1950 онд АНУ-ын Төрийн нарийн бичгийн дарга асан Генри Киссинжер байхдаа Билдербергийн клубийн анхны хуралдааныг хийлгэх саналыг гаргажээ. Удалгүй тус клубын гишүүд болох дэлхийн нөлөө бүхий хүмүүс жил бүр цугларч дэлхий нийтэд тулгамдаад буй асуудлыг хэлэлцдэг уламжлал тогтсон. Гэхдээ уулзалтын талаар олон нийтэд зарладаггүй бөгөөд оролцогсод, гишүүддээ онцгой урилга илгээдэг. Тиймээс хэвлэл мэдээллийнхэн, хөндлөнгийн хүн түүнд оролцоно гэсэн ойлголт үгүй. Хуралдаан аль оронд болно тус улс нь гишүүдийн аюулгүй байдлыг бүрэн хангах үүрэгтэй. Билдербергийн клубийг дэлхийн хувь заяаг шийддэг нууц Засгийн газар ч гэдэг. Нөлөө бүхий хүмүүс уулзаж тулгамдсан асуудлуудыг шийдэх ямар гарц байгаа талаар ярилцаж, санхүү эдийн засгийн байдлыг хамгийн түрүүн хөнддөг.
Тэгвэл “Британника” толинд Билдербергийн клубийг хэрхэн тайлбарласан болохыг сонирхуулъя, “Чуулган нь албан бус, үндэсний болон олон улсын хэмжээнд нөлөөтэй хүмүүс бие биетэйгээ танилцаж, ижил тулгамдсан асуудлыг нөхцөл байдлыг харгалзахгүйгээр ярилцах боломжийг бүрдүүлж өгдөг. Билдербергийн чуулган болгоны дараа албан бус тайлан гаргаж түүнийгээ зөвхөн гишүүддээ хүргүүлдэг” гэжээ. Тус клубийн Олон улсын зохион байгуулах хороо нь жил бүр хэнийг байнгын бус төлөөлөгчөөр сонгохыг шийддэг.
Билдербергийн клубийн гишүүдийн хэдэн хувь нь аль орны иргэнболохыг харуулсан судалгаа
Билдербергийн клубийн гишүүдийн хэдэн хувь нь аль салбарт ажилладаг болохыг харуулсан судалгаа
Билдербергийн клубийн гишүүдийн жил бүрийн хавар болдог уулзалт олны анхаарлыг ихэд татдаг. Алдартай улстөрчид, хаан, хатан хаан, хунтайж, гүнж, Ерөнхийлөгч, Ерөнхий сайд, бизнесмэн томоохон банкны эзэд гээд алдартнууд нэг дор цугларахад сонирхол татах нь аргагүй. Бие хамгаалагч, нарийн бичиг, тогооч нар нь дагалдан ирдэг тул бүр ч сүртэй. Харин уулзалтын талаар ямар ч мэдээлэл алдагддаггүй. Дууссан хойно нь өгч болно хэмээн үзсэн мэдэллийг л олны хүртээл болгодог юм байна.
Тус клубийн төв нь Нью-Йорк хотноо Карнеги сангийн байранд байрладаг, нийтдээ 383 гишүүнтэй. Байнгын гишүүд нь Генри Киссинжер, Дэвид Рокфеллер, Нельсон Рокфеллер, Роберт МакНамара, Дональд Рамсфельд, Збигнев Бжезинский, Алан Гринспен, Ричард Перл, Пол Вулфовиц. Дээр дурдсанчлан байнгын бус гишүүд нь жил бүр солигдох бөгөөд хэнийг сонгохыг тус клубийн дэргэдэх Олон улсын зохион байгуулах хороо шийддэг.
Билдербергийн клуб өнгөрсөн жилийн хуралдаанаа зургадугаар сарын 11-14-ний өдрүүдэд Австрийн Тельфс-Бухен хэмээх үзэсгэлэнтай газар байрлах дээд зэрэглэлийн “Interalpen” зочид буудалд хийсэн. Тэр үеэр ойролцоогоор 140 хүний захиалга өгсөн гэсэн мэдээлэл бий. Арга хэмжээнд 133 гишүүн оролцсоноос 21 нь улстөрч байжээ. Их Британийн Сангийн сайд Ж.Осборн, АНУ-ын Ерөнхийлөгчийн санхүү, эдийн засгийн зөвлөх Лоуренс Бун, Нидерландын Ерөнхий сайд Марк Рютте нар оролцсон гэдэг. Харин ОУВС-ийн тэргүүн К.Лагард байгаагүй нь олны анхаарлыг ихэд татсан байна. Өнгөрсөн жилийн хуралдаанд оролцсон гишүүдээс 106 нь эрэгтэй, 27 нь эмэгтэйчүүд байжээ. Сэтгүүлчид болон ажиглагчид тус клубийн хуралдааны талаар мэдээллийг ашиглаж болно. Гэхдээ хэнээс авсан, тэр гишүүн нь ямар байгууллагад хамааралтай зэргийг олны хүртээл болгохыг хориглодог.
Энэ үеэр “Intrealpen” нь гадны нэг ч хүнд үйлчлээгүй, цагдаагийн бүрэн хамгаалалтад ороод зогсохгүй хамгаалалтын компаниудаас нэмэлт хүч татсан байдаг.
