Category: гадаад

Хятадын Фүжянь мужийн Шэмянь хотын дунд шатны Ардын шүүхээс авлига авсан хэрэгт сэжиглэнШанхай хотын Ерөнхий прокурор асан Жан Бэньцайд эрүүгийн хэрэг үүсгэжээ. Ерөнхий прокурор асанд холбогдох хяналт шалгалтын байгууллагууд намын дотоод мөрдөн шалгалтыг өнгөрсөн оны зургаадугаар сард эхлүүлсэн аж. Улмааресдүгээр сард түүнийг Хятадын Коммунист намаас хөөж, төрийн албанаас халсан бөгөөд 11-р сард баривчилжээ. Жан Бэньцай нь албан тушаалын байдлаа урвуулан ашиглаж, хувьдаа хөрөнгөжсөн, бизнестэй холбоотой янз бүрийн асуудлыг шийдвэрлэх, тодорхой төслүүдийг хэрэгжүүлэхэд дэмжлэг үзүүлж гуравдагч этгээдээс их хэмжээний авлига авч байсан нь мөрдөн шалгалтын явцад тогтоогдсон байна. Өмнө нь 2018 оны 10 дугаар сарын сүүлчээр Шанхай хотын Ерөнхий прокурор асан Чэнь Сюй хээл хахууль, авлига авсан хэргээр бүх насаараа хоригдох ял авсан байна.

Г.АМАРСАНАА

ОХУ-аас Украинд хийж буй дайны нэг жилийн ойг тохиолдуулан АНУ-ын Ерөнхийлөгч Жо Байден эв санааны нэгдлийн илэрхийлэл болгон Польшид айлчлах гэж байна. Тэрбээр Польшийн Ерөнхийлөгч Анжей Дудатай уулзаж, Украин болон НАТО-г дэмжих хамтын ажиллагааны талаар ярилцах юм. Мөн ОХУ-ын түрэмгийллийн нэг жилийн ойн өмнө үг хэлэх болно гэж Цагаан ордны хэвлэлийн нарийн бичгийн дарга Карин Жан-Пьер мэдэгдэв.

АНУ-ын Үндэсний аюулгүй байдлын зөвлөлийн хэвлэлийн төлөөлөгч Жон Кирби сэтгүүлчдэд хэлэхдээ, “Байден бүтэн жилийн турш Украиныг дэмжих олон улсын хамтын нийгэмлэгийн шийдвэр, эв нэгдлийн ач холбогдлын талаар ярихыг хүсч байна” гэжээ.

Олон улсын зарим судлаачид энэхүү уулзалтанд Украины ерөнхийлөгч оролцох магадлал өндөр байгааг онцолсон байна.

АНУ-ын Батлан хамгаалахын сайд Ллойд Остин Филиппин улсад энэ сарын 2-ны өдөр ажиллаж, Ерөнхийлөгчид бараалхан, Батлан хамгаалахын сайдтай хэлэлцээ хийж, үр дүнтэй тохиролцоонд хүрлээ. Хоёр улсын хооронд 2014 онд байгуулсан “Батлан хамгаалах хамтын ажиллагааны нэмэлт хэлэлцээр”-ийг өргөтгөн, хэрэгжилтийг эрчимжүүлэх талаар Филиппинд одоо байрлаж буй 5 байрлалыг дөрвөөр нэмэгдүүлж, АНУ-ын цэрэг, зэвсэг байрлуулах эрх нээх асуудлыг шийдвэрлэв. Мөн АНУ-ын дэд Ерөнхийлөгч К.Харрис өнгөрсөн 11 дүгээр сард тус улсад айлчилж, Батлан хамгаалах чиглэлд хамтын ажиллагаагаа бэхжүүлэх талаар ярилцаж байсан юм.

АНУ эхний ээлжид 82 сая ам.доллароор тэдгээрт шинэчлэл хийнэ. Улмаар ондоо багтаан хоёр тал хамтран 17 мянган хүний бүрэлдэхүүнтэй цэргийн хамтарсан сургуулийг энэ бүс нутагт хийхээр болоод байна.

АНУ-ын БХЯ-наас мэдэгдэхдээ “Филиппинд илүү олон байрлалд Америкийн цэрэгт эрх нээгдэж байгаа нь хоёр улсын холбоотны харилцаа, чадавхыг сайжруулах, зэвсэгт хүчний шинэчлэлийг эрчимжүүлэх, гаднын халдлагын эсрэг хамтарсан ажиллагааг хүчирхэгжүүлэх ач холбогдолтой. Энэ нь дээрх цэргийн байрлалуудад байнгын цэргийн бааз нээнэ гэсэн үг биш, харин ээлжид суурилсан цэргийн үйл ажиллагаа явуулна” гэжээ. Филиппиний талаас нэмж эрх олгож буй цэргийн байрлалуудыг нэрлэхээс татгалзсан бөгөөд орон нутгийн удирдлагатай тохиролцож жич шийдвэрлэнэ гэж мэдэгдсэн. Одоогоор АНУ-ын 500 орчим цэргийн албан хаагч Филиппин улсад байрлаж байна.

