Category: гадаад

Гурван сар үргэлжилж буй Бахмутын тулалдаанд оросууд түүний эргэн тойрны ихэнх тосгодыг эзэлж хотыг гурван талаас нь бүсэлж, Украины цэргүүдийг ухрах байдалд оруулаад байсан бол өчигдөр Украины Дээд Командлал “Бахмутаас ухрахгүй, харин ч хүч нэмэгдүүлж, хотыг эцсээ хүртэл хамгаалах” шийдвэр гаргаснаар тулалдаан дахин хэдэн сар ч үргэлжилж магадгүй нөхцөл байдал үүсээд байна.

Оросын цэргүүд украинчуудыг ухраах, хотоос шахан гаргах зорилгоор Бахмутын баруун чиглэлийн ар тал хангалтын замыг удаан хугацаанд нээлттэй байлгасан. Өнгөрсөн долоо хоногт Украины цэргүүд ухрах бэлтгэлээ хангах үүднээс Бахмутын стратегийн хоёр чухал гүүрийг дэлбэлж байсан юм. Гэвч өчигдөр Украины Дээд командлал, Ерөнхийлөгч Владимир Зеленский тус хотыг үргэлжлүүлэн хамгаалах шийдвэр гаргалаа.

Дээд командлалын хуралдаан дээр В.Зеленский Бахмутын тулалдааныг Украины дайны хамгийн том үр дүнтэй тулалдаан гэдгийг онцлоод Зэвсэгт хүчний ерөнхий командлагч Валерий Залужный, Хуурай замын цэргийн командлагч Александр Сирский нараас хотоос гарах, ухрах эсэхийг шууд асуусан бол тэд “Ухрахгүй, хүчээ нэмэгдүүлэх” санал дэвшүүлж, Ерөнхийлөгч тэдний саналыг баталснаар Бахмутын тулалдаан удаан хугацаанд үргэлжлэх, цаашлаад Украины дайны хувь заяаг шийдвэрлэх талбар болохоор байна.

Оросууд Бахмутын чиглэлд хоногт дунджаар их буу, пуужинт артиллерийн 100 гаруй цохилт хийн, дайснаа залхаах, сэтгэл санаа, байлдах чадварыг нь унагах тактикаар тэднийг Северодонецк, Лисичанск, Соледарт хийсэн шиг ухралтыг Бахмутад хийнэ гэж тооцолсон нь талаар болж байна.

Цаашид Украины тал барууны орнуудад голдуу бэлтгэгдсэн цэргүүдээр Бахмут хотыг хүч нэмэгдүүлэн хамгаалж, улмаар сөрөг довтолгоо хийх төлөвтэй бол оросууд хотыг бүсэлж, их буугаар их хэмжээний цохилт өгөх зэргээр тулалдаан улам ширүүн үргэлжлэх төлөвтэй байна.

ЭХ СУРВАЛЖ: iss.gov.mn

Энэтхэгийн нийслэл Дели хотод болсон “Их 20”-ын чуулганы үеэр ОХУ-ын гадаад хэргийн сайд Сергей Лавров эвгүй байдалд оржээ. Тэрээр эрчим хүчний асуудлаарх салбар хуралдаанд оролцохдоо Украины дайн Оросын эрчим хүчний стратегид хэрхэн нөлөөлж буй талаар сэтгүүлчийн асуултад хариулсан байна. Лавровыг “Бид зогсоохыг хичээж байгаа, манай эсрэг өдөөсөн дайн…” гэжярьж эхлэхэд танхимд цугларсан хүмүүс нир хийтэл инээлджээ.Тэрээр инээдээр тасалдсан яриагаа үргэлжлүүлэхийг хичээж “Мэдээж Украины ард түмэнд ч нөлөөлж байгаа…” гэж хэлэхэд сонсогчид дахин нир хийтэл инээлдэж танхимаас“Come on!” гэж хашгирч байжээ.

Г.Амарсанаа

Сүүлийн гурван жилийн хугацаанд цар тахлын эдийн засагт үзүүлсэн нөлөө, хөдөлмөрийн насны хүн амын тоо хурдацтай буурч байгаагаас БНХАУ-ын хөдөлмөр эрхэлж буй хүн амын тоо 41 саяар буурчээ. Тус улсад 2019 онд хөдөлмөр эрхлэгчдийн тоо 774.7 сая орчим байсан бол өнгөрсөн онд 733.5 саяд хүрсэн байна. Мөн тэтгэвэрт гарах иргэдийн тоо хурдацтай нэмэгдэж байгааг Статистикийн хорооноос мэдээлжээ. Ийнхүү Бээжин тэтгэвэр тогтоолгох насны доод хязгаарыг өсгөх шаардлагатай тулгарч магадгүй болжээ.

