Category: энтертаймент-ертөнц

АНУ-ын Ерөнхийлөгч асан Б.Обамагийн твиттер дэх хуудсандаа бичсэн үг хамгийн олон буюу гурван сая лайк авсан байна. Экс төрийн тэргүүн алдарт Нельсон Манделагийн хэлсэн үгийг иш татаж “Эхээс төрөхдөө бусдыг үзэл бодол, шашин шүтлэг, арьсны өнгөнөөс болж үзэн яддаг хүн гэж үгүй” хэмээн бичсэн нь твиттерийн түүхэнд байгаагүй олон лайк авчээ. Б.Обама энэ өгүүлбэрийг энэ сарын 12-ны өдөр олон нийтийн сүлжээнд бичсэн байна. Өөрөөр хэлбэл өнгөрсөн бямба гаригт Америкийн Шарлоттсвилл хотод хэт барууны болон зүүний үзэлтнүүдийн хооронд гарсан мөргөлдөөний дараа бичжээ. Ингэхдээ 2011 онд Мэриленд мужийн Бетесде хотын хүүхдийн цэцэрлэгт зочлохдоо авахуулсан зургаа тавьсан нь байна.

“Авьяаслаг Монголчууд” шоу нэвтрүүлгийн шилдэг оролцогч Б.Шижирбат эх орноо төлөөлөн “America’s got talent” буюу “Авьяаслаг Америкчууд” 2017 нэвтрүүлэгт оролцож байна. Тус шоу нэвтрүүлгийн энэ улирлын шүүгчээр дэлхийн алдартнууд болох Хауи Мандел, Мел Би, Хайди Клум, Саймон Коуэлл нар шүүж байгаа юм. Финалын тоглолт ирэх сарын 15-нд Dolby театрт болох гэнэ.

Харин Б.Шижирбатын хувьд график анимешн, бүжиг хоёрыг хослуулснаараа онцлог басхүү өвөрмөц түүний хоёр дахь үзүүлбэрийг өдгөө дэлхийн 100 гаруй сая хүн үзээд буй. Түүгээр ч үл барам дэлхийн алдарт “Mashable” сайт онцолсон нь Б.Шижирбат яах аргагүй дэлхийд танигдсаных нь илрэл юм. Тэгвэл энэ удаа Америкчуудыг байлдан дагуулахаар зэхэж байна.

Тэрээр энэ талаар өөрийн цахим хуудаснаа ” Аймар юм битгий хүлээгээрэй” гэж бичсэн байна. Б.Шижирбат “Авьяаслаг монголчууд-2016” шоунд оролцсоноор өөрийгөө жинхэнэ утгаараа нээж, илрүүлж, дайчилж чадсан гэж бодож байгаа гэж ярилцлага өгч байсан. Эгэл даруу, авьяаслаг уран бүтээлчдээ шоу нэвтрүүлэгтээ амжилттай оролцож дэлхийд танигдахын ерөөл тавья.

“Чоно” хамтлаг шинэ уран бүтээл болох “Уухай” дуугаа дүрсжүүлэн олны хүртээл болголоо. Тус хамтлагийн хувьд хэсэг хугацаанд нам гүмхэн байсан уран бүтээлдээ ийнхүү шаргуу ороод эхэлжээ. Дууны үг, аяыг Дэрмээ бичсэн юм байна. “Уухай”-н түрлэгтэй сайхан наадаарай.

Ираны нийслэл Тегеран хотноо АНУ-ын Ерөнхийлөгч Доналд Трампын шог зургаар үзэсгэлэн гаргасан болохыг “Islam Today”-д мэдээлжээ. Тус үзэсгэлэнд Ираны болон гадаадын нийтдээ 74 улсын уран бүтээлчдийн 1600 гаруй бүтээл тавигдсан байна. Зураачид АНУ-ын төрийн тэргүүний гаргаж буй зүй бус ааш авирыг илэрхийлэхийг зорьжээ.