Энэ удаагийн тохиролцоо нь АНУ Энэтхэг-Номхон далайн стратегиа хэрэгжүүлэх хүрээнд хийж буй алхам бол Филиппин улсын хувьд аюулгүй байдлаа хангах, Хятадын нөлөө, дарамтыг тэнцвэржүүлэх улс төрийн шийдэл болж байна. Харин БНХАУ-ын зүгээс уг асуудалд дургүйцлээ хүчтэй илэрхийлээд байна.

Зарим шинжээчдийн үзэж байгаагаар АНУ-ын цэргийн хүчинд Филиппинд эрх нээгдэж байгаа нь дөрвөн үндсэн стратегийн мессежийг илгээж байна. Үүнд: 1. Энэтхэг-Номхон далай дахь АНУ-ын нөлөөг өргөтгөсөн; 2. БНХАУ-д анхааруулга өгсөн; 3. АНУ, Филиппин урт хугацааны цэргийн хамтын ажиллагааны түүхтэйг харуулсан; 4. Тухайн улсын ард иргэдийн их гүрний талаарх эерэг, сөрөг үзэл бодол цэргийн хамтын ажиллагаанд ихээхэн нөлөөлсөн.[1]

БНХАУ-ын Гадаад хэргийн яам уг үйл явдлын дараа АНУ-ыг хүйтэн дайны үеийн сэтгэлгээгээр бүс нутагт цэргийн хүчийг нэмэгдүүлж, эх тайван, тогтвортой байдалд аюул учрууллаа хэмээн буруушааж, бүс нутгийн орнуудыг ийм ятгалгад автахгүй байхад анхааралтай байх хэрэгтэй гэж мэдэгдсэн байна.

ЭХ СУРВАЛЖ: ISS.GOV.MN

Өнгөрсөн 12 дугаар сарын дунд үеэс хойш Перуд, үргэлжилж байгаа эсэргүүцлийн жагсаалын үеэр хэдэн арван хүн амиа алдаж мянга гаруй хүн гэмтэж шархаджээ. Жагсагчид ерөнхийлөгчөө огцорч, конгрессын болон ерөнхийлөгчийн ээлжит бус сонгууль явуулахыг шаардаж байгаа юм.

“Financial Times” сонинд, гол уурхайнуудад олборлолт зогссоны улмаас дэлхийн зэсийн нийлүүлэлтийн 10 орчим хувийг хангадаг Перугийн зэсийн үйлдвэрүүд хаагдахад хүрчээ.

Дэлхийн зэх зээлд сүүлийн гурван сарын хугацаанд зэсийн үнэ тонн тутамд 9 мянган ам.доллар луу дөхөж, 20 гаруй хувиар өссөн нь Хятадад “COVID”-ийн хязгаарлалтыг гэнэт цуцалснаас үүдэлтэй эрэлт нэмэгдсэнтэй холбоотой аж. Иймд Перугийн нийлүүлэлттэй холбоотой асуудал зэсийн үнэ улам өсөхөд шинэ түлхэц өгч магадгүй гэж шинжээчид үзэж байна. Ялангуяа Перугийн өмнөд хэсгийн уурхайнуудад тэслэх бодис, ган зэрэг материалууд дуусаж байгаагаас гадна, шинэ ажиллах хүч авахад асуудал гарч байна гэж тус улсын уул уурхайн ассоциацийн ерөнхийлөгч асан, “Southern Peru Copper Corporation” корпорацын санхүү хариуцсан захирал Рауль Жейкоб “Перу улсын зэсийн экспорт хоёр, гурван сарын өмнөхөөс илт багассан” гэж хэлсэн байна.

Г.АМАРСАНАА

Даваа гаригт Турк, Сирид хүчтэй газар хөдөлсний улмаас амиа алдсан хүний тоо 20 мянгыг даваад байгаа ч гамшгаас учирсан хохирлын хэмжээ тодорхойгүй хэвээр байгааг НҮБ-аас анхааруулсаар байна.

Гамшгийн бүсэд эрэн хайх, аврах ажиллагаа үргэлжилсээр байгаа боловч газар хөдөлснөөс хойш 100 орчим цагийн хугацаа өнгөрөөд байгаа тул хүмүүсийг аврах найдлага улам бүр багассаар байна.

Түүнчлэн тэсгим хүйтэн байгаа нь хорогдох байр, ундны ус, хоол хүнсгүй байгаа олон мянган хүний амь насанд аюул учруулж байна. Туркийн Ерөнхийлөгч газар хөдлөлтийг “зууны хамгийн том гамшиг” гэж тодорхойлжээ.

Дэлхийн олон улс орон, олон улсын байгууллагууд тусламж дэмжлэгээ илгээсээр байна. Пүрэв гарагт Дэлхийн банк Туркт суурь дэд бүтцийг сэргээн босгох, байгалийн гамшигт нэрвэгдсэн хүмүүст 1.78 тэрбум ам.долларын тусламж үзүүлэхээ мэдэгдлээ.