Цар тахлын үеэр БНХАУ-д залуучуудын ажилгүйдлийн түвшин өссөн нь үүнд нөлөөлж буй бас нэгэн гол шалтгаан болсныг Хонконгийн Шинжлэх ухаан, технологийн их сургуулийн профессор Стюарт Гител-Бастен онцолжээ. Мөн 2012 оноос хойш БНХАУ-д 16-59 насны хүн амын тоо тогтвортой буурсаар байгаа юм. Сүүлийн гурван жилд энэ насны бүлэгт хамаарах иргэдийн тоо 38 саяар буурч, 857.6 сая болжээ. БНХАУ-ын тэтгэвэр тогтоолгох насны доод хязгаар сүүлийн 40 жилд өөрчлөгдөөгүй бөгөөд тус улсын хүн амын дундаж наслалт нэмэгдсэн ч эрэгтэйчүүд 60 нас, эмэгтэйчүүд 55 насандаа тэтгэвэрт гардаг хэвээр байгаа юм

Туркэд хоёрдугаар сарын зургаанд болсон газар хөдлөлтийн улмаас гутлын үйлдвэрлэлийн гол бүс болох Антакьяд 400 орчим гутлын үйлдвэр нуржээ. Энэ талаар Туркийн гутал үйлдвэрлэгчдийн холбооны тэргүүн Берке Ичтен Shoe Intelligence-д мэдээлжээ.

Газар хөдлөлтийн улмаас нурсан үйлдвэрүүд нь Туркийн нийт үйлдвэрийн хүчин чадлын 10 хувийг эзлэж байсан бөгөөд энд 10 мянга орчим хүн ажиллаж байсан аж. Туркэд нийтдээ 10 мянга орчим гутлын үйлдвэр үйл ажиллагаа явуулдаг, эдгээр үйлдвэрт 350 мянган хүн ажиллаж, жилд 550 сая хос гутал үйлдвэрлэдэг юм байна.

Эдгээр үйлдвэрүүд Стамбул, Измир, Конья, Антакья, Адана хотуудад үйлдвэрлэлийн бүс үүсгэн үйл ажиллагаа явуулдаг аж. Газиантеп, Адана хотууд ч газар хөдлөлтөд өртсөн ч эдгээр хотуудад байрлах гутлын үйлдвэрүүд байгалийн гамшигт өртөөгүй байна.

Туркийн гутал үйлдвэрлэгчдийн холбооны тэргүүний мэдээлснээр, Антакья бүсэд ажиллаж байсан хүмүүс “туршлагатай гуталчид” байсан гэнэ. Тэднээс хичнээн нь байгалийн гамшгийн улмаас амиа алдсан нь одоогоор тодорхойгүй байгаа, үйлдвэрүүдийг сэргээхийн тулд засгийн газрын дэмжлэгтэйгээр бусад холбоодтой хамтран хандив цуглуулж байгааг тэрбээр онцолжээ.

Украины зэвсэгт хүчинд тулалдаж буй цэргийн нэгдэл болох “Оросын сайн дурын корпус” (РДК)-ын дайчид ОХУ-ын Брянск мужид нэвтэрсэн болохоо зарлав. Энэ нь “RDK Telegram” сувгаар Любечан дахь эмнэлгийн хэсгийн шатан дээр зогсож буй хоёр байлдагчийг харуулсан бичлэг гарч, тэдний ард байгаа тэмдэглэгээгээр нотлогдож байгаа аж. “Оросын сайн дурын корпус” ОХУ-ын улсын хилийг давлаа. Бид энгийн иргэдтэй тулалддаггүй, зэвсэггүй хүмүүсийг алдаггүй, үүнийг санаж яваарай. Одоо Оросын жирийн иргэд боол биш гэдгээ ойлгох цаг болсон. Босцгоо! Тэмцэцгээ!” – гэж байлдагчдын нэг нь хэлжээ. Хоёр дахь нь гартаа “Оросын сайн дурын корпус”-ын тугийг барьсан байв.

Бичлэг дээр гарч байгаа байлдагч нь 38 настай,”Rex” хочтой Денис Никитин бөгөөд тэрээр Москвад төрж, Европт суралцаж, 2017 онд Украин руу гарчээ. Мөннэрээ нууцалсан байлдагч “Важные истории”хэвлэлийн агентлагт өгсөн ярилцлагадаа энэ явдлыг баталсан байна. Тэрээр “Би дөнгөж сая тэндээс ирлээ. Энэ ажиллагаанд манай 45 байлдагч оролцсон. Бид Оросын нутагт нэвтэрч, отолт хийн хоёр цэргийн хуягт машиныг устгасан. Би ямар ч хүүхэд хараагүй. Хариннэг Орос хилчин шархадахыг харсан. Бид ямар ч хүн барьцаалаагүй” гэж тэр хэлсэн байна.

ОХУ-ын ерөнхийлөгч В.Путин Брянск мужид хүүхэд нас барсан “террорист ажиллагаа” болсон гээд багшийн жилийн нээлтээр Пятигорск хотод очих гэж байснаа цуцалсан юм.