Билдербергийн клуб анх байгуулагдахдаа коммунизмтай хэрхэн тэмцэх асуудлыг гол зорилгоо болгосон юм. Мөн Европ болон Америкийн дээдчүүдийг нэгтгэхийг чухалчилж байсан гэдэг. Өнөөдөр бол дэлхий нийтэд тулгамдсан асуудлуудыг хэлэлцэн шийдэх арга замын талаар ярилцдаг. 2008 онд болсон АНУ-ын Ерөнхийлөгчийн сонгуулийн өмнөхөн Билдербергийн уулзалт дээр Барак Обама, Хиллари Клинтон хоёр хамтран ажиллахаар тохиролцсон гэсэн яриа байдаг. Түүнээс гадна 1974 онд АНУ-ын Ерөнхийлөгч Ричард Никсон, Их Британийн Ерөнхий сайд Маргарет Тэтчер нарыг огцруулах, Югославын хямрал, АНУ Иракт цэргээ оруулах зэрэг асуудлыг шийдэхэд тус клубыг нөлөөлсөн гэдэг.
Маш онцгой гэгддэг тул хүссэн болгоныг гишүүн болгоод байдаггүй. Хэнийг авахыг зохион байгуулах хороо л шийднэ. Уулзалтын үеэр гишүүд нь өөрийнхөө үзэл бодлыг чөлөөтэй илэрхийлдэг бөгөөд дүрэмд нь хэн нэгнийг дагуулж ирэхийг хатуу хориглосон байдаг.
Тэгвэл клубийн гишүүд нь хуралдааныхаа талаар юу гэж ярьдгийг сонирхъё. Тэдний нэгнийх нь хэлснээр тухайн үеийнхээ улс төр, эдийн засгийн асуудлыг хэлэлцдэг гэнэ. Янз бүрийн санал гардаг нь янз бүрийн салбар, янз бүрийн үзэл бодолтой гишүүд байдагтай холбоотой. Харин зарим нь хуралдааныг ямар нэгэн улс орны ашиг сонирхлыг харгалзалгүйгээр хөгжлийнхөө замыг тодорхойлох боломж хэмээн хэлсэн байдаг. Тэгвэл хэний ашиг сонирхлыг харгалзан үздэг юм бэ гэсэн асуултыг нэг бус удаа тавьж байсан.
1954 оны тавдугаар сард Голландын Остербеке хотын “Билдерберг” зочид буудалд болсон Билдербергийн клубийн анхны уулзалт
Билдербергийн клуб, Билдербергийн групп, Билдербергийн чуулган гээд тус тусдаа байдаг боловч үйл ажиллагаа нь хоорондоо нягт холбоотой. “Guardian” сонинд тус клуб ямар чухал үүрэг гүйцэтгэдэг болохыг нэг л өгүүлбэрээр тодорхойлсон байдаг. Түүнийг Их наймын уулзалтаас илүү чухал гэжээ. Зарим хэвлэлд түүний хамгийн гол зорилго нь дэлхийг нэгдсэн нэг Засгийн газартай, нэг зах зээлтэй, нэгдсэн банк зэрэгтэй болгохыг зорьж байгаа хэмээн бичсэн байдаг.
Одоо тэгвэл гишүүдийнх нь хэдэн хувь нь ямар улсын иргэд байдгийг сонирхуулъя. Гишүүдийнх нь 33 хувь нь америкчууд аж. Түүний дараа Их Британи, Франц ордог. Харин ОХУ-аас ердөө ганцхан хүн ордог. Тэр нь эдийн засагч Сергей Гуриев юм.
Эдгээр гишүүдийн хэдэн хувь нь ямар салбарт ажилладаг болох нь уншигчдад мөн л сонин байх болов уу. Үүнээс үзэхэд 31 хувь санхүү, эдийн засгийн салбарт ажилладаг.
Энэ жил Билдербергийн клуб уламжлалт ёсоороо зургадугаар сарын 9-12-нд Германы Дрезден хотын “Taschenbergpalais” зочид буудалд хуралдсан юм. Энэ жилийн хуралдаанд АНУ-ын Төрийн нарийн бичгийн дарга асан Генри Киссинжирээс гадна ОУВС-гийн тэргүүн К.Лагард, “Deutsche Bank”-ийн ерөнхий захирал Жон Крайан, Bloomberg-ийн ерөнхий редактор Жон Миклевтей зэрэг хүмүүс оролцсон байна. Энэ жил Хятад, дүрвэгсдийн асуудал, Ойрхи Дорнодын байдал, ОХУ, кибер аюулгүй байдал, АНУ-ын Ерөнхийлөгчийн сонгууль, өр зэрэг асуудлыг хэлэлцсэн байна. Түүнээс гадна технологийн салбарт гарч буй шинэ дэвшилтэт санааг анх удаагаа авч хэлэлцжээ. Энэ жилийн хуралдааныг Францын удам дагасан язгууртан “АХА” группийн тэргүүн Анри де ла Круа де Кастри удирдан явуулсан байна. Томоохон компанийн тэргүүлэгчдээс гадна “Financial Times”, “The Wall Street Journal” зэрэг дэлхийд нөлөө бүхий хэвлэлийнхний төлөөлөгчид оролцжээ.