Category: энтертаймент-ертөнц

Данийн Үндэсний Музей, Аархус хотын Угсаатны зүйн “Моосгард” музей хамтран зохион байгуулсан “Чингис Хааны тал нутаг-Монголын нүүдэлчид” тусгай үзэсгэлэн энэ сарын 18-ны өдөр нээлтээ хийлээ.

Олон улсын уран бүтээлчдийн хамтарсан “The Mongolian Connection” уран сайхны кино удахгүй үзэгчдийн хүртээл болох нь ээ. АНУ, Монгол, Казахстан, Турк, Герман, Англи, Австрали, Канад зэрэг найман улсын уран бүтээлчид оролцсон тус киноны гол дүрд “IFI” продакшны ерөнхий продюсер, жүжигчин Б.Амарсайхан тогложээ. Мөн киноны гол дүрд монгол талаас Т.Бархүү, “Хадаг”, “Хөөрхөн шулам” зэрэг киноны гол дүр, Азийн шилдэг жүжигчин Б.Цэцэг, БНСУ-ын Урлагийн их сургуулийн төгсөгч, “Амьдралоги” уран сайхны киноны гол дүр Б.Янжиндулам нар тоглох аж.

Кино зураг авалт дөрөвдүгээр сард эхэлсэн бөгөөд Монголд 80 хувь, АНУ-д 15 хувийн зургийг авчээ. “The Mongolian connection” уран сайхны кинонд АНУ болон Монголын цагдаа нар хамтран гэмт хэрэг илрүүлж байгаа талаар өгүүлэх тулаант, адал явдалт кино юм. Кино энэ оны аравдугаар сарын 5-нд Монголд болон Казахстанд зэрэг нээлтээ хийх аж. Энэхүү бүтээл олон улсын А зэрэглэлийн фестивалуудад оролцож, АНУ болон Ази, Европын зах зээлд гарах юм байна.

Чойжин ламын сүм музей нь 2011 оноос жил бүр “Шөнийн музей” үйл ажиллагааг зохион байгуулж ирсэн.Өнгөрсөн хугацаанд “Хөсөгтөн хамтлаг”, “Морин хуурын чуулга”, “Улаанбаатар чуулга” зэрэг байгууллагууд өвөрмөц үзвэрийн арга хэмжээнд оролцож өөрсдийн бүтээлээ түгээж байлаа.Энэ жил тус музейн зүгээс “Шөнийн музей–Colors of Mongolia” үйл ажиллагааг 2018 оны 07 сарын 04, 05-ны өдрүүдэд 20:30 – 00:00 цагийн хооронд зохион байгуулахаар болжээ.

Энэ үеэр Монголын түүх, соёлын үнэт өв болох Чойжин ламын сүм музейн арвин баялаг сан хөмрөгөөс сонирхохын зэрэгцээ зөвхөн энэхүү үйл ажиллагаанд тусгайлан зориулж дэлгэсэн “Өндөр гэгээн Занабазарын хосгүй үнэт бүтээлүүд”-ийг үзэж мэлмийгээ баясгах боломжтой юм.

Мөн өнөөдөр “Чойжин ламын сүм” байгуулагдсаны 110 жилийн ойд зориулсан “Монгол төрийн сахиусны өргөө” үзэсгэлэн Blue Mon галарейд нээгдэж байна.

Америкийн телевизийн хөтлөгч Опра Уинфри дэлхийн 500 тэргүүн баяны жагсаалтад бичигдлээ. Bloomberg агентлагийн гаргадаг жагсаалт тэрээр 494-т оржээ. Мөн Уинфри энэ жагсаалтад багтсан анхны өнгөт арьст эмэгтэй болжээ. Түүний хөрөнгийг 4 тэрбум ам.доллар гэж үнэлсэн ба хөрөнгө нь өнгөрсөн онд $427 саяар нэмэгдсэн байна. Weight Watchers компаний хувьцаа нь дээрх ашгийг өгсөн бөгөөд тэрбээр уг компаний 10 хувийг эзэмшихийн зэрэгцээ захирлуудын зөвлөлд нь багтдаг юм.

Bloomberg агентлагийн тэргүүн 500 баяны жагсаалтад 65 эмэгтэй багтаж байгаагийн зургаа нь бизнес эрхлэгч байгаа юм.

