Ардчилсан намын ҮЗХ-ны ээлжит бус 46 дугаар хурал Төрийн ордонд энэ сарын 20-нд болох байсан ч тодорхойгүй хугацаагаар хойшлуулсан юм. Хурал хойшилсон шалтгааныг тайлбарлахдаа Ардчилсан нам Засгийн газраа авч үлдэхийн тулд ҮЗХ-ны ээлжит бус хурлаа хойшлуулсан гэж байсан. Энэ тухай АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр хэлэхдээ “Манай нам Үндэсний зөвлөлдөх хорооны хурлаа хийх амархан. Харин Засгийн газраа авч үлдэнэ гэдэг ҮЗХ хуралдахаас илүү чухал” хэмээж байв.
Ард түмэн ч ээлжит сонгууль болоход зургаахан сар үлдсэн учраас Засгийн газрыг тогтвортой ажиллуулах нь зүйтэй гэж үзэж буй. Засгийн газрыг огцруулах нь эдийн засагт, түүнийгээ дагаад иргэдийн амьдралд хүндээр тусдаг гэдгийг хэн хүнгүй мэднэ. Тиймээс АН Засгийн газрын тогтвортой байдлыг чухалчилж, ирэх гуравдугаар сар хүртэл ҮЗХ-ны хурлаа хойшлуулсан гэж эх сурвалж өгүүлж байна.