Олон улсын гэрэл зурагчдын дунд жил бүр зохион байгуулагддаг “All About Photo” уралдааны 2018 оны шагналтнуудыг өчигдөр зарлажээ.
Уралдааны тэргүүн байранд Их Британий гэрэл зурагчин Тарик Зайдигийн Монгол орны баруун хязгаарт авсан бүтээл шалгарч, $5,000-ын мөнгөн шагнал хүртэхээр болсон байна.
“All Secure” гэж нэрлэсэн уг бүтээлд Казах өндөр настан анч бүргэд, ач хүүтэйгээ морины нуруун дээр байгаагаар дүрслэгджээ.
1940 оны аравдугаар сарын энэ өдөр домогт “Beatles” хамтлагийн гишүүн Жон Леннон төрсөн юм. Тэрээр Английн рок хөгжимчин, дуучин, ая зохиогч, дэлхийн энхтайвныг дэмжигч байсан бөгөөд Битлз хамтлийн гишүүн болон үүсгэн байгуулагчдын нэг байсан юм. Хамтлагийн гишүүн Пол Маккартнитай нийлж дуу бичиж байсан нь 20-р зууны шилдэг ая, дуу бичих хамтрагчид болгоход хүргэсэн ба түүгээр зогсохгүй, рок-н-роллын түүхэнд дэх хамгийн нэр алдартай дуунуудыг бичжээ. Леннон зөвхөн дуу хөгжмөөр зогсохгүй ном, кино, дэлхийн энхтайван гээд олон салбарт өөрийнхөө нэрийг бичиж үлдээжээ. 1970 онд алдарт Битлз хамтлаг тарсны дараа Леннон ганцаараа уран бүтээлээ туурвиж, өөрийн байр сууриа цааш авч явсан хэдий ч удалгүй эцгийн үүргээ биелүүлхээр уран бүтээлээсээ хэсэг хөндийрчээ. Хэсэг хугацааны дараа Леннон дахин уран бүтээл туурвихаар Дабл Фантази цомог гаргасан юм. Цомог худалдаанд гарснаас хойш нэг сарын дараа буюу 1980 оны 12 сарын 8-нд Марк Дэвид Чэпмэн гэгчид буудуулан нас баржээ. Тэгсэн хэдий ч Дабл фантази цомог 1981 онд хөгжмийн дээд шагнал болох Грэммигээс оны шилдэг цомгийн шагналыг авч чадсан юм. Тэрээр хэрвээ амьд байсан бол одоо 78 настай байх байжээ. Түүний сая, сая шүтэн бишрэгчид Жон Ленноныг одоог хүртэл дурссаар л байна.
Жон Леннон Японы авангард зураач Иоко Онотой Лондонд танилцжээ. Тухайн үед түүний ирээдүйн эхнэр Иоко Оно-ийн “Дуусгаж амжаагүй бүтээл” нэртэй уран зургийн үзэсгэлэн гарч байсан аж. Жон тэр үед эхнэртэй байсан ч япон бүсгүйд татагдаж, харин Йоко Оно хариуд нь зүгээр л дотно харьцаатай байхыг л Леннонд санал болгосон байна. Гэвч тэдний харьцаа анд нөхдийнхөөс илүү гүнзгийрч 1969 оны 3 дугаар сарын 20-нд Жон эхнэр Синтия, хүү Жулиан нараа орхин Йоко Онотой албан ёсоор хуримаа хийжээ. “Иокотой нэг ч үг солиогүй хэрнээ түүн рүү яг л төмрийн үртэс соронзонд наалдахтай адил татагдаж, өөрийгөө салгаж чадаагүй” хэмээн хожим нь дурссан байдаг. Ийнхүү гурван жилийн турш Иокотой дотно харилцаатай байх үедээ Жон Леннон оргил бүтээлүүдийн нэг болох “Made love at down” бүтээлээ гаргаж байсан юм. Бал сараа дэлхийн хамгийн дээд зэрэглэлийн зочид буудал болох Амстердамын Хилтон зочид буудалд өнгөрүүлсэн бөгөөд тэдний бал сар түүхэн дэх хамгийн хачирхалтай бал сар байсан гэгддэг. Жон, Иоко хоёр Монреалийн “Queen Elizabeth” зочид буудлын өрөөнд найман өдрийн “ Энх тайвны