Одоогоос хоёр жил орчмын өмнө Дорнод аймгийн Хөлөнбуйр сумын гуравдугаар багийн нутагт согтуу жолооч айлын гэр дайрч гэр бүлийн хоёр хүний амь насыг хохироосон осол гарсан. Ослын улмаас 15 настай хүү зургаан настай дүүгийн хамт өнчирч үлдсэн байдаг. Тухайн өдрийн ослын талаар иргэн О.Энхбаяртай ярилцлаа. Түүний тухайд талийгаачтай гэр бүлийн найзууд байжээ.
-СОГТУУ ЖОЛООЧИЙН ҮЙЛДЛЭЭС БОЛЖ ЖИЛД 150 ОРЧИМ ХҮН АМЬ НАСАА АЛДАЖ БАЙНА-
-Хөлөнбуйр суманд авто ослын улмаас хоёр хүн газар дээрээ нас барсан харамсалтай хэрэг хоёр жилийн өмнө гарчээ. Тухайн ослын талаар мэдэх хүрээндээ ярилцах боломж байна уу?
-Бусдад сэрэмжлүүлэх үүднээс ярьж бололгүй яах вэ. Дээрх эмгэнэлтэй осол гараад хохирогчдын гэр бүлийн нулимс гүйцэд хатаж байхад л сумын төвийн гудамжаар согтуу залуус жолооны ард суучихаад гуйвж дайваад л явах юм. Согтуугаар жолооны ард суусан хүний балгаар нэг бүлийн амьдрал нүдэн дээр нь сүйрчихээд байхад л сургамж авахгүй байгаад нь харамсах юм. Таны асууж байгаа ослын тухайд 2020 оны намар аравдугаар сард болсон юм. Шөнийн 00:00 цаг өнгөрч байхад “приус 20” унасан согтуу залуу айлын гэр дайрсан байдаг. Ослын улмаас гэртээ амарч байсан эхнэр, нөхөр газар дээрээ нас барж, бага насны хоёр хүүхэд хүнд гэмтээд үлдсэн. Тухайн үед 24-хөн настай залуугийн болчимгүй үйлдэл л бүтэн бүлээн гэр бүлийн амьдралыг нүд ирмэхийн зуурт л сүйрүүлээд хаячихсан. Ид хийж бүтээх насан дээрээ явсан гэр бүл ертөнцийн мөнх бусыг үзүүлнэ гэдэг дэндүү харамсалтай байгаа биз. Осол гаргасан залуу машинаасаа бууж ирсэн даруйдаа хөл дээрээ зогсож чадахгүй гуйвж байсныг ойр байсан хүмүүс нь гэрчилдэг. Энэ жишээнээс согтуурсан үедээ жолооны ард сууна гэдэг цэнэглэсэн ака буу бариад гудамжинд шүршиж байгаатай ижилхэн гэдэг нь харагдаж байна л даа.
-Талийгаачтай та гэр бүлийн найзууд байсан гэв үү?
-Тийм. Гэр бүлийн найзууд байсан юм. Бие биенийхээрээ өдөр тутам орж гарна. Хувиараа хөдөлмөр эрхэлдэг, амьдралын төлөө хамтдаа зүтгэдэг дайчин гэр бүл байлаа. Найз маань гэр бүлээрээ нийслэл рүү нүүж мужааны цех ажиллууллах талаар ярина. Өөрөө гарын уртай болохоор тэр шүү дээ. Энэ ажлаа гүйцэлдүүлэхээр зүтгэж яваад л согтуу жолоочийн балгаар 43-хан насандаа нас барсан даа. Үүнд нь харамсаад бардаггүй юм. Одоо хоёр хүүхэд нь сумандаа бий. Ах, дүү нар дээр нь л байдаг байх. Тухайн ослын үеэр том хүү нь 15 настай байсан. Дүү нь зургаахан настайдаа л ээж, ааваасаа өнчирч үлдсэн дээ. Бүтэн бүлээн гэр бүлд өсөж торнисон хүүхдүүдэд энэ цохилт яаж туссан бол гэж бодохоос гол харладаг юм.
-Осол гаргасан жолоочийн асуудал яаж шийдэгдсэн бол?
-Амьдрал дөнгөж хөл тавиад байсан залуу нэг удаагийн болчимгүй үйлдлээс болоод л торны цаана суусан. Амьдрал нь гэрэлтэж байсан залуугийн, өөрийгөө хянаагүй болчимгүй үйлдэл л нэг гэр бүлийн амьдралыг сүйрүүлчихсэн.