Гэсэн хэдий ч аврах албаны 100 мянга гаруй алба хаагчийн хүчин чармайлтад тээврийн хэрэгсэл хомс, зам эвдэрсэн зэрэг логистикийн олон саад бэрхшээл тулгарч байна.

НҮБ-ын тэргүүн Антонио Гутерриш байгалийн гамшигт үзэгдлээс үүдэн учирсан хохирлын хэмжээ, тэр дундаа иргэний дайны хөлд нэрвэгдсэн Сирид тодорхойгүй хэвээр байгааг анхааруулсаар байна.

Пүрэв гарагт НҮБ-ын хүмүүнлэгийн анхны тусламж Сирийн баруун хойд нутгийн Идлиб мужийн Баб аль-Хава хилийн боомтоор нэвтэрсэн байна. Энэхүү боомт нь Сирийн Засгийн газрын хүчний хяналтад байгаа бүс нутгаар дамжин өнгөрөхгүйгээр НҮБ-ын тусламжийг тус бүс нутагт хүргэх цорын ганц зам юм.

А.Гутерриш цаашид илүү их тусламжийг үзүүлэхээ амлаад, олон боомтоор тусламж нэвтрүүлэхийг зөвшөөрөхийг НҮБ-ын Аюулгүйн Зөвлөлд уриалжээ.

Газар хөдлөлтийн дараа Алеппо хот руу дүрвэсэн, дөрвөн хүүхдийн ээж Мунира Мухаммед “Reuters” агентлагт мэдээлэхдээ, “Өнгөрсөн шөнө бид даараад унтаж чадаагүй, халаагуур болон өөр бусад тусламж бидэнд нэн шаардлагатай байна” гэсэн байна.

“Сирийн баруун хойд нутагт ирсэн НҮБ-ын цорын ганц цуваанд нурангид дарагдсан хүмүүсийг аврахад шаардлагатай төхөөрөмжүүд байхгүй байсан” гэж “Цагаан дуулгатнууд” сайн дурын байгууллага мэдээлжээ.

Холбогдох албаны төлөөлөгчдийн мэдээллээр, Туркт 17 134 хүн, Сирид 3162 хүн амиа алдсан байна. Туркт амиа алдсан хүний тоо тус улсын баруун хойд нутагт 1999 онд болсон газар хөдлөлтийн үеэр амь эрсэдсэн хүмүүсийн тоог /17 мянга/ давжээ. Турк, Сирид байгалийн гамшгийн улмаас орон гэргүй болсон олон арван мянган хүн түр хоргодох байранд дөрөв дэх шөнөө өнгөрүүлж байна.

Туркийн зүүн өмнөд нутгийн оршин суугч Ресат Гозлугийн ярьснаар, газар хөдөлснөөс хойш гурав хоног өнгөрөхөд аврагчид ирээгүй байсан бөгөөд олон хүн нурангид дарагдаж, осгож амиа алджээ. Тэрбээр одоо гэр бүлийнхээ хамтаар нэгэн спорт цогцолборт хорогдож байгаа аж. Цаашид байдал энэ хэвээрээ үргэлжилбэл хүнд өвчин хүрч болзошгүй байна гэж тэрбээр “BBC” телевизийн сурвалжлагчид ярьжээ.

АНУ-ын Сангийн яам байгалийн гамшгийн уршгийг арилгах ажиллагаатай холбоотойгоор Сири улсад тавьсан хоригийг түр зогсоосон байна.

“Сирид байгалийн гамшгийн уршгийг арилгахтай холбогдуулан хориг арга хэмжээний заалтаар хориглосон бүх ажиллагааг 2023 оны наймдугаар сарын 8-ныг хүртэл зөвшөөрнө” гэж тус яам мэдэгджээ.

Тодруулбал, хүчтэй газар хөдөлсний улмаас учирсан хохирол, хор уршгийг арилгах үйл ажиллагааг дэмжих зорилгоор хандив мөнгө цуглуулах, шилжүүлэхэд тавьсан хязгаарлалтыг цуцалсан боловч газрын тостой холбоотой гүйлгээ, хориг арга хэмжээ авсан хүмүүс болон Сирийн Засгийн газартай холбоотой хориг хэвээр байх аж.

Хоёрдугаар сарын 6-ны даваа гаргийн үүрээр Турк-Сирийн хилийн бүсэд хүчтэй газар хөдөлсний дараа Сирид авсан хориг арга хэмжээг нэн даруй түр зогсоохыг өмнө нь “Хүний эрхийг хамгаалах олон улсын нийгэмлэг” уриалсан юм.

Барууны орнууд зөвхөн хууль бус зэвсэгт бүлэглэлийн хяналтад байгаа бүс нутагт тусламж илгээхэд бэлэн байгаа бөгөөд байгалийн гамшгийн уршгийг арилгахад Сирийн Засгийн газарт тусламж дэмжлэг үзүүлэхгүй байна гэж тус улсын Ерөнхийлөгчийн зөвлөх Бусейна Шаабан хэлсэн байна.