төлөөх хэвтээ жагсаал”-аа эхэлсэн байна. Иокогийн сэдсэн “Орон доторхи үзүүлбэр” нь сурвалжлагчдын сонирхлыг маш их татсан юм. Тэд, хоёр хүний өргөн орон дээр гэрийн халаадтай хэвтэж дэлхийд энх тайвныг хэрхэн сахиулах талаар, өөр бас бус зүйлийг нухацтай ярьцгааж байжээ. Энэ үеэр Ленноны амнаас бараг анх удаа л нэлээд хариуцлагатай, ухаалаг, цэгцтэй vгс гарч байсан гэдэг. Энэ өвөрмөц “хэвлэлийн бага хурал”-ыг кино хальсанд буулгахад, Ленноны тэр өрөөнд зохиосон “Give Peace A Chance” дуу нь давхар бичигдэн үлдсэн байна. Хожим нь бичлэгийг бага зэрэг янзлаад сингл гаргасан нь Их Британи, Америкийн хитэд дээгүүр байрыг эзэлжээ. Одоо ч энэ дууг дайны эсрэг жагсаал цуглаанд их ашиглаж байгаа билээ. Амьдралын хэмнэлийн их өөрчлөлт, аз жаргалыг мэдэрч эхэлснийхээ дараа тэрээр Жон Уинстон Леннон гэсэн нэрээ Жон Оно Леннон болгож өөрчилсөн аж. Түүхэнд эхнэрийнхээ нэрний хэсгээс авч нэрээ ингэж өөрчилсөн алдартан түүнээс өөр байдаггүй билээ. Жон Иокод зориулж олон дуу зохиосон нь бүгд л хит болж байв. Зарим нэг клиптээ эхнэртэйгээ хамтран тоглож байсан юм.
Жон Леннон: “Би хамтлагийнхандаа бид бурхнаас ч илүү алдартай болно гэж хэлсэн. Тэр нь ч биелсэн”.
“Би заримдаа тайзан дээр гараад боддог юм. Энэ бүхэнд хэрхэн хүрсэн
тухайгаа… мөн яг одоо бодит байгаа нь үнэхээр гайхалтай гэж үргэлж баярладаг”
хэмээн хэлсэн байна.
“Амжилттай эр хүний ард үргэлж ухаалаг бүсгүй байдаг”
“Би алдартай байж болно. Гэхдээ Оно бол миний цорын ганц багш. Би түүнээс маш ихийг сурдаг сурагч нь л гэсэн үг”
“Хайр бол яг л мод шиг. Үндэс сайтай байх юм бол цас шуурга, бороо аянганд ч үлдэж улам ногоорон ургадаг. Иоко бид хоёрын хайр яг л мод шиг. Би түүнийхээ ундаалах ус, гэрэлт нар. Харин тэр миний хөрсөнд дэлбээлэх хайрын ургамал”
“Би бусдад Йоко Жон хоёр бол яг л салхи. Хэнд ч харагдахгүй, гэхдээ тэд дэргэдүүр нь өнгөрөхөд модод найгана гэж хэлэхийг, үзүүлэхийг хүсдэг”
“Иокотой нэг ч үг солиогүй хэрнээ түүн рүү яг л төмрийн үртэс соронзонд наалдахтай адил татагдаж, өөрийгөө салгаж чадаагүй”
“Нэг зүйл нөлөөлсөн гэвэл тэр гарцаагүй Йоко. Тэр миний зүрх сэтгэлд үргэлж нуугдан байсан өөрийг минь нээн гаргасан. Үүнээс өмнө надад нэг л зүйл дутуу, хоосон, хөндий санагддаг байсан. Харин тэр…Йоко… Гайхмаар хэрэг шүү”
“Би Йокотой хамт насан туршдаа амьдрахыг хүсэж байгаа ч үхлээс айхгүй байна. Үхэх мөчид юу мэдрэхээ хэлж чадахгүй ч би итгэхгүй байгаа учраас түүнд бэлэн байна. Яг л нэг машинаас буугаад өөр машинд суухтай л ижил юм уу даа”
Домогт Жон Ленноны “Imagine” буюу “Төсөөл дөө”. 1971 онд гарсан энэ дуу Жон Леннон хүсэн мөрөөдөж буй төгс төгөлдөр ертөнцөө ямархан байж болохыг “төсөөлөн” дуулсан өгүүлэмжтэй юм. Үгийг нь зохиохдоо гэргий Йоко Оно-гийнхоо “Бэрсүүт жүрж” хэмээх яруу найргаас санаа, хэлбэрийг нь авсан аж.
