Болгарын TVN сувгийн эрэн сурвалжлахын сэтгүүлч Викториа Маринова бусдын гарт амиа алджээ. Орон нутгийн цагдаагийнхан Русе хотын Дунай голын ойролцоох цэцэрлэгээс бүсгүйн цогцсыг олсон байна. Бүсгүйг хүчиндэж дараа нь аминд нь хүрсэн гэж Дотоод явдлын яамны сайд Младен Маринов мэдэгдсэн байна. Цагдаагийнхан цэцэрлэгт хүрээлэнгийн хяналтын камерын бичлэгүүдийг шалгаж байгаа аж. Викториа Маринова эрэн сурвалжлах сэтгүүлзүйн шилдэг сэтгүүлчдийн нэг төдийгүй улс төрчдийн увайгүй үйлдлийг дэлгэн тавьдаг зоригтой бүсгүй байсан гэж Болгарын хэвлэлийнхэн дурсчээ. Авилгыг эсэргүүцэн авилга авсан эрх мэдэлтнүүдийн нэрийг айх зүйлгүй зарладаг байсан Викториа Мариновад өс санасан хүний тоог гаргахад ч хэцүү гэнэ. Сэтгүүлч бүсгүйг онц хэрцгийгээр хөнөөсөн гэдгээс өөрийг цагдаагийнхан мэдэгдээгүй байна.
2017 оноос хойш Европын холбооны улсуудын дөрвөн сэтгүүлч бусдын гарт амиа алджээ.