Үзэсгэлэнг зохион байгуулагч Масуд Шойя Табатабай хэлэхдээ “Трампизм” хэмээн нэрлэсэн нь тохиолдлынх биш бөгөөд “Бид арьс өнгөөр ялгаварлан галуурхалт болон нацизм гэсэн санааг агуулж “Изм” буюу “Trumpism” гэж нэрлэсэн. Мөн хүмүүс ч үзэсгэлэнгийн бүтээлүүдээс Гитлерийн хэв шинж байгаа болохыг олж харж байна” гэсэн байна. Зарим эх сурвалжийн мэдээлж байгаагаар, үзэсгэлэнгийн лого, билэг тэмдгийг мөн нацист Германы хас тэмдэгтэй адилтгаж, улаан дэвсгэртэй цагаан дугуй дотор хас тэмдэгийн оронд “Т” үсэг тавьсан байна.

Үзэсгэлэнгийн тэргүүн байрын 1.5 мянган долларын шагналыг Ираны уран бүтээлч Хади Азади хүртжээ. Тэрээр нэг долларын мөнгөн дэвсгэртээр хийсэн пиджактай Трамп номон дээр шүлсээ гоожуулж байгаагаар дүрсэлсэн уг бүтээлээрээ “Соёлын билэг тэмдгийг үгүй хийж байгааг Трампад харуулахыг хүссэн” гэсэн тайлбарыг өгжээ.

Б.ОДГЭРЭЛ

Ойрд гаргасан дуу бүр нь хит болж, олны таашаалыг хүлээж буй “Гурван бүдүүн” хамтлаг шинэ уран бүтээлээ олон нийтэд хүргэлээ. Энэхүү хамтлагийн дуучин Шагайгийн зохиосон “Гуч гарсан бүсгүй” хэмээх уран бүтээлийг залуучууд төдийгүй бүх насны сонсогч нарын аманд аялагдах дуу болж чадсан. Тэгвэл тус хамтлагийн Эрдэнэ, Чука нар “Хөвсгөр бүсгүй” хэмээх шинэ уран бүтээлээ олон нийтэд хүргэлээ. Яг одоогоор фм, радио, youtube сайтуудаас энэхүү уран бүтээл хамгийн олон хандагчтай байна. Энэхүү дууны клипт “Маск” продагшин болоод “Эмоци” хамтлагийн жүжигчид тогложээ. Ингээд “Гурван бүдүүн” хамтлагийн шинэ уран бүтээлийг хүргэе.

Э.МӨНХ

МУГЖ Э.Амартүвшин энэ сарын 1-нд Италийн хамгийн эртний тайз, бахархалт байгууламж гэгддэг “Веронагийн задгай театр”-т Ж.Вердийн “Риголетто” дуурийг нээж Риголлеттогийн ариг дууллаа. Уг бүтээлийг Италийн шилдэг найруулагчдын нэг Иво Гуэрра найруулан тавьж байгаа бөгөөд Италийн Лусса хотын Жиллио театрын уран сайхны удирдагч, удирдаач БНСУ-ын Тэгү хотын симфони оркестрын ерөнхий удирдаач Жулиан Ковачев удирдсан байна.

Арена Ди Веронад нийт таван удаа тоглох “Риголетто” дуурийн эхний хоёр тоглолтонд гавьяат жүжигчин Э.Амартүвшин ийнхүү анхны Монгол дуучин болж оролцсон бөгөөд түүний дүрийн талаар Италийн “Arenagii” нэртэй хэвлэлд онцлон дурьдсан байна. Тус сонинд “Риголетто дуурийн гол дүрд нь анх удаа Монгол улсын залуу баритон, гайхалтай өгөгдөлтэй дуучин Энхбатын Амартүвшин дуулсан нь бөгөөд дөнгөж 30 настай энэ дуучин тус дүрийн нууц далд санаа, онцлог болгоныг хэдийн таньж мэдсэн мэт санагдлаа. Дуурийн гол дүрийн хамгийн зовж шаналсан хэсгүүдийг тодотгосон дуулалтын үг хэллэг, дуудлага нь төгс байсан бөгөөд маш их гашуудан эмгэнэж буй эцэг хүний дүрийг гайхалтай бүтээж, үзэгчдийн талархлыг хүлээн, нижгэнэсэн алаг ташилтыг зүй ёсоор хүртлээ” хэмээжээ.

