Монголын залуучуудын холбоо, Залуучуудын хөдөлмөрийн төв биржээс бүтээн байгуулалтын салбарт ажиллах гадаад ажилчдын тоог бууруулах, Монгол залуусаа эх орныхоо бүтээн байгуулалтанд гар бие оролцож, ажилтай орлоготой болгох зорилготой “Бүтээн байгуулалт” хөдөлмөрийн яармагийг зохион байгуулдаг уламжлал тогтсон билээ.
Энэ жилийн хөдөлмөрийн яармаг “Бүтээн байгуулалт-2015” нэртэйгээр өнөөдрөөс эхлэн МЗХ-ны “Залуус” танхимд зохион байгууллагдаж байна. Тус хөдөлмөрийн яармагт уламжлал ёсоор уул уурхай, үйлдвэрлэл, хөдөө аж ахуй, зам, барилга зэрэг бүтээн байгуулалтын салбарынхан оролцож байгаа бөгөөд ажил олгогч байгууллагуудын хүсэлтээр хүрээгээ тэлж аялал жуулчлал, худалдаа үйлчилгээний салбарууд оролцож байна.
2015.03.28-нд МЗХ-ны V их хурлаар Засгийн газраас хэрэгжүүлж буй бүтээн байгуулалтын ажлуудад Монгол залуучуудаа нэн тэргүүнд авч ажиллуулах талаар шаардлага хүргүүлсэн билээ. 2013, 2014 онуудад хийсэн судалгаагаар 21 аймаг, 9 дүүрэгт бүтээн байгуулалтын салбарт ажиллах сонирхолтой 16.000 /арван зургаан мянга/ гаруй залуучууд байна. Эдгээр залуусыг сургаж, бэлтгэн энэ салбарт ажлын байраар хангах бүрэн боломжтой.
Энэ удаагийн хөдөлмөрийн яармагт Тэдмэнт констракшн, Эко констракшн, Эсто ХХК, Нэмэх Трейд ХХК, Туушин ХХК, Цогц Шийдэл ХХК, Скай Резорт ХХК, Сод Монгол групп, Тэсо корпораци, Бест буйдан, Шунхлай групп, Арж капитал зэрэг ажил олгогч байгууллагууд оролцож, 600 орчим нээлттэй ажлын байр залуусыг хүлээж байна.