Author: ОЮУНХҮҮГИЙН ДАШНЯМ

Нийслэлийн цагдаагийн удирдах газрын Урьдчилан сэргийлэх хэлтсийн дарга,цагдаагийн дэд хурандаа Л.Амармөрөнтэй ярилцлаа.

-Өндөржүүлсэн бэлэн байдлын хоёрдугаар зэрэгт шилжээд буй энэ үед нийслэл дэх гэмт хэргийн нөхцөл байдал ямар байна вэ?

-Цагдаагийн байгууллага энэ оны хоёрдугаар сарын 13-ны өдрөөс эхлэн өндөржүүлсэн бэлэн байдалд шилжиж ажиллаж байна. Нийслэлийн хэмжээнд эхний хоёр сарын байдлаар 4405 гэмт хэрэг бүртгэгдсэн нь өнгөрсөн оны мөн үетэй харьцуулахад 761 хэргээр буюу 14.7 хувиар буурсан үзүүлэлт гарсан. 761 иргэн гэмт хэргийн хохирогч болоогүй гэсэн эерэг үзүүлэлт харагдаж байна. Оны эхний хоёр сард үйлдэгдсэн гэмт хэргийг өнгөөр нь авч үзэхэд гэр бүлийн хүчирхийлэл үйлдэх гэмт хэрэг 79 бүртгэгдсэн. Урьд оны мөн үеэс 63 хувиар буурсан үзүүлэлт байгаа. Мөн өмчлөх эрхийн эсрэг буюу хулгайлах, дээрэмдэх гэмт хэрэг буурсан үзүүлэлттэй гарсан.

Үүнээс гадна хүний эрүүл мэндийн халдашгүй байдлын эсрэг гэмт хэрэг 923 бүртгэгдсэн. Энэ 14 хувиар буурсан сайн мэдээ байна.

-Гэмт хэрэг буурсан шалтгаан нөхцөлийг та яаж харж байна вэ. Хөл хорио тогтоогоод байгаа нь нөлөөлж байна уу?

-Цагдаагийн байгууллага Цагаан сарыг угтаж Сар шинэ нэгдсэн арга хэмжээг зохион байгуулсан. Энэ арга хэмжээний үеэр олон нийтэд хулгайн гэмт хэргээс сэргийлэх мэдээ мэдээлэл хүргэх ажлуудыг цахим орчинд түгээх ажиллагаа явуулсан. Иргэд өөрсдөө гэмт хэрэг гарахаас урьдчилан сэргийлж барилга байгууламж, эд хөрөнгийнхөө хамгаалалт бэхэлгээг сайжруулсан байна. Орчин үеийн дэвшилтэт техник технологид нийцүүлж шаардлага хангасан бүтээгдэхүүн хэрэглэдэг болжээ. Камерын хяналтыг сайжруулсан нь гэмт хэргийн гаралт буурахад нөлөөлсөн байна.

Согтуугаар үйлдсэн гэмт хэрэг мөн буурсан үзүүлэлттэй байгаа. Гэмт хэргийн илрүүлэлт ч өссөн.

Оны эхний хоёр сард 12786 хүн эрүүлжүүлэгдсэн нь мөн буурсан үзүүлэлт харагдаж байна.

-улсын онцгой комиссын шийдвэрээр бар, караоке зэрэг архи согтууруулах ундаагаар үйлчилдэг газруудын үйл ажиллагааг түр хугацаанд зогсоох шийдвэр гаргаад байна. Энэ нь гэмт хэрэг зөрчлийн дуудлага мэдээлэлд яаж нөлөөлж байна вэ?

-Хоёрдугаар сараас л Улсын онцгой комиссын тушаал шийдвэр хэрэгжиж эхэлсэн. Хоёрдугаар сард гэмт хэрэг зөрчлийн дуудлага мэдээлэл өмнөх оны мөн үеэс 10 орчим хувиар буурсан үзүүлэлт гарсан.

Олон нийтийг хамарсан арга хэмжээ зохион байгуулахад дагаад хэрэг зөрчил өсөх хандлагатай байдаг. Хөл хорио тогтоож, хөдөлгөөн татрахад дуудлага мэдээлэл багасдаг.

Оны эхний хоёр сард 34212 дуудлага мэдээлэл бүртгэгдсэн. Дотор нь ангилаад үзэхэд гэмт хэргийн шинжтэй 1547 дуудлага иржээ. Зөрчлийн шинжтэй үйлдлийн дуудлага 28295 бүртгэгдсэн. Энэ нь урьд оны мөн үетэй харьцуулахад 20 дуудлагаар өссөн үзүүлэлт харагдаж байна.

Харин гэр бүлийн хүчирхийлэлтэй холбоотой дуудлага буурсан үзүүлэлт гарсан. Бар, караоке зэрэг аж ахуйн нэгжүүдийн үйл ажиллагааг зогсоосноор иргэдийн архины хэрэглээ буурсантай үүнийг холбож тайлбарлаж болно. Мөн гэр бүлийн хүчирхийлэлтэй холбоотойгоор 1076 хүнд баривчлах ял оногдуулсан нь үүнтэй холбоотой байж болно.

-Гуравдугаар сард манайд коранавирусийн халдварын тохиолдол бүртгэгдэж нөхцөл байдал хурцадсан. Энэ үеэр зорчих хөдөлгөөнийг хязгаарласан. Гэмт хэргийн нөхцөл байдалд хэрхэн нөлөөлөв?

-Он гарснаас хойш гуравдугаар сар гарсаар 23-ны өдрийг хүртэл 27263 дуудлага мэдээлэл бүртгэгдсэн байна. Энэ нь урьд оны мөн үетэй харьцуулахад 7301 дуудлагаар буурсан үзүүлэлт. Гудамж талбайд үйлдэгдсэн гэмт хэрэг зөрчил 871 бүртгэгдсэн. Энэ нь өмнөх оны мөн үеэс буурсан үзүүлэлт. Энэ нь ч хөдөлгөөнийг хориглосонтой шууд хамааралтай гэж харж байна. Хөл хөдөлгөөн хорьж архи согтууруулах ундаагаар үйлчилдэг газруудын үйл ажиллагааг хязгаарлахад гэмт хэрэг, зөрчил буурдаг нь эндээс харагдаж байна. Энгийнээр тайлбарлахад олон хүн цугласан газар хулгайн гэмт хэрэг гардаг. Олон нийт цугласан газар халаасны хулгайн хэрэг бүртгэгддэг. Олон хүн цугласан газар л хэсэг бүлгээрээ архидан согтуурч, танхайрдаг шүү дээ. Карантилахаас өмнө шөнийн Улаанбаатар өдөр шиг хөдөлгөөнтэй байсан. Гурав, дөрөвдүгээр хороолол, Сансар зэрэг газруудаар архидан согтуурсан залуус дүүрэн хашхиралддаг байсан шүү дээ. Улсын Онцгой комиссын шийдвэрээр хөл хорио тогтоосон үед гэмт хэрэг зөрчлийн гаралт буурсан байна.