Фэйсбүүк сүлжээний од болж олон хүний сонирхлыг татаж, эгдүүг хүргэж байсан Осоржамаа хувцасны модель болжээ. “BLCK fashion” бэлэн хувцасны дэлгүүр түүнийг сонгон хувцсаа өмсүүлж, сурталчилгааны зураг авахуулсан байна. Буруу, зөв янз бүрээр ярьж сошиалд өөрийгөө илэрхийлж олны анхаарлыг татсан түүнийг сурталчилгаандаа ашиглах нь бас нэгэн маркетинг байж болох юм.

Н.ГАН

Манай улс уламжлалын чиглэлээр хүний их эмч бэлдээд 26 жил болсон. Анагаах ухааны их сургуулийн Уламжлалт анагаах ухааны ангийг анх 1993 онд төгсөгчид өнөөдөр уулзлаа. Төгссөн цагаасаа уламжлалт анагаах ухааны чиглэлээр эрүүл мэндийн салбарт тууштай ажиллаж байгаа олон арван төгсөгчид энэ ангийнх ажээ. Тухайлбал Монголын анагаах ухааны академийн гишүүн, академич, Анагаах ухааны шинжлэх ухааны доктор, дэд профессор Ш.Болд, Д.Цэрэндагва, Эрүүл мэндийн яамны төрийн нарийн бичгийн дарга Д.Очирбат нарыг дурдаж болно. Тухайн үед АШУИС-ийн анги бүрээс онц сурлагтангуудыг цуглуулан Уламжлалт ангаах ухааны ангийг бүрдүүлж байсан, бүгд түвд хэлтэй мундаг оюутнууд байсан талаар Эмийн ургамлын багш Б.Хүдэрчулуун дурсан ярьж байсан юм.

Монголын Уламжлалт Анагаах Ухаан нь олон мянган жилийн түүхтэй, нотолгоонд суурилсан биеэ даасан анагаахын шинжлэх ухааны нэгэн томоохон салбар юм. Эрүүл мэндийн салбарт УАУ-ы хэрэгцээ, шаардлага сүүлийн жилүүдэд Азидаа төдийгүй дэлхий даяар асар хурдтайгаар өсөн нэмэгдэж байна. Дэлхийн өндөр хөгжилтэй улс орнуудад ч УАУ-ы тусламж үйлчилгээний хэрэглээ, төсөв санхүүжилт жил тутам нэмэгдсээр байгаа нь УАУ-ы оношилгоо, эмчилгээний үр дүн өндөр, өртөг бага, хувь хүн тус бүрийн онцлогт тохирсон эмчилгээг хийдэг, байгалийн гаралтай, аюулгүй, хүртээмж, чанартай эмнэлгийн тусламж үйлчилгээг үзүүлдэгтэй холбоотой юм. Тухайлбал, Монгол Улсын Эрүүл мэндийн тухай хуульд “Хүн амд эрүүл мэндийн тусламж, үйлчилгээг орчин үеийн болон уламжлалт анагаах ухааны дэвшилтэт аргад тулгуурлан үзүүлэх” гэж заасан байдаг. УАУ-ыг хөгжүүлэх талаар төрөөс баримтлах бодлогийн хүрээнд УАУ-ы эмнэлгийн тусламж үйлчилгээ, сургалт, эрдэм шинжилгээ, эм үйлдвэрлэлтэй холбоотой хууль эрхзүйн олон баримт бичгүүдийг батлан хэрэгжүүлж байна.

БНСУ-ын Сөүл хотноо Азийн топ модель фестиваль 12 дахь жилдээ болж өнгөрлөө. Уг тэмцээнд манай загвар өмсөгч С.Төгс урилгаар оролцож Азийн стар модель цомын эзэн болжээ. Тэрээр энэ удаагийн тэмцээнд “Precious fashion house”-ийн урласан даашинзыг амилуулан, алхаж энэхүү шагналыг хүртсэн байна. Загвар өмсөгч С.Төгсийн хувьд ихэвчлэн Азийн топ загварын агентлагуудтай хамтран ажилладаг бөгөөд энэ жил “Азийн дараагийн топ модель” тэмцээнд оролцож, салбарынхаа нэр хүндийг улам өсгөсөн амжилттай байгаа юм.