Дэлхийн Банкны Гүйцэтгэх захирлуудын зөвлөл Эдийн засгийн удирдлагыг дэмжих хөтөлбөрийн хоёр дахь шатны санхүүжилт болох 100 сая ам.долларын санхүүжилтийг батлав. Дэлхийн Банкны уг хөтөлбөр нь цуврал бөгөөд 2017 оны араваннэгдүгээр сард эхний хөтөлбөр нь батлагдаж байсан юм. ЭЗУДХ нь өрийн тогтвортой байдлыг сэргээх, нийгмийн хамгааллын тогтолцоог бэхжүүлэх, өрсөлдөх чадварыг сайжруулахад чиглэсэн Монгол Улсын бодлогын шинэчлэлийг дэмжих зорилготой.
Монгол Улсын эдийн засаг 2016 оны макро эдийн засгийн хүндрэлээс амжилттай гарч чадсан ч суурь эмзэг асуудлууд хэвээр байсаар байгааг тус банкнаас мэдээлэв. Эдийн засгийн өсөлт 2016 онд 1.2 хувь байсан бол 2018 онд 6.9 хувь болж өссөн. Төсвийн нөхцөл байдал дорвитой сайжирч, төсвийн алдагдал 2016 онд ДНБ-ий 16.4 хувьтай тэнцэж байсан бол 2018 онд 2.7 хувьтай тэнцэх ашигтай гарсан. Энэ нь улмаар ДНБ-д эзлэх Засгийн Газрын өрийн хэмжээг дээрх хугацаанд бараг 13 нэгж хувиар буурахад нөлөөлсөн. “Энэхүү хөтөлбөрийн хүрээнд дэмжиж байгаа гол бодлогын шинэчлэл нь Монгол Улсын эдийн засгийн тогтвортой өсөлтийг бий болгох, улсын төсөв, санхүүг улам бэхжүүлэх, өрсөлдөх чадварыг сайжруулахад чухал үүрэгтэй. Засгийн газраас дээрх асуудлуудыг шийдэхээр ажиллаж байгаа нь тэдний эдийн засагт бүтцийн шинжтэй өөрчлөлтүүдийг үргэлжлүүлэн тууштай хийх бодлого баримталж байгаагийн тод илрэл юм. Дэлхийн Банк цаашид Засгийн Газар болон олон улсын хөгжлийн түншүүдтэй хамтран Монгол улсын Эдийн засгийг сэргээх хөтөлбөрийг үргэлжлүүлэн дэмжин ажиллах болно” гэж Хятад, Монгол, Солонгос улсыг хариуцсан Дэлхийн Банкны захирал Мартин Рэйзэр онцоллоо.
Монголын Хөрөнгийн биржид бүртгэлтэй ХК-иуд нь хуулийн дагуу хагас жилийн санхүүгийн тайлангаа долдугаар сарын 20-ны дотор ирүүлэх үүрэгтэй. Дээрх хугацаанд нийт бүртгэлтэй 199 ХК-иас 76 нь санхүүгийн тайлангаа ирүүлээд байна. Хуульд заасан хугацаанд үүргээ биелүүлээгүй буюу хагас жилийн санхүүгийн тайлангаа ирүүлээгүй ХК-иуд наймдугаар сарын 1-ний өдрийн дотор зөрчлөө арилгаагүй тохиолдолд Монголын Хөрөнгийн бирж (МХБ) болон СЗХ-ны холбогдох журмууд болон “Бүртгэлийн гэрээ”-нд заасны дагуу хариуцлага ногдуулах юм. Хөрөнгийн биржид бүртгэлтэй ХК-иуд Үнэт цаасны зах зээлийн тухай болон Нягтлан бодох бүртгэлийн тухай хуулийн дагууолон нийтэд нээлттэй, ил тод байх компанийн засаглалын сайн жишгийг хангаж, тайлангаа хүргүүлсэн байх ёстой аж. 
Монголын хөрөнгийн бирж өнөөдөр өдөр I, II, III ангиллын 23 хувьцаат компанийн 75,249,793 төгрөгийн үнийн дүн бүхий 504,867 ширхэг хувьцаа арилжигдсан байна. Үүнээс 9 хувьцаат компанийн хувьцааны ханш өсч, 13 хувьцаат компанийн хувьцааны ханш буурсан бол 1 компанийн хувьцааны ханш тогтвортой байлаа. Үүнээс “Монгол Базальт” ХК (MBW+12.95%) болон “Монгол Савхи” ХК (UYN+6.67%)-ийн хувьцааны ханш хамгийн өндөр өсөлттэй байсан бол “Өндөрхаан” ХК (ONH-14.75%) болон “Монгол Шуудан” ХК (MNP-7.50%)-ийн хувьцаа хамгийн их уналттай байлаа. “TOP 20” индекс 0.12 хувиар өсч, 20661.2 нэгжид хүрсэн бол зах зээлийн үнэлгээ 2,572,608,050,371.13 төгрөг боллоо.
