Монголын Үндэсний музей нийслэлийн ерөнхий боловсролын сургуулиудтай хамтран ажиллах гэрээ байгуулжээ. Энэ хүрээнд ерөнхий боловсролын аравдугаар ангийн сурагчид үндэсний музейгээр үнэ төлбөргүй үйлчлүүлэх боломжийг бүрдүүлсэн байна.
Монголын Үндэсний музей Улаанбаатар хотод үйл ажиллагаа явуулдаг 118 гаруй Ерөнхий боловсролын сургуулийн 50 гаруй сургуультай гэрээ байгуулжээ. Улмаар БСШУЯ-наас баталсан “Цөм хөтөлбөр” болон ЕБС-ийн түүхийн хичээлтэй холбогдуулан аравдугаар ангийн сурагчдад үнэ төлбөргүй музей үзэх боломжийг нээж өгчээ.
Гэрээ байгуулсан сургуулийн аравдугаар ангийн сурагчид 1-6 дугаар саруудад үнэ төлбөргүй музей үзэх аж. Мөн нэг ангийн 25-аас дээш сурагч музей үзсэн тохиолдолд үнийн дүнгийн 10 хувьд хөнгөлөлт үзүүлэхээс гадна захын дүүргийн сургуулийн нэг ангийн 20-иос дээш сурагч үзсэн тохиолдолд таван хүүхдийг үнэ төлбөргүй музей үзүүлэх заалтыг гэрээнд тусгажээ. Түүнчлэн сурагчдаа дагуулж ирсэн багш нар болон цэцэрлэгийн насны хүүхдүүд, хөгжлийн бэрхшээлтэй иргэдэд үнэ төлбөргүй үйлчлэх аж.
Үндэсний музейд хүүхдэд зориулсан “Музейн Боловсролын өрөө” байдаг бөгөөд энэхүү өрөөнд бүх насны хүүхдэд зориулсан олон сонирхолтой боловсролын хөтөлбөрт хамрагдах боломжтой юм байна.
Монголын Үндэсний музей нь Монгол нутагт хүн анх аж төрөх болсон хуучин чулуун зэвсгийн үеэс эдүгээ хүртэлх нүүдэлчдийн түүх, соёл, өв дурсгал, угсаатны зүй, уламжлалт зан заншилтай холбогдох 56,000 гаруй үзмэртэй.
Музейн сан хөмрөгт Хүрэл зэвсгийн үеийн хос янзага, хүрэл сэлэм, Хүннүгийн үеийн ширмэл ширдэг, авсны алтан чимэглэл, алтан нар сар, Түрэгийн Билгэ хааны алтан титэм, алтан чимэглэлүүд, алтан гүц, хундага, таваг, мөнгөн буга, Хятаны үеийн ясан шүдний сойз, XIII зууны үетэй холбогдох нум, сум, үйсэн хоромсого, эмээлийн мод, Монголын эзэнт гүрний үеийн зооснууд, чамин тансаг хийц, загвартай Богтого малгайн алтан чимэглэл, Япон тэнгисээс олдсон Хубилай хааны цэргийн усны сав, XIII-XIY зуунд холбогдох Язгууртны дээл, XIY-XY зууны үеийн Байлдааны ширэн хөө хуяг, Ялтсан гутал, Өндөр Гонгорын хөөрөг, даалин, таван ханатай Монгол гэр, Жанжин Д.Сүхбаатарын хувцас хэрэглэл, Ж.Гүррагчаагийн сансарт нисэхдээ өмсөж байсан хувцас, Монгол Улсын хоёрдахь Ерөнхийлөгч Н.Багабандийн ёслол хүндэтгэлийн хувцас зэрэг ховор, хосгүй үнэт үзмэрүүд хадгалагддаг байна.