Өнөөдөр Сүхбаатарын талбай дээр “Бүрэн цутгамал” компанийн захирал Б.Батдэлгэрхоёр хүний хамт ирж, эсэргүүцлээ илэрхийллээ. Тэрээр Нийслэлийн ерөнхий төлөвлөгөөний газрын хууль бус ажиллагааг эсэргүүцэн төв талбайд “Бид цалингаа авмаар байна”, “Бид “Сант” сургуулийн өргөтгөлийн барилгын ерөнхий гүйцэтгэгчид”, “Ерөнхий гүйцэтгэгч “Бүрэн цутгамал” ХХК-ийг оролцуулан Улсын комисс дахин ажиллахыг шаардаж байна” гэх үгс бичсэн самбаруудыг тавьсан байв.
Уг нь тус компанийн зүгээс 30 хүнтэй жагсаал хийнэ гэж байсан боловч гурван хүн иржээ. Юуны учир ийн талбай дээр ирж эсэргүүцлээ илэрхийлэх болсныг нь тодруулахад “Бүрэн цутгамал” компанийн захирал Б.Батдэлгэр: “Нийслэлийн хот төлөвлөлт, ерөнхий төлөвлөгөөний газар, Барилга байгууламжийн хяналтын хэлтсийн дарга Эрдэнэтуяа тэргүүтэй төрийн албан хаагчид барилга байгууламжийг байнгын ашиглалтанд хүлээн авахдаа “Монгол Улсын барилгын тухай хууль”, Засгийн газрын 105 дугаар тогтоол, Барилга байгууламжийг ашиглалтад хүлээн авах дүрэм зэргийг удаа дараа зөрчсөн. Манай “Бүрэн цутгамал” компани 2012 онд “Сант” сургуулийн өргөтгөлийн барилгын нийт ажлын 80 гаруй хувийг хийж гүйцэтгэсэн. Гэтэл “Сант” сургууль санхүүжилтийн 500 гаруй сая төгрөгийг олгоогүй. Бүр биднийг ажлын талбайгаас хөөж явуулсан. Манай компанийн зүгээс энэ асуудлаар Иргэний шүүхэд хандсан. Гэвчбуцаагаад Эрүүгийн хэргийн шүүхээс надад гурван зүйл ангиар эрүүгийн хэрэг үүсгэсэн гэж тайлбарлаад байгаа юм. Тиймээс үүнийг эсэргүүцэн ажилчдынхаа хамт Сүхбаатарын талбайд ирж эсэргүүцлээ илэрхийлж байна” гэв.
Б.ОДГЭРЭЛ