-улсын онцгой комиссын зүгээс бар, караоке зэрэг газруудын үйл ажиллагааг зогсоосон ч архи согтууруулах ундаа худалдаалахыг хориглосон шийдвэр гаргаагүй. Шийдвэрийн дараа иргэд ахуйн хүрээнд архидан согтуурах явдал их гарсан тухай мэдээлэл байсан. Үүнтэй холбоотойгоор гэр бүлийн хүчирхийллийн хэрэг олон бүртгэгдсэн гэх мэдээлэл байна лээ. Энэ талаар тодруулахгүй юу?

-Гуравдугаар сарын 1-нээс 23-ны хооронд гэмт хэрэг зөрчлийн 2824 дуудлага бүртгэгдсэн. Ахуйн хүрээнд архидан согтуурах дуудлага буурахгүй байна гэх мэдээлэл байгаа. Огцом өссөн, нэмэгдсэн асуудал байхгүй. Зөрчлийн шинжтэй дуудлага өнгөрсөн хоёрдугаар сард 20-иор өссөн үзүүлэлт байгаа.

Гэр бүлийн хүрээнд биш, найз нөхдийн хүрээнд архидсан, хоорондоо маргалдсан бол зөрчлийн шинжтэй дуудлага руу ордог.

Гэр бүлийн эхнэр, нөхөр ахуйн хүрээнд архидаад хоорондоо маргалдаж, сөрөг харилцаа үүсгэсэн бол гэр бүлийн хүчирхийлэл. Хүмүүс үүнийг ялгахгүй гэр бүлийн хүрээнд архидаж хүчирхийлэл үйлдэж байгаа тухай яриад байгаа юм.

Айлд, зочид буудалд хэсэг бүлгээрээ архидсан тохиолдол бий. Гэхдээ хөл хорио тогтоож, согтууруулах ундаагаар үйлчилдэг аж ахуйн нэгжүүдийн цагийн хуваарьт өөрчлөлт оруулснаар архи согтууруулах ундаа хэрэглэдэг хүмүүсийн тоо буурч, гэмт хэрэг зөрчил буурсан.

-Оршин суух тодорхой хаяггүй иргэдийг эрүүл мэндийн үзлэгт хамруулах тал дээр ямар арга хэмжээ авч ажиллаж байна вэ?

-Нийслэлийн Засаг даргын 108, 223, 168, 333 гэсэн дөрвөн захирамжид цагдаагийн байгууллага хяналт тавьж ажилласан. Мөн 345 дугаар захирамж гаргасан.

Уг захирамжийн хүрээнд нийслэлийн хэмжээнд гэр оронгүй, тэнэмэл иргэдийг нийгэмшүүлэх ажил хийж байна.

Цагдаагийн байгууллагын зүгээс нийслэлийн халамжийн газар, эрүүл мэндийн байгууллагууд хамтарч ажиллаж 238 иргэнийг эрүүл мэндийн үзлэг шинжилгээнд хамруулсан. 144 иргэнийг асран хамгаалагчид нь хүлээлгэж өгсөн. Үүнээс гадна нийгмийн хамгааллын тусгай төвд 111 хүнийг хүлээлгэж өгөөд байна. Мөн гэр оронгүй иргэдийн хүлээн авдаг төрийн бус байгууллагуудад 127 хүнийг хүлээлгэж өгсөн.

-Засаг даргын захирамжийн хэрэгжилтэд хяналт тавьж ажиллахад гол төлөв ямар зөрчил дутагдал илэрч байна вэ?

-Засаг даргын А 223 дугаар захирамж мөрдөгдөөд явж байна. Энэ захирамжаар цахим тоглоомын газруудын үйл ажиллагааг гуравдугаар сарын 30 хүртэл зогсоосон. Мөн бар, караоке, фитнесс, бассейн амралтын газар, дэн буудлуудын үйл ажиллагааг зогсоосон. Захирамжийн хүрээнд өдөр тутам хяналт шалгалт тавиад явж байна. Өмнөх захирамжуудтай нийлээд 192 зөрчил илрүүлсэн.

Тогтоосон цагийн хязгаарын зөрчсөн ресторан 31, сүлжээ хоолны газар зургаа, бар найм, караоке зургаа, цахим тоглоомын газар 20, шашны байгууллага нэг бүртгэгдсэн. Мөн нууцаар ажилласан зургаан дэн буудлыг илрүүлсэн.

Илэрсэн зөрчлөөс 26 цахим тоглоомын газрын гэрчилгээг хүчингүй болгох саналыг Харилцаа холбооны зохицуулах хороонд хүргүүлсэн. Архи согтууруулах ундаагаар үйлчилдэг 51 аж ахуйн нэгж байгууллагын тусгай зөвшөөрлийг хүчингүй болгох саналаа нийслэлийн захирагчийн ажлын албанд хүргүүлээд байгаа.

Үүнээс гадна гудамж талбайд нус, цэр шүлсээ хаяхгүй байх 168 дугаар захирамжийн биелэлтэд хяналт тавиад явж байна. Захирамж гарснаас хойш 8886 хүнд 89 сая төгрөгийн торгууль тавьсан.

-Дээрх зөрчлийг хэрхэн илрүүлж байна вэ?

-Хэв журмын цагдаа нарын хяналт болон хяналтын камерын тусламжтайгаар илрүүлж арга хэмжээ авч ажиллаж байна.

Италийн Турин хотод сурч буй оюутан Х.Тэмүүжинтэй тус улсад үүсээд буй нөхцөл байдлын талаар ярилцлаа.

-Европын холбооны улсууд тэр дундаа Италид коронавирусийн халдвар дэгдэж олныг айдаст автуулаад байна. Турин хотод нөхцөл байдал ямар байна вэ?

-Миний хувьд Парма хотод сурдаг. Гэхдээ сая гуравдугаар сарын эхээр тус хотод коронавирусийн тархалт өндрөө авч улаан бүсэд багтсан юм.

Иргэд нь айдас, түгшүүртэй байсан, учраас Туринд ирээд амьдарч байна. Энд хүнсний дэлгүүр эмийн сангаас бусад бүх үйлчилгээний байгууллагуудын үйл ажиллагааг зогсоосон.

Иргэд хүнсний дэлгүүрүүдээр үйлчлүүлэхдээ дугаарлаад л 10, 10-аараа орж худалдан авалт хийж байгаа. Сүүлийн өдрүүдэд өргөн хэрэглээний бараа бүтээгдэхүүний хомсдол үүсээд байна.

