Цаг хугацаа гэдэг харвасан сум шиг л өнгөрдөг ажээ. 2013 оны намар ХИС-ийн сэтгүүл зүй, медиа технологийн тэнхимд элсэн орсон тэр цаг хугацаа саяхан юм шиг тод санагдана. Бид 1-24 гэх нэршил дор Монгол Улсын өнцөг булан бүрээс цуглаж, хувь заяаны эрхээр ч юм уу нэг анги болсон. Сэтгүүл зүй, сэтгүүлч гэх эрхэм мэргэжлийг дур сонирхлоороо сонгон авч, ХИС гэх их айлын эд эс нь болж эзэмшсэн мэргэжил болоод ангийн хамт олноороо бахархан сууна.
ЭРЧҮҮД ТӨВТЭЙ АНГИ
Манай анги эрчүүд төвтэй. Сэтгүүл зүйн анги бүр есөн хөвгүүнтэй байгаад байдаггүй шүү дээ. Тэр болоогүй бүгд спортлог. Салбар сургуулийнхаа сагс, волейболын шигшээ багийг манайхан бүрдүүлчихдэг байсан юм. Оролцсон тэмцээн бүртээ амжилт гаргаж, сургууль, тэнхим, их сургуулиудын хоорондох тэмцээн гээд 10 гаруй медаль хүртжээ. Ангийнхнаа спортоор манлайлдаг байсан нь гарцаа байхгүй Б.Анар. Түүний талаар ангийн охин Агиймаа “Анар бол маш авьяслаг залуу. Спортын мэдрэмжтэй. Хэр баргийн хүн волейбол тоглох үед сэтгэл хөдөлдөггүй. Харин Анарыг тэмцээн дээр волейбол тоглохыг хараад өөрийн эрхгүй бахархдаг даа. Анар гэдэг хувь хүн талаасаа маш чадварлаг хүн” гэж тодотгосон. Түүнчлэн сургуулийн сагсны шигшээгийн ахлагч манай ангид бий. Түүний нэрийг О.Соронзонболд гэдэг. Тэрээр маш чадварлаг сагсчин төдийгүй хоббигоо ажил хэрэг болгож чадсан хөдөлмөрч нэгэн билээ. Тэрээр өдгөө GSDAM Герман хоньч нохой сонирхогчдын клубын ерөнхийлөгчийн албан тушаалыг хашиж буй. Харин манай ангийн дарга У.Цогтбилэг бол манай сагсны багийн холбон тоглогч байлаа. Түүний хариуцлагатай, үлгэр жишээч зан чанарыг ангийнхан үнэлдэг. “Цогоо гэхээр хамгийн түрүүнд хариуцлага гэдэг үг орж ирдэг. Хариуцлага гэдгийг маш сайн ухамсарласан. Цагийг сайн барьдаг. Бусдад маш сайн үлгэр дуурайль болж чаддаг” гэж ангийн охин Б.Ариунтунгалаг түүний талаар дурссан юм. Мөн Б.Энхтөр гэх урлагийн өндөр мэдрэмжтэй залуу бидэнд бий. Гитар тоглож, дуу хийнэ. Тэр болоогүй реппер. Түүнийг ангийн бүх хүүхэдтэй нээлттэй харьцаж, бүгдтэй нь хөгжилтэй байж чаддаг зан нь ангийн халуун дулаан уур амьсгалын үндэс байсан юм болов уу.
