БОАЖ-ын сайд Б.Бат-Эрдэнэ, БОАЖЯамны газар, хэлтсийн дарга нар татварын ерөнхий газрын удирдлагын бүрэлдэхүүнтэй уулзаж, байгалийн нөөц ашигласны төлбөрийн тухай хууль түүний хэрэгжилтийн талаар санал солилцлоо.
ТЕГ-ын дарга Б.Заяабал 2016-2018 онд байгалийн нөөц ашигласны төлбөрийн тухай хуулийн хэрэгжилтийн тухай мэдээлэв. Дээрх онуудад энэ хуулийн хэрэгжилт хангалтгүй буюу 69,7 хувь, төлбөрийн үлдэгдэл 44.1 тэрбум төгрөг байгааг дурдаад, хуулийн хэрэгжилт, тайлан мэдээ, гүйцэтгэлийн ажлыг чанаржуулж, мэдээллийн нэгдсэн системд тулгуурлан ажлаа эрчимжүүлэх шаардлагатайг хэлэв.
Ингэхдээ, тус хуулиар зохицуулагддаг ургамал ашигласны, Ус, рашааны нөөц ашигласны, Ойн нөөц ашигласны, Ан амьтны нөөц ашигласны, газар ашигласны төлбөр түүнд холбогдох мэдээ, мэдээлэл, тайланг нэгтгэж, мэдээллийн нэгдсэн сан үүсгэх шаардлагатайгаас гадна мэдээллийн зөрүүтэй байдлаас үүдэж хууль хангалттай хэрэгжихгүй байгаа аж.
Түүнчлэн “Хур” мэдээллийн систем, төрийн байгууллагууд харилцан мэдээллээ солилцдог жишиг бий болсноор өнгөрсөн онуудад үүсээд буй байгалийн нөөц ашигласны төлбөрийн хуримтлагдсан үлдэгдлийг төлж барагдуулах боломж бүрдэхийг онцлов.
Уулзалтын төгсгөлд талууд хамтарсан ажлын хэсэг байгуулж, байгалийн нөөц ашигласны төлбөрийн үлдэгдэл дүнг төлж барагдуулах ажлыг эхлүүлэхээр болжээ.
Байгалийн нөөц ашигласны төлбөрийн тухай хуулиар иргэн, аж ахуйн нэгж, байгууллагад байгалийн нөөц ашигласны төлбөрийг ногдуулах, түүнийг төсөвт төвлөрүүлэх, тайлагнах, байгалийн нөөц ашигласны төлбөрийн орлогоос байгаль орчныг хамгаалах, байгалийн нөөцийг нөхөн сэргээхэд зарцуулах хөрөнгийн хувь, хэмжээг тогтоохтой холбогдсон харилцааг зохицуулсан байдаг. Хуулийн хэрэгжилтийг хангуулах үүднээс орон нутаг дахь чиг үүргийн байгууллагууд мэдээллээ үнэн зөв ирүүлдэг байх, энэ төрлийн төрийн үйлчилгээг цахимжуулж, мэдээллийн санг нэгтгэх нь үр дүнтэйг хэллээ.
Харин Байгалийн нөөц ашигласны төлбөрийн тухай хуульд заасны дагуу нөөц ашигласны төлбөрийн орлого 2018 онд 86 тэрбум, 2019 онд 94 тэрбум, 2020 онд 112 тэрбум төгрөг болж нэмэгджээ. Хуулийн дагуу жил бүр 25-34 тэрбум төгрөгөөс доошгүй хөрөнгийг байгаль хамгаалах, нөхөн сэргээхэд зарцуулах ёстой аж.