Max зарж байгаа дэлгүүр ч тун ховор юм. Гол төлөв гурилан бүтээгдэхүүн л худалдаалж байна. Дэлгүүрээр үйлчлүүлж буй иргэдийн гарыг нь ариутгаж нэг удаагийн бээлий өгч байна.

Гарахдаа бээлийгээ тайлж зориулалтын саванд хаяад гараа ариутгаж байгаа. Дэлгүүр эмийн сангуудад маск алга.

Онлайн дэлгүүрээс л нэг удаагийн маск захиалж хэрэглэж байгаа. Нэг удаагийн маск 50 центээр зарагдаж байсан бол үнэ өсөж 2.5 евро болоод байна.

Нийтийн тээврийн үйлчилгээ хэвийн ажиллаж байгаа. Цөөн тооны хүмүүс л үйлчлүүлж байсан.

-Засгийн газар Эрүүл мэндийн яамнаас нь ямар зөвлөмж гаргаж ажиллаж байна вэ. Гаргасан зөвлөмжийг иргэд дагаж мөрдөх тал дээр ямар байна вэ?

-Ирэх сарын 3-ныг хүртэл карантилаад байна. Сая ерөнхий сайд нь карантиний хугацааг үргэлжлүүлж сунгах талаар мэдэгдэж байна лээ.

Энэ хугацаанд онцын шаардлагагүй бол гадуур явахыг хориглосон. Зарим газруудад гадуур яваад байгаа хүмүүст торгуулийн арга хэмжээ авч байна.

Хэдийгээр карентилаад байгаа ч халдварын тоо өдөрт л 3,500 орчмоор нэмэгдээд байна. Өнөөдөр (өчигдөр) гэхэд 5,000 гаруйгаар нэмэгдсэн.

Халдвар ингэж өндрөө аваагүй байхад эндхийн хүмүүс коронавируст нэг их ач холбогдол өгөхгүй байсан л даа.

Халдварын 10 гаруй мянган тохиолдол бүртгэгдээд байхад л муур, нохойгоо дагуулсан иргэд гудамжаар олон харагдаж байсан. Маск зүүж өөрийгөө хамгаалж байгаа хүн ч байхгүй. Урьдчилан сэргийлэх арга хэмжээ авахдаа хойрго хандсан юм болов уу.

-Коронавирус Италид өндрөө аваад байгаа шалтгааныг өөрсдөө хэрхэн тайлбарлаж байх юм. Ийм цаг үед орон нутгийн хэвлэл юу гэж байна вэ?

-Итали насжилтаараа дэлхийд дээгүүр ордог. Энэ вирус маань ахмад, өндөр настнуудад халтай. Өндөр аваад байгаа нэг шалтгаан нь энэ байх.

Мөн цаг уур байдал нөлөөлж байгаа талаар зарим хэвлэлүүд бичиж байгаа. Энд одоо л дулаарч байна.

Өмнөд Азийн орнуудад коронавирусийн тархалт гайгүй байгааг цаг ууртай нь холбож тайлбарлах хүмүүс ч бас байна. Үүнээс гадна нохой, муур бол италичуудын амьдралынх нь нэг хэсэг. Гэр бүлийн гишүүн шиг ээ авч үзнэ.

Одоо ч гудамжид муур нохойгоо салхилуулсан иргэд олон харагдах юм. Энэ нь ч халдварын тархалтад нөлөөлж байх шиг. Вирусийн тархалттай холбоотойгоор Италийн эдийн засаг ч хүндэрч байгаа талаар хэвлэлүүд бичиж байна.

-Коронавирусийн халдвар авсан өндөр настнууддаа үйлчилгээ үзүүлж чадахгүй орхиж байна гэх мэдээлэл гарсан байсан. Энэ талаар тодруулахгүй юу?

-Ийм мэдээлэл байсан. Нас барж байгаа хүмүүсийн мэдээллийг харахад ихэнх нь 60-аас дээш насныхан байна лээ.

Мөн 2,000 гаруй эмнэлгийн ажилтан коронавирусийн халдвар авсан байсан. Эрүүл мэндийн ажилтнууд, эмч нар ч нас барсан тохиолдол байгаа.

-Италид хэд орчим монгол иргэн байдаг вэ. Хоорондоо холбоотой байна уу?

-Италид 300 орчим монголчууд байдаг. Вирус газар авахад оюутнуудын маань тодорхой хувь нь нутаг буцсан.

Миний хувьд өрөөндөө тавуулаа амьдарч байна. Долоо хоногтоо нэг удаа гарч хоол хүнсээ бэлтгээд л гэрийн хорионд байгаа.

-Европын зарим улсуудад оюутнуудыг байрнаас нь хөөж гаргаж байгаа тухай мэдээлэл явж байсан. Италид яаж байна?

-Энд оюутнуудыг хөөж туугаад байгаа асуудал алга. Гэхдээ дотуур байранд амьдрах эрсдэлтэй. Дотуур байранд 50-60 оюутан гал тогоогоо дундаа хэрэглэдэг.

Гол төлөв Итали оюутнууд амьдардаг. Өнөө хэд нь италичуудтай өдөр тутам харилцаанд орно. Энэ утгаараа бидэнд эрсдэл нэмэгдэж байгаа юм.

-Та бүхний хувьд өөрсдийгөө хэрхэн хамгаалж байна вэ?

-Италийн Эрүүл мэндийн яамнаас гаргасан зөвлөмж гэхээс илүү Монголын Элчин сайдын яамнаас өгч байгаа зөвлөмж болон Эрүүл мэндийн яамнаас гаргасан зөвлөмжүүдийг баримтлаад өөрсдийгөө тусгаарлаад байгаа.

Монголоос гаргаж байгаа зөвлөмж нь илүү үр дүнтэй гэж харж байна.

Монгол газар зүйн байршлын хувьд БНХАУ-тай хөрш ч тархалтын хувьд бага байгаа нь яамнаас гаргасан зөвлөмж, монголчуудын сахилга баттай холбоотой юм болов уу.

-Эрүүл мэндийн тусламж үйлчилгээ хэрхэн авч байна вэ. Ямар хүндрэл тулгарч байна?

-Эрүүл мэндийн үйлчилгээ авахад хэцүү байна. Эмнэлгийн байгууллагуудын ачаалал ч эрс нэмэгдсэн. Хувь хүн эмнэлэг рүү явах нь илүү эрсдэлтэй цаг үе ирчихээд байна.

Гадаад оюутнууд 150 еврогоор даатгал хийлгээд, өрхийн эмчээсээ эрүүл мэндийн үйлчилгээ аваад явдаг. Даатгалтай бол эмчилгээний тухайд ч тодорхой хэмжээний хөнгөлөлт эдэлдэг.

-Азиудыг гадуурхах хандлага байгаа талаар мэдээллүүд гарч байсан?