Манай ангийг ганцхан улаан дипломтой хүүхэд төгссөн байдаг. Тэр онц сурлагатан нь Б.Ганчөдөр гэх залуу байлаа. Мэдрэмж гэж тулчихсан. Видео контентод сонирхолтой. Өдгөө өөрөө студи байгуулж, маш амжилтттай ажиллаж байгаа юм. Ангийн охидууд Чөдрөөг “цоожтой авдар” шиг итгэл даахуйц залуу гэсэн билээ. Одоо ангийнхаа бизнесмэнүүдийн талаар яръя. Батбилгүүн буюу ангийнхний нэрлэснээр “СТИ” бол багаасаа бизнес эрхэлсэн хөдөлгөөнтэй залуу. Хэдий гуравдугаар курсээс шилжин орж ирсэн ч ангийнхан дунд тэр дороо уусч чадсан нийтэч нэгэн. Мөн манай ангийн Р.Сэргэлэн машин, утаснаас эхлүүлээд хийж болох бүхий л бизнесүүдийг хийсэн залуу. Ангийн хөвгүүдийнхээ талаар ярихад ийм. Энэ хэдэн шижигнэсэн залуус өдгөө өөр өөрсдийн амьралыг босгохоор урт аяллаа эхлүүлээд явж байна.
ХҮМҮҮНЛЭГТЭЭХАМГИЙН ДАЖГҮЙ ОХИДТОЙ АНГИ НЬ МАНАЙХ. ЭНЭ БОЛ ҮНЭН ЮМ
Харин охидууд маань үзэсгэлэнтэй гэж жигтэйхэн. Бидний нэг, улаан дипломны эзэн Б.Ганчөдөр нэгэнтээ “Би худлаа ярихгүй. Манай ангийн охид хүмүүнлэгтээ хамгийн дажгүй охидууд нь байсан. Энэ бол үнэн юм” гэж хэлсэн нь өөрөө үнэн юм. Тэрээр эрчүүд дундаасаа ангийн охидтой хамгийн ойр байсан нь. Ангийн охин Б.Тэргэлийн талаар Б.Ганчөдөр “Тэргэлтэй оюутан цагийн сайн найзууд. Адилхан орос сургууль төгссөн учраас ойлголцоход амар байдаг. Ээгий маш хөгжилтэй, ангийн хүүхдүүдийн анхаарлыг өөр дээрээ татаж байгаад инээлгэж, хөгжилдөж чаддаг. Ангийн коллектив, уур амьсгалыг авч явдаг хүн нь байлаа” гэсэн юм. Мөн тэрээр ангийн онц сурлагатан охидын талаар үг цухуйлгах даа “Агий бол маш гоё ааштай, ямар ч нерви байхгүй, ухаалаг охин. Харин манай ангийн Дагий маш ажилсаг. Юманд нухацтай ханддаг” гэлээ. Манай ангийн Агиймаа, Дагиймаа хоёр хичээлдээ маш сайн суралцаж төгсөөд, өдгөө сэтгүүл зүйн салбарт өөр өөрийн хэв шинж, зам мөрийг гаргаж яваа билээ.
АНГИЙНХАА ОХИДЫН ТАЛААР ЯРИХ САЙХАН
Манай охид энд тэнд, кино, реклам, клипэнд их тоглоно оо. А.Энхмаа гэхэд “Шилжилт” МУСК-нд тоглож, хэд хэдэн клипэнд дүр бүтээгээд амжсан. Ангийн хөвгүүн Б.Батбилгүүн “Манай ангийн А.Энхмаа өөрийн дотно хүнээ өмөөрч чаддаг. Нэг итгэсэн хүндээ маш үнэнч байдаг нь авууштай зан гэж санагддаг даа” гэсэн юм. Харин тэрээр ангийн охин Б.Ариунтунгалагийн талаар “Мариунаа(ангийнхний дууддаг нэр) чинь лаг тооцоотой. Санхүү Эдийн засгийн нягтлан бодохын ангид сурч баймаар аж ахуйч байрын хүүхэд, лаг хөөрхөн охин” гээд инээмсэглэлээ. Мөн реклам, клипэнд тоглодог жүжиглэх авъяастай манай ангийн бас нэгэн авьяастан бол Уранзаяа юм. Тэр болоогүй Bodybuilding-ийн спортоор хичээллэдэг. Түүний талаар Сти “Уранзаяа бид хоёр нэг баг болж хамт нэвтрүүлэг хийж байсан. Тэр нэвтрүүлэг маань жаахан амжилт муутай явчихсан. Даарч хөрч хийсэн тэр нэвтрүүлэг бидний хувьд маш үнэ цэнэтэй зүйл” гэлээ.
