Category: энтертаймент-ертөнц

“Авьяаслаг Монголчууд” шоуны гурав дахь удаагаа үзэгчдэд хүрэхэд бэлэн болжээ. Есдүгээр сарын 16-ны ням гаригаас эхлэн Монгол ТВ-гээр хүрэх гэж байна. “Авьяаслаг Монголчууд” шоуны шүүгчийн шатны шалгаруулалт өнгөрсөн зургадугаар сард болж өндөрлөсөн билээ.

Энэ удаагийн шоуны шүүгчдийн бүрэлдэхүүн Реппер, продюсер Рокит Бэй, Хөтлөгч, продюсер П.Анужин, Жүжигчин, продюсер Г.Ундармаа, Чингис хаан одонт МУГЖ Г.Ариунбаатар нар ажиллаж байна. Харин тус шоуны хөтлөгчөөр Б.Мандуул сонгогджээ. Б.Мандуул нь Монгол ТВ-ийн “Өнөө өглөө” болон “Наашаа Цаашаа” нэвтрүүлгийн хөтлөгч юм.

Дашрамд сонирхуулахад, “Авьяаслаг монголчууд” шоуны анхны ялагчаар С.Жамъяанхорол багштай “Эгшиглэнт чимээ” хамтлаг тодорч, 100 сая төгрөгөөр шагнуулж байсан. Хоёр дахь удаагийн “Авьяаслаг монголчууд-2016” шоу нэвтрүүлгийн ялагчаар “Нуугдсан эрдэнэ” хэмээх О.Энх-Эрдэнэ дуучин түрүүлсэн юм.

Германы загвар ба амьдралын хэв маягийн ICON сэтгүүлийн есдүгээр сарын дугаарт Монгол улсад хийгдсэн нэгэн үзэсгэлэнт зураг авалт нийтлэгджээ. Зураг авалтын гол дүр болох загвар өмсөгч Ж.Энэрэл мөн сэтгүүлийн нүүр хуудсыг чимсэн байна.

“Freezone” хамтлагаас албан ёсны мэдэгдэл хийжээ. Тодруулбал, Өвөрмонголын “Top line” хэмээх хамтлаг манай улсын “Freezone”-ы дууг ковер хийж дуулсан нь ойрын өдрүүдэд олон нийтийн сүлжээгээр тархсан.

Өвөрмонголын залуусын хамтлаг нь “Зүүдний дагина” гэх дууг нь “Албан ёсны зөвшөөрөлгүйгээр дууг нь дуулсан тул хамтлагийн продьюсерт оюуны өмчийг дээдлэх тухай дээрх мэдэгдлээ хүргүүлж байгаа юм байна. Мөн сошиал орчинд мэдэгдлээ лайв хийж дамжуулж байгаа аж.

Москва хотын Улаан талбайд болсон Олон улсын цэргийн хөгжмийн наадамд МУГЖ, “Чингис хаан” одонт дуучин Г.Ариунбаатар оролцжээ. Тэрбээр наймдугаар сарын 30-ны өдөр болсон тоглолтод оролцож, дэлхийд алдартай сопрана Хибла Герзмаватай хамт “Подмосковные вечера” дууг дуулсан байна.

АНУ-ын зохиолч, нийтлэлч Жак Уэтерфордын “Genghis Khan and the making of the modern world” буюу “Өнөөгийн ертөнцийг бүтээгч Чингис хаан” хэмээх бүтээл анх удаа вьетнам хэлээр хэвлэгдэн гарсан байна.

Жак Уэтерфордын уг бүтээлийг Вьетнамын зохиолч, орчуулагч Во Фуонг Линь /Vo Phuong Linh/ орчуулж “Omega Boo JSC” хэвлэлийн компанид хэвлүүлэн нийтийн хүртээл болгож Монгол Улсаас БНСВУ-д суугаа Дипломат Төлөөлөгчийн Газарт бүтээлийн дээжийг ирүүлжээ.

Тус ЭСЯ Ханой хот дахь дипломат төлөөлөгчийн газруудын номын клубуудтэй харилцан ном солилцох, номын өдөрлөг зохион байгуулах зэрэг арга хэмжээ зохион байгуулж байдаг. Энэхүү бүтээл вьетнам хэлээр орчуулагдан гарч байгаа нь манай улсын түүх, соёлыг суугаа орны ард түмэнд сурталчлан таниулахад үнэтэй хувь нэмэр оруулсан үйл явдал болж байгаа ажээ.

