Category: энтертаймент-ертөнц

Оросын “Knights bridge Entertainment” кино компани өнгөрсөн онд ОХУ-ын Ерөнхийлөгч В.Путиний амьдралаар уран сайхны кино хийхээр болсноо мэдэгдсэн билээ. “Киноны зураг авалт ирэх долоодугаар сард эхэлнэ” хэмээн тус компанийн ерөнхий менежер Валерий Саарян “Рио Новости” агентлагт өгсөн ярилцлагынхаа үеэр дурджээ.

“Ерөнхийлөгч Путиний дүрд дөрвөн жүжигчин өрсөлдөж байна. Мөн “Оскар”-ын хоёр удаагийн шагналт, найруулагч уг бүтээлийг найруулна. Гол дүр тодорхой болсны дараа найруулагч киноны төлөвлөгөөг гаргах болно” гэж тэрбээр ярьжээ.

В.Путиний дүрийг жүжигчин Леонардо де Каприо бүтээнэ хэмээн хэвлэлүүд мэдээлж буй юм. Менежер “Одоогоор гол дүр тодорхойгүй байна. Путиний дүрийн төлөө Каприо өрсөлдөж буй эсэх нь тодорхойгүй байна” гэв.

“Галзуу хурд” киноны наймдугаар ангийн зураг авалт эхэлжээ.

Киноны зураг авалт АНУ, ОХУ, Исланд, Куба Улсад болох гэнэ. Найруулагч Ф.Гэри Грей шинэ киноныхоо талаар хэлэхдээ, ирэх оны дөрөвдүгээр сард үзэгчдэд хүрнэ. Шинэ ангид өмнөх ангиудад гарч байгаагүй сонин, содон үйл явдлууд өрнөнө. Тиймээс сэтгэл догдолж байна хэмээн “AFP” агентлагт өгсөн ярилцлагадаа дурджээ.

Харин Москвагийн удирдлагууд шинэ ангийн зураг авалтыг Оросод хийх зөвшөөрөл хараахан олгоогүй байгаа гэнэ.

Леброн Жеймс шинэ амжилт тогтоолоо. Үндэсний сагсан бөмбөгийн холбооны Клевленд Кавальерс багийн лидер Леброн Жеймс өнөөдөр Детройт Пистонс багийн эсрэг хийсэн тоглолтонд карьерийнхаа 26000 дахь оноогоо авч, хамгийн залуудаа ийм амжилтанд хүрсэн тоглогч болж, түүхэн амжилтыг тогтоолоо. Түүний өмнө энэ амжилтыг Лос Анжелес Лейкерс багийн Коби Брайнт 32 насандаа тогтоож байсан бол Леброн 31 настайдаа уг амжилтад хүрлээ.

Детройтын эсрэг өнөөдрийн тоглолтод Хаан Жеймс 20 оноо авлаа. Мөн есөн удаа самбраас бөмбөг авч, найман удаа ашигтай дамжуулалт өгчээ.

“Хакухо цом”-ын барилдаан болж, аваргаа тодруулав. Энэ удаагийн тэмцээнд Их аварга Хакухо М.Даваажаргалын хүү барилдсан нь үзэгчдийн сонирхлыг татжээ.

Хэдэн жилийн өмнө Их аварга “Зодог тайлсныхаа дараа би Гинза дүүрэгт сумогийн өөрийн гэсэн дэвжээ нээж, хүүгээ ёкозүна болгохын тулд бэлдэж эхэлнэ” гэж байсан. Саяхан мэргэжлийн сүмогийнхны шинэ жилийн Мочицүки хийх үеэр өөрийн хүү Махато буюу Д.Мөнхжаргалаа дагуулан очиж, анх удаагаа сумогоор барилдуулж байсан юм.

Тэгвэл сая зохиогдсон Мэргэжлийн сумо бөхийн 69 дэх их аварга Хакүхо М.Даваажаргалын нэрэмжит “HAKUHO CUP” Олон улсын тэмцээнд аваргын найман настай хүү Д.Мөнхжаргал барилдав. Их аваргын хүү өрсөлдөгч бөхдөө ялагдсан ч аав нь хүүгээ өхөөрдөж, ээж нь тайвшруулжээ.

Зургаа дахь удаагаа болсон “Хакүхо цом”-ын тэмцээнд Монголын баг өргөн бүрэлдэхүүнтэйгээр оролцож, анх удаа багаараа алтан медаль авсан юм.

“Хурд” хамтлаг БНСУ-д ажиллаж амьдарч буй эх орон нэгтнүүддээ зориулан тоглолт хийх гэж байна. Тоглолт ирэх сарын 7-8-нд болно. “Хурд”-ынхан Сар шинийг тохиолдуулан энэхүү тоглолтыг хийж байгаа аж.

Тэд эх орноосоо хол суугаа монголчууддаа “Цэргийн бодол”, “Аавдаа би хайртай”, “Эх оронтойгоо би адилхан”, “Зураг шиг бүсгүй”, “Санаж байна”, “Хайрын сарнай” зэрэг уран бүтээлээ хүргэхээр төлөвлөжээ. Тоглолтод “Чоно” хамтлагийн дуучин Д.Дэрмээ оролцох юм байна.

