“Улаан тайга” УТХГ-ын байранд Номхон бор, Догшин хар, Гэмшил нэртэй гурван бамбарууш 2021 оны намраас эхлэн амьдарч буй. Эхээсээ төөрч, суурьшлын бүсэд ирж, баригдсан бамбаруушууд тайгад цас орж, газар хөлдсөн үеэр хүргэгдэж ирсэн учраас “Улаан тайга” УТХГ-ын дарга Ж.Төмөрсүх газар ухаж, үүр бэлдэн өвөлжүүлсэн.
Өвлийг нутгийн иргэдийн хандивын хоол хүнс, хамгаалалтын захиргааны ажилчдын хичээл зүтгэлээр давж туулсан бамбаруушнуудад Австралийн амьтан хамгаалах сангаас хавар хоолны мөнгө зургаан сая төгрөг өгсөн. Улмаар тус байгууллагаас эдгээр амьтдыг байгальд нь буцаан тавих зардлыг шийдэж өгчээ. Эх сурвалжийн мэдээлснээр Номхон бор, Догшин хар, Гэмшил гурвыг нүүлгэн шилжүүлэхэд зориулж 60 сая төгрөг төсөвлөсөн байна.
Гурван бамбаруушийг одоо байгаа Улаан тайгын хамгаалалтын захиргааны байрнаас 100 км зайд, нисдэг тэргээр сарын 28-нд зөөвөрлөж, тайгын гүнд тавих юм байна.