Америкийн үндэсний сагсанбөмбөгийн лигийн бүх оддын тоглолт ирэх сарын 18-нд Лос анжелос хотын Стаплэс цэнтрт хөшгөө нээнэ. Бөмбөрцгийн шилдэг сагсчид хуран чуулдаг энэхүү шоу нь хөгжөөн дэмжигч болон тоглогчдын хувьд жилийн хамгийн чухал өдөр билээ. Уг сагсанбөмбөгийн шоу үзүүлбэрийн хамгийн гол тоглолт нь өнөө цагийн шилдэг сагсчдын тулаан юм. Өмнөх жилүүдэд өрнө, дорно бүсээрээ хуваагдаж ширүүн тулааныг хийдэг байсан бол энэ жил дүрэмд нь маш том шинэчлэл хийгдсэн.
Бүс бүрээс багийн ахлагчдыг сонгосон бөгөөд өрнөдөөс алтан мужийн дайчдын холбогч Стефан Карри, дорнодоос морьтон цэргүүдийн лидэр Лэброн Жэймс нар тодорсон юм. Мөн гарааны тамирчдын нэрс эцсийн байдлаар тодорхой болсон.
Өрнөд бүсээс пуужингуудын ахлагч сахалтай нэгэн гэгддэг Жэймс Хардэн, алтан мужийн дайчдын шилдэг Дурантула, Пэликансын мангас хөмсөг Дэвис багийн анд Дэмаркуз Казинсын хамт тус тус өрсөлдхөөр болсон. Харин өнгөрсөн жилийн үнэ цэнэтэй тоглогч Рассэл Вэстбрүүк гараанд сонгогдож чадаагүй юм.
Дорнод бүсээс канадын үлэг гүрвэлийн толгой Дэмар Дэрозан, болдоггүй амтай 76-ийн төв Жоэл Эмбийд, грек мангас гэгдэх хүчирхэг Гианнис болон анкл дрю Кайри Ирвинг тус тус сонгогдсон. Харин сэлгээний тоглогчдыг дасгалжуулагч, тоглогчид сонгох юм. Мөн хоёр багийн ахлагчид бүс хамаарахгүй өөрийн багийн хамтрагчдаа сонгох боломжтой билээ.
БҮХ ОДДЫН ТОГЛОЛТЫН ӨМСГӨЛ
Тус шоунд рүүкий, сохмор тоглогчдын тоглолт болон ур чадварын тэмцээн, слам данк, гурвын зайн шидэлтийн тэмцээн болдог. Манай сайт энэхүү тэмцээнүүдэд оролцох тамирчдыг цаг тухай бүрт нь танилцуулах болно.
Б.АМАРТҮВШИН