тэрээр энэ шийдвэрийг нь дагаж галаа түр зогсоохыг Украин улсад уриалсан байна.

Үнэн алдартны шашинтай иргэд дайны бүсэд олноор амьдардаг учир тэдгээр иргэдэд баяраа тэмдэглэж, сүмд мөргөл үйлдэх боломжийг олгохыг Путин Украинд уриалжээ.

Харин Украины Ерөнхийлөгч Володимир Зеленский ОХУ-ыг шашны баярыг ашиглан Украиныг мэхлэхийг санаархаж байна гэж буруутгав. ЗеленскийОросуудад хандан орос хэлээр хийсэн мэдэгдэлдээ Путиныг улаан өндөгний баярыг ашиглаж Донбасс дахь Украины армийн давшилтийг хэсэг хугацаанд зогсоож, өөрсдийнхөө техник хэрэгсэл, сум, цэргийн хүчээ татан авахыгзорьж байгааг буруутгажээ. Түүнчлэн тэрээр “Танай цэргүүд явж, эсвэл бид тэднийг хөөж гаргах үед дайны гал зогсоно” гэсэн байна.

Путины гаргасан гал түр зогсоох шийдвэр өнөөдрийн 12:00 цагаас энэ сарын 7-ны 00:00 цаг хүртэл үргэлжлэх аж. Харин Оросыг энэ шийдвэрээ хэрэгжүүлж галаа түр зогсооно гэдэгт Украины иргэд эргэлзэж байгаа юм.

Г.АМАРСАНАА

Беларусь руу 2022 оны 12 дугаар сарын 29-нд харвасан С-300 пуужинг тус улсын агаарын довтолгооноос хамгаалах хүчин Брест мужийн Горбаха тосгоны ойролцоо харван унагасан байна.

Беларусийн эрх баригчид тус пуужинг Украины нутаг дэвсгэрээс харвасан гэж үзэж тус улсад суугаа Украины Элчин сайд И.Кизимыг Гадаад хэргийн яаман дээрээ дуудаж эсэргүүцлээ илэрхийллээ.

Беларусийн эрх баригчид Украины талд “энэхүү пуужинг хөөргөсөн бүх нөхцөл байдлыг сайтар шалгах”-ыг шаардаж, буруутай этгээдүүдэд хариуцлага тооцох, цаашид үүнтэй төстэй хэрэг явдал давтагдахгүй байх талаар цогц арга хэмжээ авахыг анхаарууллаа.

Беларусийн Ерөнхийлөгч А.Лукашенко пуужингийн халдлагын талаар нэн даруй мэдэгдсэн бөгөөд тус улсын Мөрдөн байцаах газар, цэргийн мэргэжилтнүүдээс бүрдсэн ажлын хэсэг хэргийн шалтгааныг олж тогтоохоор ажиллаж байна.

Умард Солонгос хоёр он солигдох үеэр буюу 12 дугаар сарын 31, нэгдүгээр сарын 01-ний өдөр тус тус ойрын зайн баллистик пуужин харвалаа. Умард Солонгосын удирдагч Ким Жон Ун тактикийн пуужинг олноор үйлдвэрлэх, шинээр тив алгасах пуужин зохион бүтээх, тагнуулын хиймэл дагуул хөөргөх, хатуу түлштэй пуужин бий болгох талаар Ажилчдын намын төв хорооны наймдугаар хуралдааны үеэр мэдэгдэв. Энэхүү зургаа хоног үргэлжилсэн хуралдаан нь тус улсын 2023 онд хэрэгжүүлэх зорилтуудыг тодорхойлсон юм.

2022 оны 12 дугаар сарын 31-ний өдөр Умард Солонгос нийслэл Пёньяны өмнөд хэсгээс доод тал нь ойрын зайн тусгалтай гурван баллистик пуужин харвалаа. Японы БХЯ-ны мэдэгдсэнээр эдгээр пуужин ойролцоогоор 100 км-ийн өндөрт нисэж, 350 км аялж Японы эдийн засгийн тусгай бүсээс гадна Солонгосын хойгийн зүүн эрэгт далайн усанд унасан байна.

