Category: гадаад

Казахстаны парламентын сонгуулийг хугацаанаас нь өмнө буюу 2023 онд зохион байгуулах шийдвэрийг тус улсын ерөнхийлөгч Касым-Жомарт Токаев өнгөрсөн оны есдүгээр сард гаргасан юм. Тэгвэл энэ удаагийн парламентын сонгуулийг гуравдугаар сарын 19-ний өдөр зохион байгуулагдахаар болсон байна.

Сонгуулийн урьдчилсан дүнг энэ сарын 21-ний өдөр зарлахаар төлөвлөжээ. Энэ жил Казахстаны сонгуулийн үйл явцыг олон улсын 12 байгууллага, гадаадын нийт 41 орноос 124 ажиглагч хяналт тавьж ажиллана. Гишүүдийн 70 хувь нь намын жагсаалтаар, харин үлдсэн 30 хувь нь нэг мандаттай тойргоос сонгогдоно.

Парламентын гишүүдийн нийт тоог 107 байсныг 98 болгож багасгасан байна. Муж болон томоохон хотуудын иргэдийн төлөөлөгчид мөн холимог системээр буюу 50 хувь нь нэг мандаттай тойргоор, 50 хувь нь намын жагсаалтаар сонгогдох юм. Харин орон нутгийн сонгуулиар иргэд зөвхөн нэг мандаттай тойргоос гарсан нэр дэвшигчдэд саналаа өгөх боломжтой юм байна.

Г.АМАРСАНАА

Нью-Йоркийн хөрөнгийн бирж арилжааны явцад үнэт цаасных нь үнэ огцом унасан “First Republic”, “PacWest Bancorp”, “Regions Financial”, “Zions Bancorporation” гэсэн дөрвөн банкны хувьцааны арилжааг зогсоожээ. “First Republic” банкны хувьцаа 76.76 хувиар, “PacWest Bancorp”-ынх 50.37 хувиар, “Regions Financial”-ынх 9.42 хувиар “Zions Bancorporation” банкных 27.81 хувиар унасан байна.

Активынхаа хэмжээгээр АНУ-д 16 дугаарт бичигддэг “Silicon Valley Bank” гуравдугаар сарын 11-нд дампуурлаа зарласан. Энэхүү зээлийн байгууллагын дампуурал нь 2008 оны хямралаас хойших хамгийн том дампуурал болсон юм. Үүний дараа системийн эрсдэлтэй холбоотойгоор Нью-Йорк муж улсын Зохицуулах байгууллагаас “Signature Bank”-ийг хаах шийдвэр гаргажээ. Америкийн хоёр том банк дампуурсан нь санхүүгийн хямралд орж болзошгүй гэсэн болгоомжлолыг үүсгэсэн гэж “The Wall Street Journal” мэдээлэв.

АНУ-ын Агаарын цэргийн хүчний MQ-9 тагнуул, цохилтын нисгэгчгүй онгоц /дрон/ Румын дахь цэргийн баазаас өчигдөр буюу гуравдугаар сарын 14-нд хөөрч, Хар тэнгис дээгүүр Крымээс баруун өмнө зүгт 100 км зайд, 7 км өндөрт тандалт хийж байх үед нь Оросын Су-27 сөнөөгч онгоцууд түүнд хэт ойртон шүргэсний улмаас унажээ.

Оросын энэхүү үйлдлийг АНУ-ын Ерөнхийлөгч Ж.Байден “аюултай, мэргэжлийн бус, бодлогогүй үйлдэл” хэмээн нэрлэсэн бөгөөд хэрэг явдалтай холбогдуулан АНУ дахь ОХУ-ын Элчин сайд Анатолий Антоновыг тус улсын Төрийн департамент дуудан эсэргүүцлээ илэрхийлсэн байна.

Харин Оросын Батлан хамгаалах яам “АНУ-ын нисгэгчгүй онгоц огцом маневр хийсний улмаас өндрөө алдаж, хяналтгүй нислэг хийж, усны гадаргуутай өөрөө мөргөлдсөн” гэж мэдэгдэж байна.

Эх сурвалж: iss.gov.mn

БНАСАУ Япон тэнгис рүү ойрын зайн тусгалт баллистик пуужин харвасан гэж БНСУ-ын цэргийнхэн мэдээлжээ.

БНСУ-ын Штабуудын дарга нарын хорооны мэдээлснээр, пуужинг пүрэв гаргийн оройн 18:20 цагийн орчимд баруун эргийн Нампо хот орчмын бүсээс тэнгис рүү харвасан байна.