ААН Галерей энэ оны ээлжит үзэсгэлэн болох уран бүтээлч Б.Болормаагийн “CODE 1” уран бүтээлийн үзэсгэлэнг 08-р сарын 09-ний өдрөөс эхлэн та бүхэнд толилуулж байна.

Зураач Б.Болормаа нь 2014 онд Бельгид “Gros Art” үзэсгэлэн, 2016 онд Тайваньд “Her presence in colours” үзэсгэлэн болон Солонгос улсад олон улсын эмэгтэй зураачдын үзэсгэлэнд оролцож, хилийн чанадад Монголын уран зургийн дээжийг толилуулж байсан авьяаслаг уран бүтээлч билээ. Мөн эх орондоо өөрийн бие даасан “Далд”, “Хотын төрх 1”, “Хотын төрх 2”, “Минимал Арт” зэрэг үзэсгэлэнг олон нийтэд хүргэж байсан юм.

Хүн бүр төсөөлөн бодох чадвартай хэдий ч гагцхүү уран бүтээлч хүнд тэрхүү төсөөллийг дүрслэн буулгах авьяас билэг заяасан байдаг билээ. Орчлон ертөнцийн олон төрлийн өнгө будаг, хэлбэр дүрсийг өөрийн төсөөллөөр харж, дүрслэгдэхүүнээр илэрхийлэн буулгадаг нь зураач хүний онцлог юм. Тэгвэл уран бүтээлч Б.Болормаа нь “CODE 1” үзэсгэлэнгээрээ ямарваа нэгэн хэлбэр дүрст баригдалгүй, байгалийн далд хүч, хүмүүн бидний оршихуйн цаг хугацаа, ертөнцийн шүтэн барилдлага, эгэл байдал зэргийг гурван хэмжээст дүрс, өнгө будгийн зохиомжоор хослуулан харуулахыг зорьжээ.

Амралтын болон ажлын өдөр гэр бүл найз нөхдийн хамт хотын өмнө зүгт орших Наадам центрт зочлонгоо ХААН Банк Цамхагийн 3-р давхарт байрлах ХААН Галерейд саатан 8-р сарын 30-ний өдрийг дуустал үргэлжлэх зураач Б.Болормаагийн “CODE 1” үзэсгэлэнг үзэж, оюуны таашаал авахыг урьж байна. Эрхэм та бүхэн ажлын өдрүүдэд 10:00-19:00, амралтын өдрүүдэд 11:00-18:00 цагийн хооронд ХААН Галерейд гарч буй үзэсгэлэнг үнэ төлбөргүй үзэх боломжтойг дуулгая.

Бүрэн хэмжээний уран сайхны “Мулан” киноны анхны гэрэл зургууд цахим сүлжээгээр нийтлэгдсэнтухай “Buzzfeed News” мэдээлж байна.

Эхний зургуудад киноны гол дүрийг бүтээж байгаа хятад жүжигчин Лю Ифэй сэлэм барьсан, зурмал киноны баатрын дүрсийг хуулбарласан байдалтайгаар буусан байна. “Disney” компани уг киноны зураг авалт эхэлснийг албан ёсоор зарласан. Киног Ника Каро найруулж, зураг авалт нь Хятад ба Шинэ Зеландад хийгдэнэ. Харин киноны нээлт 2020 онд болно.

“Мулан” киноноос Гун Лигийн хувьд эсрэг дүрийн хүчирхэг шулмын дүрд, харин Хятадын эзэн хааны дүрд Жэт Ли тоглохоор болсон. Фа Муланы дүрд жүжигчин Лю Ифэй, Муланы багш Тун жанжны дүрд Донни Иен тоглоно.

Анх “Мулан” хүүхэлдэйн киног 1998 онд олны хүртээл болгож байсан бол тухайн жилийнхээ Оскарын кино наадамд нэр дэвшиж байсан амжилтыг үзүүлж байсан аж.

Хэрвээ та зураач байсан бол ямар өнгийг сонгох байсан бэ?