Мөн Өмнөд Солонгосын цэргийнхний мэдэгдсэнээр шинэ оны эхний өдөр буюу ням гарагийн өглөө Умард Солонгосын төвийн дүүргээс ойрын тусгалтай баллистик пуужин харвасан нь 400 км орчим нисэж, Япон болон Солонгосын хойгийн дунд далайд унасан байна. Үүний өмнөх долоо хоногт буюу 12 дугаар сарын 18 орчимд мөн ойрын тусгалт хоёр баллистик пуужин харваад байсан юм.

Умард Солонгосын Мэдээллийн төв агентлаг “Өнгөрсөн бямба болон ням гарагт тус улс супер том хэмжээтэй, олон пуужин харвагчийн туршилт хийсэн. Удирдагч Ким Жон Ун хэлэхдээ “Энэхүү пуужин харвагч нь Өмнөд Солонгосын газар нутгийн бүхий л хэсэгт цохилт өгөх боломжтой бөгөөд цөмийн хошуу тээвэрлэх чадвартай” гэж мэдэгдсэн байна.

Ажиглагчдын үзэж байгаагаар тус улс 2022 онд түүхэнд байгаагүй олон пуужин харвасан нь техникийн хувьд гоц дэвшилт харуулахгүй байгаа ч маш олон байрлалаас, цаг хугацаа, нөхцөл байдлын өөрчлөлттэй үед олон тоогоор харваж байгаа нь Умард Солонгос ямар ч үед, олон чиглэлээс, төрөл бүрийн цохилт өгөх чадвартай болсон гэдгийг батлан харуулж байна. Түүнчлэн өнгөрсөн долоо хоногийн эхээр Умард Солонгос 5 нисгэгчгүй нисэх хэрэгслээр Өмнөд Солонгосын хилийг зөрчсөн бөгөөд тэдгээрийн нэг нь Сөүлийн хойд дүүрэгт нэвтэрсэн байна.

Ажилчдын намын хуралд удирдагч Ким Жон Ун Өмнөд Солонгост чиглэсэн тактикийн цөмийн зэвсэглэлийг олноор үйлдвэрлэх замаар “цөмийн зэвсэглэлийг их хэмжээгээр нэмэгдүүлэх”, АНУ-д цохилт өгөх зорилготой “цөмийн шуурхай хариу цохилт өгөх” шинэ төрлийн тив алгасах баллистик пуужин бүтээх, Умардын анхны цэргийн тагнуулын хиймэл дагуулыг ойрын үед хөөргөх чиглэлд нэг дахин илүү хүчин чармайлт гаргахыг цаг үе, гадаад орчин шаардаж байгааг мэдэгдэж ирэх жилийн зорилт болгон дэвшүүлсэн байна.

Тус улсад өнгөрсөн жил батлагдсан шинэ хуулиар маш олон тохиолдолд цөмийн зэвсгийг урьдчилсан цохилт өгөхөд ашиглах, цөмийн зэвсгийг эхэлж хэрэглэхээр заналхийлэх зэргийг хуульчлан зөвшөөрсөн нь аюултай нөхцөл байдлыг бий болгож байгаа бөгөөд өнгөрсөн долоо хоногийн намын хурлын үеэр Ким Жон Ун үүнийг давтан мэдэгдсэн байна.

Өмнөд Солонгосын БХЯ-наас түүний мэдэгдлийг Солонгосын хойгийн энх тайван, тогтвортой байдалд заналхийллээ гэж мэдэгдээд цөмийн зэвсэглэлээр хөөцөлдөхөө зогсоохыг мэдэгдэж, цөмийн зэвсэг хэрэглэх гэсэн тохиолдолд Ким Жон Уны дэглэм төгсгөл болох бөгөөд аливаа ийм оролдлогод Өмнөдийн зүгээс Умардын цөм, пуужингийн аюулд хариу өгөх зориулалттай “гурван тулгуур”-т батлан хамгаалах системээ[1] улам бэхжүүлэхээ мэдэгдсэн. Өмнөд Солонгосын Ерөнхийлөгч Юон Сүх Иол цэргийн удирдлагадаа цаашид Умард Солонгосын аливаа өдөөн хатгалгад шийдвэртэй хариу өгч байх үүрэг өгсөн байна.