-Коронавирусийн тархалт Азид дэлгэрээд байхад гадуурхах явдал их байсан. Италийн зарим мужуудад Хятадын дэлгүүр, үйлчилгээний газруудыг сүйтгэх тохиолдол гарч байсан.

Хятадуудыг зодсон асуудал гарсан. Бид нарыг гадуурхаад байгаа асуудал алга.

-Монгол Улсын Засгийн газраас тусгай үүргийн онгоц илгээж иргэдээ татаж байна. Итали дахь монголчуудад хүлээлт байна уу?

-Элчин сайдын яамнаас энд байгаа иргэд рүү холбогдож байна лээ. Элчин сайдын яамнаас хэлэхдээ “Монголд тусгаарлах байр хомс байгаа. Ачаалал их, эдийн засгийн байдал хүнд байгаа талаар мэдэгдэж байсан. Ойрын хугацаанд тусгай үүргийн онгоц Монголоос ирэхгүй” талаар хэлж байна лээ.

Сая тусгаарлагдсан иргэд 14 хоноод байраа чөлөөлнө. Энэ үеэр л бидэнтэй холбогдох юм шиг байна лээ.

Миний орчин тойронд байгаа залуучууд тусгай үүргийн онгоцыг хүлээгээд байгаа зүйл алга. Тусгай үүргийн онгоцонд суух нь энд өөрийгөө тусгаарласнаас илүү эрсдэлтэй гэж үзэж байгаа.

Онгоцонд суухдаа бид нар хэний хажууд суухаа шийдэж чадахгүй шүү дээ. Тусгаарлагдсан 14 хоногт миний биеийн дархлаа өндөр байгаад вирус илрэхгүй байж болно. Ингэж гэр бүлийнхэн ойр дотнын хүмүүсээ эрсдэлд оруулмааргүй байна.

Монголдоо вирус тээж очмооргүй байна. Энд вирусийн дэгдэлт cap орчмын дараа намжина гэсэн тооцоолол байна лээ.

Энэ хугацаанд өөрийгөө тусгаарлаад байх нь зөв шийдвэр гэж харж байна. Тусгай үүргийн онгоцонд суух нь оюутнуудад эдийн засгийн хувьд ч цохилт болж байгаа юм.

Буцах зардалтайгаа нийлээд 4-5 сая төгрөг болж байна лээ. Оюутнуудын тухайд өвчний дэгдэлт гарсан үед ажил хийгээд байх боломжгүй байгаа.

Тээврийн цагдаагийн албаны Урьдчилан сэргийлэх хэлтсийн мэргэжилтэн, цагдаагийн ахлах дэслэгч Ч.Чимэдбаттай ярилцлаа.

-Хөл хорио тогтоогоод буй энэ үед цагдаагийн алба хаагчид ямар зохион байгуулалттай ажиллаж байна вэ?

-Цагдаагийн байгууллага коронавирусээс урьдчилан сэргийлэх чиглэлээр Сар шинийн баярын өмнөөс авахуулаад л өнөөдрийг хүртэл өндөржүүлсэн бэлэн байдалд ажиллаж байна. Цаашдаа ч ажиллах болно. Иргэдийг ая тухтай амьдрах, зорчих нөхцөл бололцоог хангаад 520 орчим алба хаагч үүрэг гүйцэтгэж байна. Мөн төрийн байгууллагын холбогдох ажилчид ч цагдаа нарын хамтаар хөдөлгөөний аюулгүй байдлыг хангах, товчоодоор нэвтрэх үед тээврийн хэрэгслийг шалгах, бичиг баримтыг шалгах чиглэлээр ажиллаж байна.

Иргэдийн зүгээс төрийн албан хаагчийн шаардлагыг биелүүлэхгүй, хүндрэл учруулж байгаа зүйл алга.

-Сар шинийн өмнө хөл хорио тогтооход баталгаат бус, хулгайн замаар иргэд зорчих зөрчил илэрч байсан. Энэ тал дээр ямар хяналт тавьж ажиллаж байна вэ?

-Тээврийн цагдаагийн албан хаагчид хулгайн буюу батлагдаагүй замд хяналт тавьж ажиллаж байгаа. Постоос постын хооронд явж байгаа тээврийн хэрэгслийг шалгахдаа өмнөх постод бүртгүүлсэн байна уу, хэдэн хүн тээвэрлэж байгаа зэрэгт хяналт тавиад явж байна. Хүн тээвэрлэх журам зөрчсөн, зөвшөөрснөөс гадна хүн тээвэрлэж гаргах гэсэн зөрчлүүд цөөн тоогоор бүртгэгдэж байгаа. Үүнийг газар дээр нь арилгаж ажиллаж байна. Орон нутгийн замд зөвшөөрөлгүй, хулгайн замаар зорчиж, цасанд сууж байгаа зөрчлүүд цөөн гарч байна. Энэ тохиолдолд Зөрчлийн тухай хуулийн 5.13-т заагдсанаар арга хэмжээ авна. Цагдаагийн байгууллагын зүгээс арга хэмжээ авах, тулгаж шаардахаас илүү урьдчилан сэргийлэх, хор хөнөөлийг нь тайлбарлах, дахин зөрчил гаргахгүй байх тал дээр арга хэмжээ зохион байгуулж ажиллаж байна.

-Хөл хорио тогтоосон ч постоор нэвтрэх гэсэн иргэд олон байна лээ. Ямар шалгуураар нэвтрүүлж байна вэ?

-Стандартын дагуу шаланзаар шатахуун тээвэрлэж яваа, их хэмжээний хүнс зориулалтын дагуу тээвэрлэж яваа тохиолдолд шалгаад шууд нэвтрүүлж байгаа. Цагдаагийн байгууллага шалгаад хүндэтгэх шалтгаантай иргэдийг холбогдох зөвшөөрлийн дагуу нэвтрүүлсний дараа үзлэгт хамруулж ажиллаж байна.

-Эрсдэлтэй нөхцөлд ажиллаж байгаа алба хаагчдынхаа аюулгүй байдалд хэрхэн анхаарал тавьж байна вэ?

-ТЦА-ны тухайд үүрэг гүйцэтгэж, иргэдтэй тулж ажиллаж байгаа алба хаагчдад хамгаалалтын цагаан хувцсыг өгч байгаа. Мөн ядраахгүй байх талаас нь тодорхой хугацаанд халуун хоол, аарц, чацаргана гэх мэт зүйлээр хангаж байна. Үүнээс гадна 2-3 төрлийн витамин өгч, гар ариутгагч зэрэг хэрэглээний зүйлсээр тогтмол хангаж ажиллаж байна. Манайх өөрсдөө эмнэлэгтэй, эмчтэй. Үүгээрээ дамжуулаад алба хаагчдадаа зөвлөмж хүргүүлж ажиллаж байгаа. Алба хаагчдын ар гэрийнхэн талархалтай байна.