-Иргэд аймшигтай ослоос сэрэмж авахгүй байгаа талаар та онцолж байна…
-Тийм ээ. Тухайн үедээ шуугиж, гашуудаж байгаад л мартацгаасан. Саяхан л гэхэд бараг өөрийгөө хянах чадваргүй болтлоо согтсон хоёр залуу дэлгүүрээс архи аваад л жолооны ард суугаад хэнэг ч үгүй яваад өгөх юм. Хэлэхэд өөдөөс “Чамд хамаагүй” гэж ээрч муураад хариулж байна лээ. Дахиад нэг гэр бүлийн амьдрал сүйрвэл яах вэ. Согтуугаар жолооны ард суух нь ямар их эрсдэл дагуулж байгааг огт ухамсарлахгүй юм. Согтуугаар жолоо барих зөрчил хөдөө орон нутагт илүү хор хөнөөлтэй байгаа нь харагддаг. Цөөхөн цагдаатай, согтуугаар жолооны ард суусан хүн бүрийг шалгаж зөрчлийг цаг тухайд нь илрүүлэх боломж хомс. Үүнд хяналт тавихад онцгой анхаарахгүй бол дахин хэдэн гэр бүлд дээрх шиг эмгэнэлтэй явдал тохиохыг таах аргагүй.
-Согтуугаар жолооны ард суух зөрчил буурахгүй, өсөх хандлагатай байгааг Тээврийн цагдаагийн албанаас онцолж байна л даа. Таны зүгээс үүний шалтгаан нөхцөлийг яаж харж байна вэ?
-Олон шалтгаан байгаа болов уу. Голлох шалтгаан нь хууль эрхзүйн орчин зөөлөн байгаатай холбоотой. Шал согтуугаар жолооны ард сууж бусдын амь нас, эрүүл мэндэд санаатайгаар заналхийлж буй этгээдийг торгоод өнгөрч байгаа нь толгойг нь илж байгаа хэрэг. Гудамжинд буу бариад шүршиж байгаа нөхрийг л торгоод өнгөрч байна гэсэн үг. Олон улсын жишгээр хатуухан хариуцлага тооцоод явахад ийм төрлийн гэмт хэрэгтнүүд ухамсарлана. Өнөөдөр хүчин төгөлдөр мөрдөгдөж байгаа хуулиар бол согтуугаар замын хөдөлгөөнд оролцсон этгээдийг 500 мянган төгрөгөөр торгоод, жолоодох эрхийг нь хасаад л өнгөрдөг. Давтан үйлдэлд нь 7-30 хоног баривчлах ялаар шийтгэдэг. Энэ бол бусдад санаатайгаар заналхийлсэн этгээдийг өөгшүүлж байгаа явдал. Дахиад ч согтуураад бусдын хөрөнгийг сүйтгээд ир гэсэнтэй яг ижилхэн. Өнөөдөр ОХУ-д согтуугаар жолоо барьж замын хөдөлгөөнд оролцвол 920-1600 ам.доллар аар торгодог. Жолоодох эрхийг гурван жилийн хугацаагаар хасдаг. Бусдын амь нас, эрүүл мэндэд хохирол учирсан бол 15 жил хүртэлх хугацаагаар хорих ялаар шийтгэдэг. Манайд саявтар жүжигчин залуу согтуугаар тээврийн хэрэгсэл жолоодож бусдын амь насыг хохироосон ноцтой осол гарсан. Өнөөх залуу жил гаруйн хугацаанд хоригдоод л гараад ирсэн байна лээ. Эрхзүйн орчин нь ийм зөөлөн, нялцаганасан болохоор л согтуугаар жолооны ард суух гэмт хэрэг буурахгүй байгаа юм шүү дээ. Ийм учраас л энэ үйлдлээс улбаалан учирч болох хор хохирлыг тооцоолохгүй байна. Хувьдаа согтуугаар жолооны ард суусан л бол багадаа гурван жилээр жолоодох эрхийг хасдаг байх ёстой. Хажуугаар нь өндөр торгууль тавьж байх хэрэгтэй. Ингэж хатуу хариуцлага тооцож байж л согтуугаар жолоо барьж болохгүй гэх ухамсар хүмүүст суух болов уу.
