Залуучуудын өвлийн Олимпийн II наадамд манайхаас Б.Сумъяа тэшүүрийн төрөлд оролцож, Монгол Улсын өвлийн олимпийн түүхэн дэх анхны алтан медалийг авч ирсэн. Тэрбээр өнөө өглөө “Чингис хаан” олон улсын нисэх онгоцны буудалд газардсан билээ. Түүнийг Монголын үндэсний олимпийн хорооны ерөнхийлөгч Д.Загдсүрэн, дэд ерөнхийлөгч Ж.Хатанбаатар, Ц.Дамдин, Монголын тэшүүрийн холбооны хүндэт ерөнхийлөгч О.Эрдэнэ-Өлзий нар хүлээн авч, хүндэтгэл үзүүлсэн юм.
Буянтогтохын Сумъяагийн гаргасан амжилтыг Монгол Улсын Засгийн газар, Эрүүл мэнд, спортын яам өндрөөр үнэлж, хүндэтгэл үзүүүлэн“Биеийн тамир спортын тэргүүний ажилтан” цол тэмдгээр ЭМСС-ын үүрэг гүйцэтгэгч Ц.Оюунбаатар өнөөдөр шагнаж урамшуулжээ.
Б.Сумъяа нь Монгол Улсын өсвөр үеийн рекорд, насанд хүрэгчдийн улсын рекорд амжилтыг шинэчилэн тогтоосон байна. Эрэгтэй, эмэгтэй тус бүр хоёр нийт дөрвөн тамирчнаас бүрдсэн Үндэсний олимпийн хороодын нэгдмэл 13 баг 1.6 км-т уралдсанаас Б.Сумъяагийн уралдсан баг нэг минут 57 секунд 85 долийн амжилтаар алтан медаль хүртсэн юм.