-Иргэдийн зүгээс алба хаагчдыг хэр ойлгож байх юм. Цай хоолоор дайлж байгаа тухайгаа цахимд нийтэлсэн нь олон тааралдсан?

-Иргэд хоол цай, хуурай идэх юм алба хаагчдад өгч байна. Энэ бол өөрсдийнх төлөө зогсож байгаа залуусыг дэмжих сайхан сэтгэл. Нөгөө үзүүрт цагдаагийн байгууллага алба хаагчдаа эрүүл ахуй талаас нь анхаарч, ямар нэгэн шинжилгээнд ороогүй хоол хүнс хэрэглэхийг татгалзсан. Өөрсдөө чанар, ариун цэврийн шаардлага хангасан, тэжээлтэй хоолыг тогтмол хугацаанд алба хаагчдадаа өгөөд хэвшсэн байгаа. Иргэдийн зүгээс ирж байгаа халуун аарц, чацарганыг хэрэглэж байгаа.

Улсын онцгой комисс, засгийн газрын зүгээс аюулт өвчнөөс урьдчилан сэргийлэхэд зориулж гаргасан журмыг мөрдөж цагдаагийн алба хаагчийг доромжлохгүй, тулган шаардахгүй байна гэдэг иргэдийн ухамсар дээшилсэн, алба хаагчдын ажиллах нөхцөл байдал хангагдаж байгаа гол хүчин зүйл. Энэ өдрүүдэд замын хөдөлгөөний ачаалал нийслэлд эрс буурч байна. Хурд хэтрүүлж замын хөдөлгөөний дүрмийг зөрчихгүй, онцын шаардлагагүй бол хөдөлгөөнд оролцоод хэрэггүй. Мэдээж зөвшөөрөлтэй орон нутгийн замд зорчиж байгаа бол тээврийн хэрэгслийн бүрэн байдлыг хангаж, өөрөө дулаан хувцаслах хэрэгтэй байна.

Улс даяар тогтоосон хорио цээрийн дэглэмийг зөрчин Дархан-Уул аймгаас хулгайн замаар зөвшөөрөлгүй автомашин хөлслөн ирж постын ойролцоо буун явганаар пост нэвтрэхийг оролдсон хариуцлагагүй 22 иргэнийг Шарын голын пост дээр саатуулжээ.

Сумын шуурхай штаб нэгдсэн журмаар тэдгээр хүмүүсийг сумын Эрүүл мэндийн төвд авчирч анхан шатны үзлэг хийн, асуумж авч иргэн бүр хариуцлагатай байх талаар анхааруулга, зөвлөгөө өгчээ. Ийм төрлийн зөрчил гаргаж, сумын шуурхай штабт хүндрэл учруулсан тохиолдолд Зөрчлийн тухай хуулийн дагуу тухайн иргэнийг 150.000 төгрөгөөр торгох хуулийн заалттай.

Сэтгэцийн эрүүл мэндийн үндэсний төвийн дэд захирал, Анагаах ухааны доктор В.Баярмаатай ярилцлаа.

-Халдварт өвчин газар авч, хорио цээрийн дэглэм тогтоосон үед иргэдийн сэтгэл зүй ямар байх ёстой вэ?

-Халдварт өвчин гардаг л зүйл. Коронавирус халдвар тодорхой үе шаттай, тодорхой хугацааны дараа эргээд буурдаг, зөв эмчилгээг олж хийвэл эдгэрдэг өвчин. Дэлхийн 100 гаруй оронд тархаад буй энэ өвчний тохиолдол манайд гараагүй байсан ч сая анхны тохиолдол илэрлээ.

Үүнтэй холбоотойгоор хүмүүсийн сэтгэл зүйд өөрчлөлтүүд гарч байна. Хэрвээ хүн эрүүл л бол сэтгэл зүйд нь өөрчлөлт гарах ёстой. Аливаа зүйлийг сонсоод айж, санаа зовж байгаа үзэгдлүүд бол хэвийн л үзэгдэл. Харин ийм үед огт санаа зовохгүй, хариу урвал үзүүлэхгүй байна гэдэг асуудалтай байх боломжтой.

Нэгэнт ийм дэгдэлт гарсан бол хэд хэдэн зорилтот бүлгүүдэд анхаарах шаардлагатай. Голомтод ажиллаж байгаа эмнэлгийн мэргэжилтнүүд, хөл хорио тогтоож байгаа бусад мэргэжилтнүүд болон ард иргэд рүү чиглэсэн зөвлөмжүүд байх хэрэгтэй.

-Иргэд ямар сэтгэл зүйтэй байж коронавирусийн халдварыг хохирол багатайгаар даван туулах вэ?

-Гарч байгаа хариу урвалууд байх ёстой зүйл гэдийг дахиад онцолъё. Гэнэтийн гамшгийн байдалтай мэдээг сонсоод баттай зөв мэдээлэл авсан тохиолдолд сандраад байх хэрэггүй.

Зөв мэдээллийг харилцан солилцож байх ёстой. Үүсэж байгаа нөхцөл байдлын үед өөр өөрсдийнхөө түвшинд өөрийгөө тайвшруулах техникүүдийг сурах нь чухал. Хүн таагүй байдалд орсон үедээ уртаар амьсгаа авахад тайвширдаг шүү дээ. Өөрийгөө тайвшруулах энгийн арга нь энэ. Ямар ч нөхцөлд хаана ч хийж болно. Тусгай орчин нөхцөл шаардахгүй. Мөн тодорхой үе шатаар явдаг өвчний тухай мэдээллийг өдөр тутам авч байгаа юм чинь цагийн эрхээр арилна гэсэн эерэг зүйлийн тухай бодох хэрэгтэй.

Өвчин тусчих юм биш биз гэсэн хямралыг дэврээсэн мэдээ, мэдээлэл түгээж болохгүй. Тодорхой онцлогтой, цаг хугацаатай явагддаг өвчний үед иргэн өөрийнхөө мэдээ мэдээллийг сайжруулах, эерэг зөв ойлголтоор даван туулна.

Дараагийн чухал зүйл нь сэтгэцэд илэрч байгаа аливаа асуудлыг өөрөө дотроо ургуулж бодоод бясалгаад байх нь чухал биш. Мэдээлэл сонсоод таагүй мэдрэмж авсан бол хэн нэгэнтэй хуваалцаж нээлттэй байх нь зөв. Өөрт үүсэж байгаа таагүй байдлаа хэн нэгэнд ярьж харилцан ойлголцох хэрэгтэй. Нөгөө хүн заавал ойлгох нь алба биш л дээ. Үүсээд байгаа мэдрэмжээ гадагшлуулна гэдэг чухал. Таагүй мэдрэмжээ дотроо хадгалаад байж болохгүй.