Супер модель Тайра Банкс тээгч эхийн туслалцаатайгаар хүүтэй болжээ. Тайра Банкс Норвегийн гэрэл зурагчин Эрик Асла нар хүүгээ Йорк Банкс Асла хэмээн нэрлэсэн байна. Өдгөө 42 настай Тайра Банкс өмнө нь хүүхэд олохын тулд олон удаа хичээсэн ч бүтээгүй аж. Харин нөхрийнх нь хувьд өмнөх эхнэрээсээ хоёр охинтой юм байна. Хосууд хоёр жилийн өмнөөс хамт амьдарсан юм.

Монголчууд бидэнд өвөг дээдсээс уламжлагдсан уртын болон ардын дуунаас эхтэй орчин цагийн дуу хуурын баялаг өв бий. Гэсэн ч Монголын орчин үеийн дууны урлагийг дэлхий нийтийн хуртээл болгох, монгол нэрийг дэлхийд алдаршуулах санаачилга хангалттай бус байгаа юм. Тиймээс Монголын шилдэг поп дууг гадаад хэлээр дуулж, олон улсад монгол аялгууг дэлгэрүүлэх, соёлын нөлөөг өргөжүүлэх зорилготой “Монгол дуу дэлхийд” уралдааныг БСШУ-ы сайд Л.Гантөмөр санаачилжээ.

Өнгөрсөн есдүгээр сараас оролцогчдоо бүртгэж эхэлсэн тус уралдааныг энэ сарын 29-нөөс үзэгчдийн хүртээл болгох аж.

АНУ-ын Нью-Йорк хотод төвтэй “Олигвы Энтертайнмент” бүргэдчин охин Н.Айшолпаны бодит амьдралыг өгүүлсэн киноны нээлтийг хийжээ. “The Eagle Huntress” нэртэй энэ киноны нээлтэд гол дүрийг бүтээсэн Н.Айшолпан аав, ээжийн хамт оролцлоо. Киноны зураг авалт хоёр жил үргэлжилсэн юм.

Баян-Өлгий аймгийн Бугат суманд болсон “Хыран 2014” бүргэдийн баярт анх удаа эмэгтэй бүргэдчин оролцож, 13 настай Н.Айшолпан охин түрүүлсэн билээ. Энэ нь тус наадмыг үзэхээр дэлхийн өнцөг булан бүрээс ирэх жуулчдын анхаарлыг ихэд татсан. Израилийн зурагчин Ашэр Свиденски Монголд хийсэн аяллынхаа үеэр Н.Айшолпан охины зургийг авсан нь дэлхийд алдартай BBC агентлагийн сувгаар цацагдаж, охиныг олонд таниулсан билээ.

Улмаар Холливудын нэрт жүжигчин Мишель Родригез, АНУ-ын Нью-Йоркт төвтэй “Олигвы Энтертайнмент”-ийнхэн дээрх баримт киног хийж, Австралийн нэрт дуучин Сиа “Angels by the wings” хэмээх дууг нь дуулсан юм.

Солонгосын төв телевиз болох KBS-ийн дэргэдэх радиог “We are Koreans” нэвтрүүлгээр нь дэлхий дахинаа андахгүй сайн мэднэ. Энэхүү нэвтрүүлэг нь бүтэн сарын турш аль нэг орон, үндэстний соёл урлагийг дагнан сурталчлах зорилгоор уран бүтээлчидтэй хамтран ажилладгаараа онцлог. Өөрөөр хэлбэл арванхоёрдугаар сарыг Америкийн сар болгон зарласан бол Солонгост уран бүтээлээ туурвиж буй тус орны уран бүтээлчидтэй хамтран ажилладаг гэсэн үг. Тэгвэл энэ сарыг “Орос, Хятад, Монгол”-ынх болгон зарлаж, Солонгост ажиллаж амьдардаг дээрх орнуудын уран бүтээлчидтэй хамтран ажиллахаар болжээ. Дэлхийн хэмжээний радио нэвтрүүлэг гэх утгаараа өөрсдийн сонгох уран бүтээлчдэдээ хэр өндөр шалгуур тавьдаг нь ойлгомжтой.

Тэгвэл Монголыг төлөөлж С.Гантогоо хэмээх дуучин залуу сонгогдсон бөгөөд тэрбээр сүүлийн найман жил Солонгост амьдарч, өөрийн уран бүтээлээ туурвисаар яваа юм. Үндэсний сар шинийн баяр удахгүй тохиох гэж байгаа учраас “We are Koreans” нэвтрүүлгээр орчин үеийн зохиолын дуу хуур гэхээсээ үндэсний уран бүтээлээ түлхүү толилуулна гэдгээ тэрбээр хэлэв. Солонгосчууд ч бидэнтэй адил Цагаан сарын баярыг тэмдэглэдэг учраас нэвтрүүлгийн уран бүтээлчид энэхүү саналыг уриалгахан хүлээж авчээ.

Франц улсад болсон “Месси” олон улсын циркийн наадмаас Монгол циркчид алтан цом хүртсэн тухай бид өмнө мэдээлсэн. Тодруулбал, энэ сарын 21-24-ний өдрүүдэд болсон “Месси” олон улсын циркийн наадамд 12 орны циркчид өрсөлдсөн бөгөөд Монголын үндэсний циркийн уран бүтээлч, МУСТА Пүрэвжаргал ахлагчтай “Puje&Guys” хамтлагийн хамт олон алтан цомын эзэн болж чаджээ.

Тэгвэл “Алтан цом”-ын эзэд маань маргааш буюу 27-ны өглөө Аэрофлот онгоцоор эх орондоо газардахаар болсон байна.