Хөдөлмөрийн баатар, төрийн шагналт, ардын жүжигчин Б.Жамъяндагвын “Тэнгэрийн ташуур” хэмээх Атилла хаан болон Хүннү цэргийн хүч чадал, эр зориг, сүр жавхааг харуулсан түүхийг сэлэмт бүжгээр анх2011 онд УДБЭТ-ын уран бүтээлчид тайзнаа амилуулсан билээ. Тэгвэл долоон жилийн дараа буюу энэ сарын 23, 24-ны өдөр УДБЭТ-ын тайзнаа дахин тоглогдох гэж байна. Тус тоглолтын хөгжмийн зохиолч, бүжиг дэглээчээр СТА А.Батдэлгэр, хөгжмийн удирдаачаар АНУ-ын Стенфордын их сургуулийн профессор, удирдаач Жин Дон Кей нар ажиллаж байна.

Тоглолтын талаар хөгжмийн зохиолч, бүжиг дэглээч СТА А.Батдэлгэрээс тодрууллаа.

–“Тэнгэрийн ташуур” бүтээлийн санаа хэрхэн төрсөн бэ?

-Хүннүгийн Атилла хаан гэдэг монгол угсааны өвөг дээдсийн тухай түүх учраас тавих хэрэгтэй гэж анх ардын зураач асан Ч.Гунгаасүх багш надад санал болгосон юм. Би Б. Жамъяндагвабагшид хэлээд зохиолыг нь бичүүлсэн.

–Үзэгчдийн хүртээл болгоход хэр зэрэг хугацааг зарцуулсан бэ?

-Би балетийн бүжигчин мэргэжилтэй хүн, яваандаа сонгодог хөгжмийг судалж тэр чиглэлээр суралцсан. Хөгжмийн зохиомжийг хэрхэн гаргах, мөн балетийн зохиолыг яаж бичих талаар 20 жил судалсан. Атилла миний гуравдахь балет анх 2010 онд Атиллагийн аяыг хийж байлаа.

–Долоон жилийн өмнө тавигдсан бүжгээс энэ удаа юугаараа онцлог байна вэ?

-Энэ жилийн тоглолтонд залуу бүжигчид их оролцож байгаа. Уран бүтээлч хүн уран бүтээл хийгээд орхих биш, сайжруулж, шинэчилж, өөрчилж байх тусам чанартай болдог учир дэглэлт болон хөгжмийн тал дээр өөрчилсөн зүйлс бий.

–Энэхүү жүжигт Атилла хааныг ямар өнцөгөөс харуулахыг зорьсон бэ?

-Тэр хүний төрх, зан араншинг балетад харуулж болох бүхий л хэсгүүдийг тусгасан. Өөрийнх нь сэтгэл хөдлөл, эмэгтэй хүнд хэрхэн дурлаж, хэрхэн хувирч өөрчлөгдөж, хууртагдаж байгаа холбоосууд, үйл явдлын зөрчлүүдийг харуулахыг зорьсон. Сонгодог урлаг гэдэг маш агуу тэнгэрлэг, хүнийг сайн сайхан гэгээлэг зүйлс рүү үргэлж дагуулж байдаг.

Ц.УРАНБОЛОР

Өмнөговь аймгийн төв Даланзадгадад 65 метр өндөр морин хуурын цогцолбор байгуулна. Тус аймагт “Говийн бараа” ХХК-ийн 100 хувийн өөрийн хөрөнгө оруулалтаар хийх бүтээн байгуулалтын ажлууд эхлээд байна. Үүний нэг нь энэхүү морин хуурын цогцолбор юм.

Тус морин хуурын цогцолбор бүхий хотхонг байгуулах ажлыг Өмнөговь аймгийн Мандал-Овоо сумын уугуул Б.Машбат санаачилсан байна. Уг цогцолбор барилгын хоёр талаар цахилгаан шатаар дээш гарч, хуурын хоёр чихэн дээрээс алсын барааг харахаар төлөвлөсөн гэнэ.
“Говийн бараа” ХХК нь Даланзадгадын шинэ суурьшлын бүсэд “GB Town” хорооллыг байгуулахаар зорин ажиллаж байна. Энэхүү хороололд 300 айлын орон сууц, 65 метрийн өндөр морин хуур цогцолбор, сургууль, цэцэрлэг, худалдааны төв, 24 айлын таун хаусны иж бүрэн хотхон байгуулж Даланзадгад болон Өмнөговь аймагтаа өнгө нэмэх зорилго тавьжээ. Өмнөговь аймаг нь энэ жилийн их бүтээн байгуулалтын жил болгон зарлаад байгаа билээ. Тиймээс орон нутгийн төсвийн хөрөнгөнөөс гадна ийнхүү хувийн хэвшлийнхэн өөрийн хөрөнгөөр ийнхүү бүтээн байгуулалтад гар бие оролцож байна.