Үүнээс гадна гэр бүлийн орчинд нээлттэй харилцаа чухал. Хэн нэг нь өрөөндөө орчихоод өдөржин компьютер тоглоод, утас оролдоод байж болохгүй. Хүүхэдтэйгээ харилцаж тоглож цагийг өнгөрүүлэх нь зөв. Энэ нь гэр бүлийн орчинд таатай уур амьсгал бүрдүүлнэ. Ингэж сэтгэл зүйн дархлаагаа дэмжиж, тайван амгалан, зөв мэдээлэлтэй Байж халдварт өвчнийг хохирол багатай давж гарна.

-Сэтгэл зүйгээ тогтвортой, тайван байлгахад хүний хувийн зохион байгуулалт чухал юм шиг. Та үүн дээр юу зөвлөх вэ?

-Хувийн зохион байгуулалт төлөвлөгөө чухал. Манайхан төлөвлөхдөө тааруу улс. Цагийн ажлаа цагт хийхгүй, явж байгаад овооруулчихдаг. Хэдэн cap, хоногийн өмнөөс ажлаа төлөвлөөд цагт нь хийгээд явах нь зөв. Үүссэн нөхцөл байдалтай холбоотойгоор вирус гарч байгаа юм байна, хөл хорио тогтоох нь, гэр бүлийн орчинд байх ёстой гэх зүйлсийг хүлээн зөвшөөрөх хэрэгтэй. Хэцүү зүйл биш шүү дээ.

Нөхцөл байдлыг зөвөөр тунгааж, хүлээн зөвшөөрнө гэдэг чухал. Зөв төлөвлөж энэ өвчин хэдэн сарын дараа алга болно гэсэн сэтгэл зүйг өөртөө суулгах хэрэгтэй. “Ямар удаан хугацаа вэ, энэ ч ажлаа амжуулах байлаа, энэ ч ажил бүтсэнгүй” гэж бодит байдлыг хүлээн авч чадахгүйгээс болоод стресстэж сэтгэл зүйн дархлаагаа унагаж болохгүй.

Дэлхий даяараа ийм нөхцөл байдал үүсээд байхад үүнийг зөвөөр өөртөө тусгаж аваад, амьдралын хэв маягийг тухайн нөхцөлтэй уялдуулж төлөвлөөд явах хэрэгтэй. Энэ маягаар амьдралын хэвшлийг тогтоох нь таныг стрессээ чөлөөлнө.

Янз бүлийн зүйлийг ургуулж бодож хөгжүүлээд, аливаа зүйлийг болохгүй сөрөг талаас нь хараад байж болохгүй. Бодитой зөв мэдээллээ аваад л цаг хугацааг хүлээх л хэрэгтэй. Хүлээлтдээ өөрийгөө дасгах, үүнтэйгээ эвлэрэх, хүлээн зөвшөөрөөд явахад хүний сэтгэл тавгүйтэхгүй.

Үүнийгээ зөвшөөрөхгүй болохоор л санаа зовж нойр хүрэхгүй дархлаа унаж, хоол ундандаа муу болно. Зарим хүмүүс энэ хугацаанд идэх л ёстой юм шиг сэтгэж хоол хүнсээ нөөцлөөд байна. Ингэж нөхцөл байдлаас шалтгаалж хувирч өөрчлөгдөж болохгүй.

-Энгийн нөхцөлд өөрийгөө тайвшруулах, сэтгэл зүйн дархлаагаа тогтвортой байлгах ямар аргууд байдаг вэ?

-Хүмүүсийн дунд ямар ч нөхцөл шаардахгүй, янз бүрийн хэрэглэгдэхүүн ашиглахгүй, их цаг хугацаа зарахгүй хамгийн энгийн арга нь тайвшруулах амьсгалын дасгал. Үүнийг хийхдээ өөрийнхөө булчинг сулруулах хамгийн боломжтой байрлалыг сонгоно. Дээшээ хараад хэвтвэл биеийнхээ хоёр хажуугаар гараа сул тавиад (сандал дээр сууж байгаа бол арагшаа налаад гараа сандлын түшлэг дээр сул орхиод) удаанаар гүнзгий амьсгал авна.

Ингээд амьсгалаа удаанаар түгжинэ. Болж өгвөл гурван минут орчим бол сайн. Чадахгүй бол өөрийнхөө чадах хэмжээнд л тааруулаад амьсгалаа түгжиж байгаад удаанаар гаргах нь хамгийн чухал дасгал. Ингэхдээ цээжээрээ амьсгалах бус, таны хэвлий хэсгээрээ амьсгалах нь хүнийг тайвшруулж өгдөг.

Мөн хүмүүс тамхи татахдаа гүнзгий амьсгалаад сордог шүү дээ. Заавал амандаа тамхи зуугаад биш, тамхигүйгээр гүнзгий амьсгал аваад гаргах дасгалыг хэд хэдэн удаагийн давтамжтайгаар хийх нь хүнийг тайвшруулж өгдөг. Ер нь хүн тайвшруулах үйлдлийг л тамхины тусламжтайгаар хийж байгаа юм. Энэ арга үр дүнтэй.

-Сэтгэл зүйн дархлаанд нойр чухал. Манайд нойрны асуудалтай хүн олон бий. Иргэд нойр дутуу сэтгэл тавгүй үедээ янз бүрийн мэдээлэл хүлээж авч байгаа нь дархлааг нь унагаад байх шиг. Энэ асуудал дээр та юу зөвлөх вэ?

-Дээр дурдсан амьсгалын дасгал үр дүнтэй. Нойрны хямралтай байгаа хүмүүс дээшээ харж хэвтээд гүнзгий амьсгал аваад удаанаар гаргана. Энэ дасгалыг хэд хэдэн удаагийн давтамжтайгаар хийхэд хийхэд л унтчихсан байдаг. Бүх бие суларна гэдэг хүнийг тайвшруулж, нойрыг хүргэж өгдөг ач холбогдолтой.

-Үүсээд буй нөхцөлтэй холбоотойгоор янз бүрийн хар, бараан мэдээлэл хүлээж авч ургуулан бодож хямраад байх шиг. Иргэд үнэн зөв, бодитой мэдээллийг хүлээн авах тал дээр зөвлөхгүй юу?

-Янз бүрийн эх сурвалжгүй мэдээлэл тарааж байгаа нь иргэдийг айдаст автуулж төөрөгдүүлээд байна л даа. Баттай, эх сурвалжаас үнэн бодит мэдээлэл авч бусдадаа хуваалцах хэрэгтэй. Аюулт өвчинтэй тэмцэж байгаа байгууллага л бодитой мэдээлэл өгнө. Дэлхийн эрүүл мэндийн байгууллага байна. Манайд бол Эрүүл мэндийн яам, ХӨСҮТ гээд газруудаас үнэн зөв мэдээлэл өгч байгаа.