Хамгийн тод өнгөтэй зургаас эхэлсэн эдгээр өнгө өнгийн учир битүүлэг бүтээл хэнийх болох талаар “Монголын урчуудын эвлэл”-ийн үзэсгэлэн зохион байгуулагч А.Өсөхбаяраас сонирхлоо.

Урлагийг хүн бүр харилцан адилгүй ойлгодог бөгөөд зураач бүрийн хэв маяг үргэлж өөр байх аж. Тэр тусмаа өнөөдрийн үзэсгэлэнгийн хэв маяг өөр хоорондоо бүр ч ялгаатай. Учир нь Монгол, Солонгос хоёр өөр улсын зураачдын бүтээл болохоор тэр. Энэ жил Монголд анх удаа хоёр улс хамтран шилдэг зураачдынхаа бүтээлийг гаргаж байгаа гэнэ. Монголын зураачдын бүтээл яагаад ийм цөөхөн байгааг сонирхоход О.Энхтайван, М. Баярмагнай, Г. Батчулуун, Алтанцэцэг гэх ердөө дөрөвхөн зураачийн бүтээл оролцож байгааг мэдлээ. Харин Солонгос зураачдын бүтээл яггүй их харагдсан нь 72 зураачдын бүтээл Монголын үзэсгэлэнд тавигдахаар шалгарсантай холбоотой байж. “Монголын урчуудын эвлэл”-ийн галерейд янз бүрийн содон зургууд, өөр өөрийн түүхтэй тавигддаг ба заримдаа тэдгээр зургууд бүхэлдээ нэг утгыг илэрхийлдэг гэж зохион байгуулагч Өсөхбаяр ярилаа.

Өмнө нь үзэж байсан зургуудтай харьцуулахад энэ удаагийн зургууд завсрын өнгөтэй гэхэд тун хурц юм. Эсвэл хүний нүдэнд тусах цэгийг нарийн тодорхойлсон юм шиг. Энэ талаар асуухад Солонгосын зураачид зургаа байрлуулахдаа урьдаас тусгайлан зааварчилгаа өгдөг гэв. Зургийн байрлалын хувьд өнгөний хоршил хамгийн чухал аж. Гэвч ийм завсрын хэрэн тод өнгөнүүдийг хэрхэн зохицуулж байрлуулдаг нь сонирхолтой. Зарим нь цагаан, шаргал, усан цэнхэр гэх зэрэг бүдэгхэн өнгөнүүд зонхилсон байхад нил ягаан, хар хөх, улаан зэрэг тод өнгөнүүдтэй хооронд нь шингээнэ гэдэг ярвигтай. Гэсэн хэдий ч зураачид өөрсдийн бүтээлийг үзэсгэлэнд өгөхдөө тусгайлан байрлалыг тогтоосон байдаг байна.

Хамгийн сонирхолтой зүйл бол галерейд ажиллаж буй хүний хувьд Монгол Солонгос хоёр өөр улсын зураачдын зургийн онцлогийг дүгнэх байх. Тиймээс зохион байгуулагч А. Өсөхбаяраас энэ тухай асуухад, зураачдын зургийн өгүүлэмж, харж тусгах өнцөг, өнгийг хэрхэн ашиглаж байгаа зэрэг нь өөр хоорондоо ялгаатай байх ба энэ нь тэдний онцгойрох өнцөг байдаг байна.

Долоо хоногийн хугацаатай явагддаг уг арга хэмжээнд ийм байдлаар өдөр бүр зургийн байрлалыг тогтоодог гэхээр нэг талаар урлагийг ойлгох амаргүйг сануулна. Хэрэв нэг л зургийг буруу байрлуулвал ерөнхий өгүүлэмж тэр чигтээ балартах аюултай.

Ингээд хамгийн тод нил ягаан өнгөөр эхэлсэн бидний зургийн аялал мөн адил хамгийн тод хар хөх өнгөөр сүүдэрлэсэн загасны зургаар дууслаа.

Ирэх жил Солонгосын галерейд мөн адил Монгол зураачдын бүтээл давамгайлсан үзэсгэлэн зохион байгуулагдана гэдгийг сонсоход таатай байв.

Б.ОДГЭРЭЛ