МҮБХ-ноос улирал бүр явуулж хэвшсэн “Бөхийн баяр” цуврал таван барилдаан байдаг. Энэ таван барилдаанд улс аймгийн цолтой, аймаг цэргийн цолтой, сумын цолтой, өсвөр бөхчүүдийн, нийтийн монгол шандастнуудын гэсэн таван барилдаан багтдаг билээ.
Тэгвэл “Намар цагийн бөхийн баяр” барилдааны нэг өсвөр бөх болон нийтийн монгол шандастнуудын барилдаан өнөөдөр 14.00 цагаас Монгол бөхийн өргөөнд болох гэж байна.
Мөн Монголын Үндэсний Бөхийн Холбоо, Бридж групп хамтран зохион байгуулдаг “Баянзүрх хайрханы хишиг” барилдаан маргааш буюу аравдугаар сарын 12-ны өдрийн 14.00 цагаас Монгол бөхийн өргөөд болно. Энэ цагийн бөхийн өнгийг тодорхойлж буй улс аймгийн алдар цолтой хүчит 256 бөхийн барилдаан болох бөгөөд үзэгчдээс хагас саятан 2-г, азтан үзэгч 2-г тус тус тодруулах юм байна.
2007 оноос анхлан зохиогдож эхэлсэн Баянзүрх хайрханы хишиг барилдаанд Г.Эрхэмбаяр аварга хоёр удаа түрүүлжээ. Мөн дархан аварга Г.Өсөхбаяр, улсын арслан Д.Азжаргал, улсын заан Б.Соронзонболд, улсын начин Ду.Батбаяр тус тус нэг удаа түрүүлжээ. Харин өнгөрсөн жил улсын харцага Ц.Содномдорж түрүүлж, улсын харцага Н.Батсуурь үзүүрлэсэн байна.