МҮОНТ, “Өдрийн сонин” зэрэг мэргэжлийн редакцуудын баталгаат эх сурвалжаас авсан мэдээллийг л хүлээж авч өөрийн хүрээлэлдээ хуваалцаж байх нь зөв. Хэн нэгний буруу зөрүү, мэдээллийг сонсоод итгэж, ургуулж бодох нь өөрийнхөө нервийг барсан асуудал. Үүнд ач холбогдол өгөөд хэрэггүй.

-Сэтгэл зүйгээ тайван тогтвортой байлгах нэг арга нь өөрийн дуртай, сэтгэл ханамж авдаг зүйлээ хийх юм шиг. Энэ тал та юу зөвлөх вэ?

-Дуртай зүйлээ хийлээ гээд цахим тоглоом тоглоод суугаад байж болохгүй. Энэ бол сэтгэл зүйг тайван байлгаж байгаа зүйл биш. Гэр бүлийн орчинд ганцаараа байгаа хүүхдэд эцэг эх нь хань болж цагийг зугаатай өнгөрүүлэх хэрэгтэй.

Ах дүү олуулаа бол олныг хамарсан тоглоом тоглож болно. Шагайн наадаан байж болно. Ийм байдлаар цагийг өнгөрүүлэх нь сэтгэл зүйг тогтвортой байлгах гол арга болж өгдөг. Мөн ном унших нь хүнийг тайвшруулна, таатай мэдрэмж төрүүлнэ.

-Эрсдэлтэй нөхцөлд ажиллаж байгаа эмч мэргэжилтнүүд, онцгой, цагдаагийн алба хаагчдад та юуг зөвлөх вэ. Бүтээсэн робот биш учраас сэтгэл зүй нь түгшүүртэй л байдаг байх?

-Голомтод ажиллаж байгаа хүмүүст ч халдвар авчих вий гэсэн айдастай л байгаа. Эмч нар маань мэдээллээ сайн авч шинжлэх ухаанч байр сууринаас хандаж байгаа. Г ол нь ажиллагаандаа бие биенээ дэмжсэн, урамшуулсан, харилцан ойлголцсон, хүндэтгэсэн харилцаатай байх нь чухал.

Асуудал гарахад хэн нэгэн буруутанг хайх биш, харилцан ойлголцож багаар ажиллаж чадвал айдасгүй ажиллах боломжтой. Сэтгэл зүйгээ тайван байлгана гэдэг маань анхаарлаа төвлөрүүлж ажлаа сайн хийнэ гэсэн үг шүү дээ. Айдастай, сэтгэл зүй тогтворгүй ажилдаа анхаарах уу. Сэтгэл зүй тайван байна гэдэг үр бүтээлтэй ажиллахын үндэс.

Ажиллаж байгаа улсаа урамшуулж, дэмжиж байх хэрэгтэй. Тэд үүнээс л ажиллах эрс хүч, урам зориг авна. Хэвлэл мэдээллийн хэрэгсэл, олон нийтийн сүлжээгээр голомтод ажиллаж байгаа хүмүүстээ талархсан, урамшуулсан мэдээ, мэдээлэл их байна лээ. Үүнд сэтгэл хангалуун байгаа.

Цагдаагийн ерөнхий газрын нийгмийн хэв журам, олон нийтийн аюулгүй байдлын албаны зөрчил шалгах, мэргэжил арга зүйн хэлтсийн дарга, цагдаагийн хурандаа Ч.Чинбаттай ярилцлаа.

-Шинэ төрлийн коронавирусийн халдвартай холбогдуулан авч хэрэгжүүлж байгаа хорио цээр, хязгаарлалын үед иргэд, олон нийт ямар үүрэг хүлээх вэ?

-Дэлхий нийтэд хурдацтай тархаж буй шинэ төрлийн коронавирусийн халдвартай холбогдуулан уг халдвараас урьдчилан сэргийлэх, иргэд, олон нийтийг өвчний аюулаас хамгаалах зорилгоор Монгол Улсын төрийн байгууллагуудаас хорио цээрийн дэглэм тогтоож зохих арга хэмжээг авч хэрэгжүүлж байна.

Хорио цээр, хөдөлгөөний хязгаарлалтын арга хэмжээг төрийн эрх бүхий байгууллагаас хуулийн хүрээнд шийдвэр, захирамж байдлаар гаргаж иргэд, хуулийн этгээдэд тодорхой үүрэг хариуцлагыг хүлээлгэж, төрийн байгууллагуудад зохих арга хэмжээг авч хэрэгжүүлэх ажлыг даалгаж байна.

Дээр дурдсан хорио цээр, хөдөлгөөний хязгаарлалтын үед иргэдийн зүгээс ганцхан өөрийн эрх ашиг бус нийтийн эрх ашгийг хүндэтгэн, хууль тогтоомж, хорио цээрийн дэглэм тогтоосон шийдвэрт тусгагдсан хэм хэмжээг сахин биелүүлж, зөрчихгүй байх үүрэгтэй.

-Хорио цээр тогтоосон үед иргэд үүргээ биелүүлээгүй, дэглэм зөрчсөн үед ямар хариуцлага хүлээх вэ. Энэ талаар хуулийн ямар зохицуулалт байдаг вэ?

-Зөрчсөн тохиолдолд холбогдох хуульд заасан хариуцлага хүлээлгэнэ.

Тухайлбал, Зөрчлийн тухай хуулийн 5.13 дугаар зүйлийн 1 дэх хэсэгт “Гамшиг, аюулт үзэгдэл, осол, аюул, гамшгийн эрсдэлийн талаар олон нийтийг төөрөгдүүлэх мэдээ, мэдээлэл түгээсэн, эсхүл эрх бүхий байгууллагаас тогтоосон хорио цээр, хөдөлгөөний хязгаарлалтын дэглэмийг зөрчсөн бол хүнийг нэг зуун тавин нэгжтэй тэнцэх хэмжээний төгрөгөөр, хуулийн этгээдийг нэг мянга таван зуун нэгжтэй тэнцэх хэмжээний төгрөгөөр торгоно” гэж хуульчилсан.

Зөрчлийн тухай хуулийн 15.2 дугаар зүйлд төрийн албан хаагчаас тавьсан хууль ёсны шаардлагыг биелүүлээгүй, эсхүл биелүүлэхгүй байхыг уриалсан, мөн төрийн албан хаагчийн үйл ажиллагаанд нь саад учруулсан, төрийн албан хаагчийг хүч хэрэглэхгүйгээр эсэргүүцсэн, эсхүл доромжилсон бол хүнийг хоёр зуун тавин нэгжтэй тэнцэх хэмжээний төгрөгөөр, хуулийн этгээдийг хоёр мянга таван зуун нэгжтэй тэнцэх хэмжээний төгрөгөөр торгоно гэсэн зохицуулалт байдаг.