Монголын театрын нэрт төлөөлөгч зохиолч, найруулагч, нийгэм соёлын нэрт зүтгэлтэн Төрийн шагналт, Ардын жүжигчин Э.Оюуны 100 жилийн ойд зориулсан “Би эндээс явахгүй” уянгын драмын жүжиг Улсын Драмын Эрдмийн театрын тайзнаа 10 сарын 6,7, 12,13,14-ны өдрүүдэд дахин тоглогдох гэж байна.
Мэс заслын сайн эмч Дорлиг гэргий Дулмаагийн хамтаар аз жаргалтай сайхан амьдарч байна. Гэвч тэрбээр нэг эмнэлэгт хамт ажилладаг бага эмч Сэржмаатай сэтгэлийн нууц холбоотой болсноор түүний амьдралын ээдрээт үе эхэлнэ. Итгэж хайрлаж байсан хань нь сэтгэл урвасанд гомдсон Дулмаа бүсгүй эр нөхөртөө хэлж амжаагүй нууцаа хадгалсаар түүнийг орхин явахаас өөр аргагүйд хүрэв. Он цаг, жил сар улиран өнгөрсөөр хэдийнэ арав гаруй жил өнгөрсөн ч хувь тавилан нэг л өдөр Дорлиг, Дулмаа хоёрыг дахин уулзуулах учиртай байжээ. Гэвч тэр үед …
Төрийн шагналт, Ардын жүжигчин Эрдэнэбатын Оюун 1956 онд С.Нинжбадгартай хамтран бичсэн “Би эндээс явахгүй” драм жүжгийн үйл явдал ийнхүү өрнөдөг. Эл бүтээлийг 1959 онд Ардын жүжигчин Б.Лоовойгийн найруулгаар театрт тайзны бүтээл болгон жүжгийн гол дүр Дорлигт жүжигчин А.Цэрэндэндэв, Дулмаад Ардын жүжигчин Ч.Долгорсүрэн, Сэржмаад Ардын жүжигчин Т.Хандсүрэн нар тоглож байжээ.
Харин энэ удаад УДЭТ-ын ерөнхий найруулагч, Төрийн соёрхолт Н.Наранбаатарын найруулгаар Дорлигт Соёлын тэргүүний ажилтан жүжигчин О.Гэрэлсүх, Т.Сэргэлэн, Дулмаад Соёлын тэргүүний ажилтан жүжигчин Н.Баярмаа, Б.Одгэрэл, Сэржмаад Соёлын тэргүүний ажилтан жүжигчин Б.Одончимэг, Ц.Аззаяа нар тогложээ.
Хөгжмийн зохиолч, найруулагч, Монгол Улсын Урлагийн гавьяат зүтгэлтэн Л.Балхжавын “Миний дуунууд” тоглолтын 20 жилийн ойн энэ жил тохиож байгаа билээ. Энэхүү ойн тоглолт аравдугаар сарын 26, 27-нд “UB Palace”-ын концертын их танхимд болохоор товоо зарласан.
Харин өнөөдөр “Миний дуунууд-20 жил” тоглолтын хэвлэлийн хурал МУЭ-ийн Арт галерейн “Best Art” танхимд боллоо. Уран зургийн танхимд тоглолтын хэвлэлийн бага хурлаа хийсэн ч учиртай аж. Үзэсгэлэнгийн танхимд өнгөрсөн 20 жилийн турш тасралтгүй эгшиглэсэн “Миний дуунууд” тоглолтын гэрэл зургийн цомгийг дэлгэн цаг хугацаагаар аялууллаа. Түүнчлэн үзэсгэлэнд их урлагт 45 жилийг зориулж буй хөгжмийн зохиолч Л.Балхжавын дурсамжит гэрэл зургууд, амьдрал, уран бүтээлтэй холбоотой сонирхолтой үзмэрүүдийг дэлгэжээ.
“Урлагийн хот-Улаанбаатар” төслийн хүрээнд Н.Мандалын зохиол “Нууцын эрэлд” хүүхдийн жүжгийг энэ сарын 26-наас эхлэн Улсын Хүүхэлдэйн театрын тайзнаа үзэгчид, хүүхэд багачуудад толилуулна.
Энэхүү жүжиг нь Монгол ардын мартагдаж буй соёлын өв болох оньсого, тааврыг түгээн дэлгэрүүлэх, уламжлуулан үлдээх зорилгоор бичсэн төдийгүй Нийслэлийн Соёл, урлагийн газраас хэрэгжүүлж буй уг төслийн хүрээнд хүүхдэд зориулсан “Шилдэг зохиол” шагналыг хүртсэн юм.