Нэг анги байлаа гээд нэгнээ төгс мэдэх албагүй. Манай ангийн Ж.Байдангүнсэл гуравдугаар курст орсон Ярианы ур чадвар гэх хичээл дээр өөрийн уртын дуу дуулах авьяасыг анх удаа бидэнд үзүүлсэн юм. Энэ талаар ангийн дарга У.Цогтбилэг “Манай Ж.Байдангүнсэл даруухан, өөрийнхөөрөө охин. Ярианы ур чадварын хичээл дээр хүүхэд бүр авьяасаа үзүүлэхэд уртын дуу дуулсан. Тэр үед Байдаа гэдэг хүний дотоод сэтгэлийг дуугаар нь мэдэрсэн юм шиг надад санагддаг даа. Ээжийн тухай маш сайхан дуу байсан. Байдаагийнхаа ирээдүйн амьдралд нь амжилт хүсье” гэлээ. Түүнчлэн тэрээр ангийн найз Аминагийн талаар ярьсан юм. Сийрүүлбэл “Манай ангийн Б.Амина маш цоглог, галзуу. Хэлье гэснээ хэлчихдэг. Анх компьютер зааж өгч, найзалж байлаа. Тэр үеэс өдий хүртэл нэлээд олон жил өнгөрч дээ” гээд тааз руу ширтлээ.
Одоо ангийнхаа миссийн талаар ярья. Манжуурын миссийн тэмцээнээс эхлээд чамгүй олон уралдаанд оролцож байсан ангийн сор болсон охин бол Ундрах юм. Р.Сэргэлэнгийн ярьснаар бол “Ундрах манай ангийн үзэсгэлэнтэй охидуудын нэг. Манай ангийн нүүр царай, сор болж чаддаг охин. Олон миссийн тэмцээнд оролцож байсан. Зарим мисс охидууд хичээлдээ муу байдаг. Харин Ундрах маань миссийн тэмцээндээ орох үедээ орно, урлаг спортоор явах үедээ явна. Тэгсэн мөртлөө хичээлдээ чамгүй сайн. Маш дайчин охин доо” гээд үргэлжлүүлэн Б.Анужингийн талаар ярив. Тодруулбал, “Б.Анужин ангиас хамгийн их checking хийдэг хүүхэд байсан. Маш олон газраар явсан. Монгол кофе шопуудыг бараг дуусгасан байх. Одоо баристагийн хэмжээнд дөхөж очсон байх гэж найдаж байна” гээд хөхөрлөө. Түүнчлэн манай ангийн Өрнөхжаргал гэж тал бүрийн авьяастай, өөртөө итгэлтэй охин байсан. Ер нь ангийнхаа охидын талаар ярих сайхан.
БАГШ НАРТАА БАЯРЛАЛАА
ХИС-ийн сэтгүүл зүй медиатехнологийн багш нартаа шавь нар бид маш их талархаж явдаг. Л.Ариун багш, Д.Дагиймаа багш болон Б.Түвшинтөр багш нар маань бидний мэргэжлийн ур чадвар болоод хувь хүн болж төлөвшихөд ихээхэн хувь нэмэр оруулсан. Манай тэнхимээс гуравдугаар курсийн оюутнуудаа жил бүр экологийн аялалд авч явдаг. Энэ бол манай ангийнхны оюутан цагийн хамгийн сайхан дурсамжуудын нэг болж үлджээ. Эрээн хот, Замын-Үүд сумын хоорондын ялгаа, цөлжилт гээд тулгамдсан асуудлуудыг бид хөндөж радио, телевизийн нэвтрүүлэг болон нийтлэл туурвисан. Өдгөө бид өөрсдийн салбартаа хувь хувьдаа хичээж явна. Цаашдаа манай ангиас мундаг хөтлөгч, сэтгүүлч, нийтлэлч, зохиолчид төрөн гарна гэдэгт итгэлтэй байна.