Г.Отгонтамир: Согтуугаар тээврийн хэрэгсэл жолоодох зөрчил 76.2 хувиар өссөн
Энэ оны эхний дөрвөн сарын байдлаар согтуугаар тээврийн хэрэгсэл жолоодсон 16588 зөрчил бүртгэгджээ. Өнгөрсөн оны мөн үетэй харьцуулахад 76.2 хувиар өссөн үзүүлэлт болсон байна. Энэ талаар Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн, цагдаагийн ахмад Г.Отгонтамираас тодрууллаа.
-Согтуурсан үедээ тээврийн хэрэгсэл жолоодож ноцтой осол гаргасан талаарх мэдээлэл өдөр тутам л гарах юм. Энэ төрлийн гэмт хэргийн нөхцөл байдал ямар байна вэ?
-Согтууруулах ундааны зүйл хэрэглэсэн үедээ замын хөдөлгөөнд оролцох зөрчил буурахгүй байна. Энэ нь статистикаас тодорхой харагддаг. Энэ оны эхний дөрвөн сарын байдлаар л гэхэд согтуугаар жолоо барьсан 16588 зөрчлийг цагдаагийн алба хаагчид илрүүлж болзошгүй осол, аваараас урьдчилан сэргийлж ажилласан. Хувьчлаад авч үзэхэд үүний 7697 нь орон нутагт гарсан байгаа юм. 8891 нь нийслэлд илэрсэн. Энэ нь өнгөрсөн оны мөн үетэй харьцуулахад 76.2 хувиар өссөн үзүүлэлт. Согтуурсан үедээ жолооны ард суух тохиолдол буурахгүй байгаа нь эндээс ил цагаан харагдаж байна.
-Эрхээ хасуулсан үедээ согтуугаар тээврийн хэрэгсэл жолоодох тохиолдол байдаг шүү дээ. Ийм төрлийн зөрчил хэд бүртгэгдэв?
-Энэ тохиолдолд 7-30 хоногийн баривчилгаанд явуулдаг. Эрхээ хасуулсан үедээ жолооны ард суусан гэсэн үг л дээ. Оны эхний дөрвөн сарын байдлаар нийслэлд 632 иргэн согтуугаар тээврийн хэрэгсэл жолоодож баривчилгаанд явсан. Харин орон нутагт 1206 жолооч энэ төрлийн зөрчлийг давтан үйлдэж баривчлуулах шийтгэл хүлээсэн байна.
-Согтуугаар тээврийн хэрэгсэл жолоодох төрлийн зөрчил буурахгүй байгаа шалтгаан нөхцөлийг та яаж харж байна вэ. Жолооч нар ухамсаргүй байна уу?
-Голлох шалтгаан нөхцөл нь үйлчилгээний байгууллагууд хязгаарлалтгүй ажиллаж байна л даа. Мөн архи согтууруулах ундаа хэрэглэж байгаа хэн нэгэн жолооны ард суухаар завдахад үйлдлийг нь таслан зогсоох ухамсар дутмаг байна. Таслан зогсоосноор учирч болох эрсдэлээс урьдчилан сэргийлж байна гэдгээ ойлгох хэрэгтэй. Энд нэг жишээг онцолъё л доо. Тавдугаар сарын 23-ны өдрийн оройн 23:00 цагийн орчимд согтуу жолооч 300-400 метр зам туулж зогсоолд байсан гурван машиныг мөргөсөн осол гаргасан. Магадгүй хороолол доторх хөдөлгөөн байсан бол хүний амь нас эрсдэх ч магадлал өндөр байсан. Согтуурсан үедээ жолооны ард суусан хариуцлагагүй үйлдэлтэй холбоотойгоор жилд 150 орчим хүн амь насаа алддаг гэх судалгаа бий.
-Согтуугаар жолооны ард суух эрсдэлийн талаар хэвлэл мэдээллээр нөлөөллийн ажил тогтмол явдаг. Гэсэн ч энэ төрлийн зөрчил буурахгүй, өсөх хандлагатай байна л даа. Энэ төрлийн зөрчил тулгах ялын бодлого зөөлөн байна уу.
-Бодлогын чанартай асуудлыг Хууль зүйн яамнаас тодруулах шаардлагатай болов уу. Гэхдээ нэг зүйлийг онцлоод хэлэхэд манайд согтуугаар тээврийн хэрэгсэл жолоодсон үйлдэлд арга хэмжээ тооцож байгаа хуулийн санкц олон улстай харьцуулахад зөөлөн байдаг.