Жүжгийн баатруудыг урьдчилан танилцуулах зорилгоор Монгол Улсын Хүүхэлдэйн театрын хамт олон 20 ангит комик зохиол бичиж эрхэм уншигч, хүүхэд багачуудад толилуулж буй.
Дашрамд дуулгахад “Урлагийн хот-Улаанбаатар” төслийн санаачлагчаар Нийслэлийн Соёл, урлагийн газар, сэнхүүжүүлэгчээр Нийслэлийн Засаг даргын Тамгын газар, хэрэгжүүлэгчээр Монгол Улсын Хүүхэлдэйн Театр, хамтран ажиллагчаар Нийслэлийн Боловсролын газар, Нийслэлийн Хүүхэд, гэр бүлийн хөгжлийн газар, есөн дүүргийн Засаг даргын тамгын газар ажиллаж байгаа юм.
Mongolia”s Next Top Model” шоуны хоёрдугаар улирлын эхний дугаар өчигдөр үзэгчдэд хүрч эхэллээ. Шоутай холбоотой шинэ мэдээлэл хүргэхэд, тус “Mongolia”s Next Top Model”-ын анхны ялагч, загвар өмсөгч Б.Цэрэндолгор өнгөрсөн баасан гаригт /2018.10.05/ Сингапур улсыг зорилоо.
Өнгөрсөн жил болсон нэгдүгээр улирлын шалгаруулалтад түрүүлснээр Б.Цэрэндолгор 20 сая төгрөг, Парис хотоор аялах эрхээр шагнуулснаас гадна Сингапурын “Looque” загварын агентлагтай хоёр жилийн хугацаатай гэрээ байгуулан ажиллах эрхтэй болсон юм.
Шоуны шүүгч Норагийн тайлбарласнаар өмнө нь үсчний алдаанаас болж загвар өмсөгч бүсгүйн үсний эрүүлжиж ургах хугацааг хүлээсээр өдийг хүрсэн байна. Ингээд “Looque” агентлагтай хамтран ажиллахад шаардлагатай нөхцөл, тохироо бүрдсэн тул Цэкү хилийн дээс алхлаа.
Чансаатай хөгжмийн бүтээлийг улсын санд худалдан авахаар болж, Соёл урлагийн газар бүтээлүүдийг хүлээн авч эхэлсэн байна. Бүтээлүүдийг аравдугаар сарын 22-н хүртэл хүлээн авах аж.
Хөгжмийн зохиолчид сүүлийн гурван жилийн хугацаанд туурвисан томоохон бүтээлүүдээ тус газарт аудио, видео бичлэгийн хамт хүргүүлэх боломжтой. Бүтээлүүд нь мэргэжлийн урлагийн байгууллагын тайзнаа тоглогдсон, “Алтан намар”, хөгжмийн наадамд шалгарсан байх зэрэг шалгуур тавигдаж байна.
Соёл урлагийн газар нь өнгөрсөн онд Ц.Эрдэнбатын төгөлдөр хуур, симфони найрал хөгжимд зориулсан гурван ангит концерт, Төрийн шагналт хөгжмийн зохиолч Т.Соронзонболдын үндэсний найрал хөгжимд зориулсан дөрвөн ангит бүтээл, Б.Энхбаярын Оршихуйн үнэн симфони найрал хөгжимд зориулсан концерт, Д.Ариунболдын Нөмөр хадны дууль зэрэг бүтээлүүдийг улсын санд худалдан авчээ. Эдгээр хөгжмийн бүтээлийг 39 сая төгрөгөөр үнэлсэн байна.
Олон улсын бялуу урлаачдын “Scandinavian cake show 2018” тэмцээн Швед улсад 13 дахь удаагаа есдүгээр сарын 28-29-ний өдрүүдэд зохион байгуулагдаж өндөрлөжээ. Тус тэмцээнд Монголын бялуу урлаач Н.Мөнхжаргал анх удаа оролцон нэгдүгээр байр эзэлсэн байна.
Тэрээр хуримын бялууны төрөлд оролцон үзэгчдээс хамгийн их саналыг авсан ажээ. Тус тэмцээнд Дани, Норвеги, Финлянд, Швед зэрэг Скандинавын орнуудын бялуу урлаачид өргөнөөр ирж оролцдог юм байна.
Н.Мөнхжаргал нь 2016 онд Швед улсад талх нарийн боов болон торт урлаачийн мэргэжил эзэмшиж, одоо тус улсад мэргэжлээрээ ажилладаг юм.
