“Монголын Чопперчин ахан дүүс” холбооноос санаачлан “Талын салхи” мото наадмыг энэ сарын 11-12-нд Цонжин болдогт зохион байгуулна. Тус наадам нь энэ жил хоёр дахь жилдээ болох юм. Дээрх холбооны ерөнхийлөгч С.Сүхбаяр “Энэхүү наадмын онцлог нь мотоциклийн спорт манай улсад ямар түвшинд явж байгааг харуулах, мотоспортыг сурталчлах, гадны клубуудтай хамтран ажиллах зорилготой. Энэ жил гадаадын 100 гаруй хүн ирж оролцохоор мэдүүлгээ өгсөн ” гэв. Тэд цаашдаа Азидаа томоохон мото наадам болгон өргөжүүлэх зорилготой байгаа юм билээ. Мото наадам Дүнжингарав худалдааны төвийн авто зогсоолоос хөдлөх юм байна.
Өнгөрсөн жил болсон мото наадамд 400 гаран мотоциклийн парад Дүнжингарав худалдааны төвийн өмнөх талбайгаас эхлэн Нарны замаар дайран Хүй долоон худгийг зорьж байсан. Парадад чоопер, спорт загварын мотоцикл, дөрвөн дугуйт, гурван дугуйт гэх мэт бүхий л төрлийн мотоциклчид хотын гудамжаар явж, мото сонирхогч залууст замын хөдөлгөөний дүрмийн талаар мэдлэг олгох сурталчилгаа хийж байсан юм. Монголд болсон энэ парадад оролцохоор ОХУ-аас 60 гаруй чооперчин ирж байв.