БНАСАУ-ын удирдагч Ким Жөн Уны эмэгтэй дүү Ким Ё Жон, Пёньян АНУ, БНСУ-ын эсрэг “шуурхай, шийдэмгий” арга хэмжээ авахад бэлэн байна гэж мэдэгдсэнээс хоёр хоногийн дараа уг туршилтыг хийжээ.

Энэ долоо хоногийн эхээр АНУ мөн БНСУ-тай хийсэн хамтарсан сургуулилалтынхаа үеэр БНАСАУ-ын пуужин, цөмийн аюул заналын эсрэг сүр хүчээ харуулахын тулд “B-52” бөмбөгдөгч онгоцыг нисгээд байжээ.

АНУ Пёньянаас учрах аюул занал нэмэгдэж байгаатай холбогдуулан сүүлийн үеийн сургуулилалтууддаа цэргийн хүчирхэг техник хэрэгслүүдийг дайчлах болжээ. Гэхдээ пүрэв гаргийн туршилт АНУ болон холбоотнуудад аюул учруулаагүй гэдгийг мэдээлсэн байна.

“Бид баллистик пуужингийн туршилтын талаар мэдээлэлтэй байгаа бөгөөд холбоотон, түншүүдтэйгээ нягт зөвлөлдөж байна. Уг үйлдэл нь АНУ-ын цэргийн бие бүрэлдэхүүн, нутаг дэвсгэр болон холбоотнуудад шууд аюул занал учруулаагүй, харин Пёньяны хууль бус үй олноор хөнөөх зэвсэг болон баллистик пуужингийн хөтөлбөрүүдийн тогтвортой байдлыг алдагдуулах үр дагаврыг тодоор харуулж байна” гэж АНУ-ын Энэтхэг-Номхон далайн командлал мэдэгджээ.

Дэлхийн өмнөд туйлын мөсөн бүрхүүлийн талбай 1979 оноос хойш хамгийн доод хэмжээнд хүрч багасжээ. Сансрын хиймэл дагуулын зургаас харахад “Антарктид тивийн мөсөн бүрхүүл хайлах явц үргэлжилж байгаа бөгөөд хоёрдугаар сарын 25-ны байдлаар мөсөн бүрхүүлийн талбай 1.79 сая хавтгай дөрвөлжин км буюу хамгийн доод хэмжээнд хүрч багассан байна. Энэ нь өмнөх доод хэмжээний үзүүлэлтээс 136 мянган хавтгай дөрвөлжин км-ээр багассан буюу Тасманийн арлаас хоёр дахин их талбайтай тэнцэхүйц хэмжээний мөсөн бүрхүүл хайлсан гэсэн үг юм.

Австрали улсын Тасманийн Их сургуулийн судлаач Уилл Хоббс хэлэхдээ, “Мөсөн бүрхүүл улам бүр багассаар байгааг бид харж байна. Энэ бол дэлхийн бөмбөрцгийн өмнөд туйлд болж буй эргэж буцахгүй үзэгдэл юм” гэжээ.

Г.АМАРСАНАА

Франц улс Парис хотоос зүүн хойд зүгт улаан үнэгний дунд “H5N1” төрлийн шувууны ханиад дэгдсэн тухай мэдээлсэн байна.

Вирус хөхтөн амьтдад тархаж байгаа нь дэлхий нийтийн санааг зовоож байгааг Дэлхийн амьтны эрүүл мэндийн байгууллага (WOAH) Мягмар гаригт мэдэгдэв.

Цахлай үхсэн газрын ойролцоох Меаусын байгалийн нөөц газраас гурван үнэг үхсэнийг олжээ. Үхсэн үнэгний нэгийг нь авч яваад шинжилж үзэхэд вирус илэрсэн аж.

Дэлхийн эрүүл мэндийн байгууллага өнгөрсөн сард шувуу, хөхтөн амьтдын өвчлөл нэмэгдэж байгаатай холбогдуулан шувууны томуугийн нөхцөл байдао “санаа зовоосон” түвшинд хүрснийг анхааруулсан. Шувууны ханиад Камбожид хүнд дамжин халдварласан тохиолдол бүртгэгдсэнд дэлхийн эрсдлийн үнэлгээг хянаж байна.

Шувууны ханиад сүүлийн нэг жилд дэлхий даяар тархсанаас 200 сая гаруй шувууг устгаж, өндөгний үнэ огцом өссөний дээр хүнд дамжих асуудал засгийн газруудын санааг зовоож байна.

Өмнө нь уг вирус арванхоёрдугаар сарын сүүлээр Францад нэг мууранд халдварлажээ. Түүнчлэн Испанид усны булга, Их Британид үнэг, халиу, Перугийн далайн арслан, АНУ-ын бор баавгайд илэрсэн байна.