Цөмийн шинжээч А.Панда “Умард Солонгос нэгэнт томоохон хэмжээний пуужингийн хүчнийг бүрэн ашиглагч болон хувирсан байна. Туршилт гэдэг үг одоо Умард Солонгосын хувьд тохирохгүй. Энэ жил тэдний харвасан бүхий л пуужингууд нь цэргийн сургуулилалтынх нь нэг хэсэг байлаа. Тэд цөмийн дайнд бэлтгэж байна гэсэн үг” гэжээ.

“Торгоны зам” Аялал жуулчлал, соёлын өвийн олон улсын их сургууль нь Бүгд Найрамдах Узбекистан Улсын анхны төрийн өмчит англи хэлний сургалтын хөтөлбөртэй сургууль бөгөөд 2022-2023 оны хичээлийн жилд магистрын хөтөлбөрт суралцуулах тэтгэлэг зарласан байна.

Суралцуулах мэргэжлийн чиглэл:

-Аялал жуулчлалын логистик

-Аялал жуулчлал /үйл ажиллагааны чиглэлээр/

-Музей судлал, түүх, соёлын дурсгалт зүйлийг хамгаалах, засварлах

-Соёлын өвийн менежмент

-Бүтээлч үйлдвэрлэл

-Археологи

Бүрдүүлэх баримт бичиг:

-Гадаад паспорт/Иргэний үнэмлэхийн хуулбар;

-Их, дээд сургууль төгссөн диплом, дүнгийн жагсаалтын хамт;

-3х4 хэмжээтэй цээж зураг;

-CV буюу товч намтар; /Холбоо барих утас, цахим шуудангийн хаягийг заавал оруулах/

-Гадаад хэлний шалгалтын оноо

/IELTS 6.0, CEFR-B2, TOEFL IBM-72 ба түүнээс дээш/;

-Эсээ /Төгссөний дараах төлөвлөгөө, Шанхайн хамтын ажиллагааны байгууллагын гишүүн орнуудын аялал жуулчлалын салбарын хөгжилд хувь нэмэр оруулах нь сэвдийн хүрээнд A4 хуудсын 2 нүүрээс хэтрэхгүй байх;

Тэтгэлэгтэй холбоотой дэлгэрэнгүй мэдээллийг https://www.meds.gov.mn/post/125075 холбоосоор авна уу.

БНСУ-д Монголчууд шинэ жилийн баяраар нэгнийхээ аминд хүрсэн хэрэг гарсан байна. Тодруулбал, Кёнги мужийн Почон хотод 50 гаруй настай Монгол иргэн монгол иргэнийхээ аминд хүрсэн хэргээр баривчлагдан шалгагдаж байгаа аж. Кёнги аймгийн Почон цагдаагийн хэлтсийн мэдээлснээр, энэ сарын 2-ны өдрийн 04.15 цагт буюу өнөөдөр үүрээр 50 гаруй настай А нь Б-н байрлах байранд орж ирэн унтаж байхад нь хутгалан амийг нь хөнөөжээ.

Өчигдөр Хятадын төв бүсийн Зэньжоу хотод өтгөн манантай, үзэгдэх орчин муу байсны улмаас авто замын томоохон осол гарсныг тус улсын төв телевизийн суваг мэдээлжээ.

Зэньшин Хуанхэ гүүрэн дээр гарсан ослын үеэр 200 гаруй автомашин ар араасаа мөргөлдөж, нэг хүн амиа алдсан байна.

Орон нутгийн онцгой байдлын алба 11 гал сөнөөгч машин, 66 аврагчийг ослын газарт илгээж, автомашинд хавчуулагдсан зорчигчдыг аврах ажиллагаа явуулжээ.

Лхагва гарагийн өглөө тухайн бүс нутгийн олон хэсэгт үзэгдэх орчин 500 метрээр хязгаарлагдаж байсан ба осол гарах үед 200 метр хүрснийг цаг уурын алба мэдээлсэн байна.

Ослын улмаас Шар мөрний хоёр эргийг холбодог гүүрний хөдөлгөөнийг хаажээ.