Үндэсний мэдээллийн агентлаг МОНЦАМЭ, Монголын гэрэл зурагчдын нэгдсэн холбоо, Үндэсний брэндийн бодлогын зөвлөлтэй хамтран “Өнөөдрийн Монгол” төслийг аравдугаар сарын 8-15-ны хооронд хэрэгжүүлэх гэж байна.
Энэхүү төслийн зорилго нь гадаад, дотоодын хэвлэл мэдээллийн гэрэл зурагчдаар дамжуулан энэ цагийн Монгол орныг олон улсад сурталчилан таниулах, гадны хэвлэл мэдээллийн архив дахь Монгол Улсын тухай гэрэл зургийг шинэчлэх, өргөжүүлэх, эерэгээр харуулах гэж зохион байгуулагчид нь мэдээллээ.
Тус арга хэмжээнд ОХУ-аас “Итас Тасс”, “Риа Новости”, БНХАУ-аас “Xinhua”, Японоос “Kyodo News”, БНСУ-аас “Korean central”, Германаас “DW”, Монголын хэвлэлийн гэрэл зурагчид оролцох бөгөөд Улаанбаатар-Дархан-Уул-Орхон-Өмнөговь аймгийн чиглэлд танилцах аялал хийж, зураг авах аж.
Ингээд аяллын гэрэл зургуудаараа 10 дугаар сарын 14-нд Уран зургийн галлерейд “Өнөөгийн Монгол” тайлант үзэсгэлэн гаргах юм байна.
“The Voice Of Mongolia” шоунд алдарт “Түүнд би хайртай байсан” дуугаараа оролцсон дуучин Б.Цогтдэлгэр энэхүү дуугаараа нэрлэсэн тоглолтоо хийх гэж байна.
Дуучин Б.Цогтдэлгэр нь анх Эрдэнэт хотын “Уурхайчин” Соёлын Ордны дэргэдэх дуу хөгжмийн “Кумо” хамтлагаас уран бүтээлийн гараагаа эхэлж, 1991 онд СУИС-д Дуурийн дуулаачийн мэргэжлээр суралцаж, 1993 онд Монголын рок попын 20 дугаар зууны Манлай “Соёл-Эрдэнэ” хамтлагт гоцлол дуучнаар ажиллаж байжээ.
“Соёл-Эрдэнэ” хамтлагт дуулсан он жилүүдийн дараагаар, бие даасан уран бүтээлээ эхлүүлж, дуугаа дуулахын зэрэгцээ 100 гаруй дууны бүтээл туурвиж хөгжмийн зохиолчийн хэмжээнд үнэлэгдэх олон арван дуунуудыг зохиож, дуунуудыг нь Монголын рок поп, сонгодог, нийтийн урлагийн олон ч дуучид дуулж, амилуулсаар байна.
Дуучин Б.Цогтдэлгэр 1997 онд УДБЭТ-т “Хол нар” анхны тоглолтоо хийсэн бол 2005 онд МУ-ын “Морин хуур”-ын чуулгатай “Хайраа би” тоглолт, 2007 онд УФ-ийн Симфони найрал хөгжмийн оркестртой хамтран “Мөнх тэнгэрийн нутаг” тоглолт, 2008 онд “Түүнд би хайртай байсан” тоглолтоо тус тус толилуулжээ. Харин энэ удаагийн тоглолт нь дуучин Б.Цогтдэлгэрийн урлагт зүтгэсэн 30 жилийн ойн хүндэтгэлийн тоглолт гэдгээрээ онцлог бөгөөд 10-р сарын 5-нд 19:00 цагт “АСА” Циркийн тайзнаа болох аж.
Тоглолтод дуучин Б.Цогтдэлгэр өөрийн анхны дуулсан “Түүнд би хайртай байсан”, “Хол нар”, “Алдаж онодог заяа”, “Мөрөөдөл” зэрэг дуунуудаа дуулахаас гадна ард түмний сонсох дуртай дурсамжит дуу уран бүтээлүүдийг толилуулах юм байна.
Тоглолтод, дуучин П.Хэрлэн, “Сүнс” хамтлаг, “Out Law” хамтлаг, УДБЭТ-ын голцлол дуучин Г.Энхнаран, “Universe Best Songs-2016” наадмын Гран-При шагналт дуучин Ц.Шинэбаяр, “My Voice” наадмын Гран-При шагналт дуучин Хосбаяр, дуучин Т.Цогсогмаа, “Goodboys”, “Нисванис” хамтлагууд оролцох аж.