-Үүсээд буй нөхцөл байдалтай холбоотойгоор илт худал мэдээлэл тараах, олныг төөрөгдүүлэх, айдаст автуулах, хүний нэр төрд халдах тохиолдол их гарч байна. Энэ тохиолдолд иргэнд ямар хариуцлага хүлээлгэдэг вэ?

-Халдварт өвчинтэй холбогдуулан илт худал мэдээлэл тарааж хүний нэр төрд халдсан бол Эрүүгийн хуулийн 13.14 дүгээр зүйлд зааснаар дөрвөн зуун тавин нэгжээс нэг мянга гурван зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван cap хүртэлх хугацаагаар зорчих эрхийг хязгаарлах ял шийтгэнэ гэж хуульчилсан.

Мөн бусдын амь насанд аюул учруулж болзошгүй халдварт өвчин, дархлал хомсдолын вирусийг бусдад зориуд халдаасан бол нэг жилээс таван жил хүртэлх хугацаагаар зорчих эрхийг хязгаарлах, эсхүл нэг жилээс таван жил хүртэлх хугацаагаар хорих ял шийтгэнэ гэж Эрүүгийн хуулийн 15.6 дугаар зүйлд хуульчлан тогтоосон байдаг.

Иймд юуны өмнө иргэд төрийн тусгай чиг үүрэг бүхий байгууллага, алба хаагчдаас өгч байгаа санамж, зөвлөгөө, сэрэмжлүүлгийг даган мөрдөх нь зүйтэй гэж хэлмээр байна. Мөн дээрх тусгай чиг үүрэг бүхий байгууллагууд ард иргэдийнхээ аюулгүй байдлыг хангах, аливаа эрсдэл, аюулаас урьдчилан сэргийлэх ажил, арга хэмжээг зохион байгуулах үүрэгтэй.

-Иргэдийн зүгээс хорио цээрийн үед дэглэм зөрчсөн ямар зөрчил гаргаж байна вэ?

-Цагдаагийн байгууллагын хяналтаар хорио цээрийн дэглэм зөрчин олон нийтийн арга хэмжээ, хурал цуглаан, жагсаал, цуглаан зохион байгуулсан хууль бус үйлдлүүд нэлээдгүй илэрч, холбогдох цагдаагийн байгууллагуудаас шалгах ажиллагаа явуулж байна.

Мөн тусгаарлагдсан иргэдээс ахуйн нөхцөлөө голж төрийн албан хаагчид, эмнэлгийн ажилтнуудын шаардлагыг эсэргүүцэх, доромжлох зэрэг хууль бус үйлдлүүд гарч, уг асуудлыг цагдаагийн байгууллагаас шалгаж байгаа тохиолдлууд бий.

Иргэд маань аливаа асуудалд хүлээцтэй хандаж, нийтийн эрх ашгийг хүндэтгэх хэрэгтэй. Хорио цээрийн дэглэмтэй холбогдон их хэмжээний хөрөнгө, зардал гарч байгаа гэдгийг онцгой ухамсарлах хэрэгтэй байна. Монгол Улсын иргэний хувьд жаахан ч гэсэн “эх оронч” байх шаардлагатай. “Эх оронч” байна гэдэг энгийн жижиг зүйлээс эхэлдэг.

-Цагдаагийн байгууллагаас хуурамч мэдээ, мэдээлэлтэй тэмцэх талаар ямар арга хэмжээ авч байна вэ?

-Төрийн эрх бүхий байгууллагуудаас шинэ төрлийн коронавирусийн халдвартай холбоотой бодит мэдээллүүдийг иргэдэд хэвлэл мэдээллийн хэрэгсэл, цахим сүлжээгээр тогтмол хүргэж байна.

Үүнтэй зэрэгцэн төр засгаас авч хэрэгжүүлж буй хорио цээр, хөдөлгөөний хязгаарлалтын арга хэмжээг мушгин гуйвуулах, гамшиг, аюулын талаар иргэд, олон нийтийг төөрөгдүүлсэн мэдээ, мэдээлэл түгээх, өвчний халдвар, төрийн байгууллагуудаас авч хэрэгжүүлж байгаа арга хэмжээг зориуд гуйвуулж улмаар хүний нэр төр, алдар хүнд, хуулийн этгээд, төрийн байгууллагуудын ажил хэргийн нэр хүндэд халдсан илт худал мэдээллийг тараах зэрэг хууль бус үйлдлүүд цахим сүлжээнд олноор гарч, цагдаагийн алба хаагчид холбогдох хууль тогтоомжид заасны дагуу дээрх хууль бус үйлдлүүдийг шалгах ажиллагааг явуулж Зөрчлийн тухай болон Эрүүгийн хуульд заасан хариуцлага хүлээлгэн, хууль зөрчсөн цахим хуудсыг хаах арга хэмжээг авч ажиллаж байна.

Мөн цагдаагийн байгууллагаас шинэ төрлийн коронавирусийн халдвартай холбоотой мэдээ, мэдээллийг нийтэлсэн тохиолдолд сэтгэгдэл бичих боломжгүй тохиргоотойгоор цахим сүлжээнд байршуулах, илт худал, иргэд, олон нийтийг төөрөгдүүлсэн, айдаст автуулсан мэдээ, мэдээллүүд болон сэтгэгдлийг хязгаарлах талаар арга хэмжээ авч ажиллах чиглэлээр вэб сайтын үйлчилгээ эрхэлдэг байгууллагуудад Харилцаа холбооны зохицуулах хороотой хамтран шаардлага хүргүүлээд байна.

-Ер нь хорио цээр, аюул, эрсдэлийн үед олон нийтийн сэтгэл зүй ямар хэмжээнд байх ёстой вэ. Энэ талаар та ямар байр суурьтай байна вэ?

-Аливаа аюул, эрсдэлтэй холбоотойгоор хорио цээрийн дэглэм тогтоосон үед ард иргэд маань тайван амгалан байж, бодит бус мэдээлэлд автахгүй байж, мэргэжлийн байгууллагаас өгч байгаа санамж, зөвлөгөөг чанд мөрдөх нь зүйтэй.

Ер нь аливаа аюул заналхийлэл, эрсдэлийг эв нэгдэл, сахилга бат, дэг журам, нэгдсэн удирдлагатай байж л хохирол багатай давна. Мөн зөвхөн өөрийн эрх ашгийг нэгдүгээрт тавих биш нийтийн эрх ашиг, нийгмийн аюулгүй байдал, хайртай дотны хүмүүсийнхээ аюулгүй байдлыг хамгийн түрүүнд эрэмбэлэх нь зүйтэй.