Өмнөд Солонгосын Батлан хамгаалах яам Япон, АНУ болон бусад улстай хамтран Умард Солонгосын баллистик пуужинг илрүүлж, мөшгөн тандах хамтарсан сургуулилалтыг Хавайн эрэгт 8 дугаар сарын 14 хүртэл хийхээ мэдэгдлээ.
Сургуулилалтад Австрали, Канад улсууд мөн оролцоно гэж Өмнөд Солонгосын хэвлэлүүд мэдээлж байна. Умард Солонгосыг баллистик пуужин хөөргөх нөхцөлд авах арга хэмжээг сургуулилах хамтарсан сургуулилалтыг сэргээхээр Япон, АНУ, Өмнөд Солонгосын Батлан хамгаалахын сайд нар өнгөрөгч 6 дугаар сард тохиролцсон. Ийм сургуулилалт 2017 оны 12 дугаар сараас хойш болоогүй байсан юм.
Үүний зэрэгцээ Өмнөд Солонгосын Батлан хамгаалах яам, Умардын пуужин хөгжүүлэлтийн талаарх тайланг даваа гарагт парламентдаа танилцуулжээ. Тайланд өгүүлснээр, Умард Солонгос шингэн түлшээр ажилладаг “Хвасон-17” нэртэй тив алгасагч шинэ төрлийн баллистик пуужингаа ахин хөөргөхөөр пуужингаа хатуу түлшээр сайжруулж байж болзошгүй байна.
Умард Солонгос ийнхүү цөмийн болон пуужингийн хүчин чадлаа нэмэгдүүлж байгаагаас Өмнөдийн засгийн газар Япон болон АНУ-тай хамтын ажиллагаагаа бэхжүүлэх хүчин чармайлтаа эрчимжүүлж байгаа бололтой гэж олон улсын хэвлэлүүд мэдээлжээ.