Олон улсын хэмжээний спорт болон урлагийн арга хэмжээ зохион байгуулж байгаа улс орнууд эх орныхоо зан заншил, ахуйн онцлогуудыг дэлхий дахинаа таниулах төрөл бүрийн бүтээгдэхүүн гаргадаг уламжлалтай.

Энэ уламжлалыг ДАШТ-2018 зохион байгуулж буй Орос орон ч дагаж, орос ахуйн бэлгэдлүүдийн нэг болсон матрешка хүүхэлдэйг “Вятский сувенир” үйлдвэр худалдаанд гаргажээ.

Энэ үйлдвэр олон жилийн түүхтэй, анх 1930 онд Вятскийн мужийн Нлиск хотноо “Свобода” хэмээх гар урлалын газар нээгджээ. Тэр үеэс хойш ихээхэн алдартай болсон энэ газар одоогийн Киров мужид үйл ажиллагаа явуулдаг бөгөөд ДАШТ-2018-д зориулан цуврал матрешкаг танилцууллаа. Цувралд ДАШТ-ий бэлгэ тэмдэг болсон Забивака чоно, мөн хөлбөмбөг тэвэрсэн матрешканууд багтжээ.

Ийнхүү Киров мужид цуврал матрешка гаргасан бол Самар хотноо ДАШТ-2018-д зориулан бүтээсэн матрешкануудыг гудамжинд суурилуулж эхэлсэн байна. Нийтдээ 8 матрешка суурилуулах бөгөөд тэд “Самара Арен” цэнгэлдэх хүрээлэнд шигшээ багууд нь тоглох улс орнуудын найрамдлыг бэхжүүлэхэд чиглэгдсэн гэж зохион бүтээгчид нь ярьжээ.

Эхний ээлжийн матрешкануудыг эрэг дагуу, мөн ЦСКА усан сангийн ойролцоо суурилуулсан байна. Матрешка бүр Колумби, Сенегал, Коста-Рика, Дани, Австрали, Серби, Уругвай, Орос гэсэн оролцогч орнуудын соёл, түүхийг өөртөө тусгажээ. Мөн матрешка бүрийн дизайнд Оросын төрийн далбааны өнгө, дурсгалт газар, үндэсний хээ угалз, олонд танил бэлгэдлүүдийг ашигласан байна.

Зураач Б.Баярцэнгэлийн гурав дахь бие даасан үзэсгэлэн нь “Самади” нэртэйгээр олны хүртээл болж байна. Үзэсгэлэн энэ сарын 16-нд “Занабазарын нэрэмжит Дүрслэх Урлагийн музейд” нээлтээ хийсэн юм. Үзэсгэлэн энэ сарын 22-ныг хүртэл гарах юм. “Дагжиж бээрсэн хүн л хүйтний тухай жихүүцэн даартал ярьж чадах байх… Яг түүн шиг юмсыг сэрэл мэдрэмжээрээ тэмтрэн таних нь шинэ сэдэл санаа, шинэ туршилт, шинэ боломж гэх мэт шинэ бүхэнд хүргэж өгдөг. Хил хязгааргүй эрх чөлөөт нөхцлийг урлаг бидэнд өгдөг” хэмээн зураач Б.Баярцэнгэл ярьж байв.

Түүний бүтээлүүдэд бурхны дүр голчилдог бөгөөд шинэ залуу зураачдын сэтгэхүйн онцлог, уран бүтээлчийн зурагт туссан орчин цагийн нийгмийн нөлөөлөлт хүчин зүйлсийн тухай олон гаргалгааг үзэгчид өөртөө бий болгож болно. Угаас “Урлагт “эрх чөлөө” хамгийн чухал” гэх ойлголт нэн шинэ үеийн давалгаанд хамаарагддаг.

Төрийн соёрхолт, дуучин, продюсер Д.Болдын соло уран бүтээлийн шинэ цомог мэндэллээ. Тэрээр бие даасан 12 дахь цомгоо “Болд” нэрээр гаргажээ. “Болд” шинэ цомогт “Торгон мэдрэмж”, “Зүрхний дагина”, “Мартахаасаа өмнө”, “Даам” зэрэг 15 дуу багтжээ. Цомгийн хөгжмийн найруулгыг “Ocean Grey”, Л.Сибастиан, Н.Баярхүү, С.Гантөр хийн дууны үгийг DNK, Ria, ZZ, реппер Цэцэ, Х.Соёмбо, Д.Ган-Очир нар бичин гитарчин Атка, Д.Өлзий-Орших нар хамтран ажиллажээ.