Хөл хөдөлгөөн ихтэй Улаанбаатар хотын хүүхэд, залуус амьдарч буй орчиндоо сэтгэл хангалуун бус байгаа нь нийгмийн нэг бухимдал төрүүлсэн асуудал юм. Ажлын цагтайгаа уралдан алхах залуусын төлөөллөөс ямар орчин тэдэнд хэрэгтэй талаар сэтгэгдлийг нь сонслоо.
Автобусны буудал дээр зогсох хөвгүүд цагийн төлбөр боломжийн бүх төрлийн хөгжим, хөгжөөнт тоглоом бүхий байгууламжтай болчихвол бидэнд хэрэгтэй хэмээн ярьж байлаа.
Мөн амьдрах тохитой орчин, ажлын байр, цалин хөлсөө шийдвэрлэчихвэл орон нутгийг зорих хүсэлтэй залуус ч цөөнгүй байгаа аж. Эцэст нь бяцхан иргэдийн хүсэл хоггүй орчин гэнэ.
ИРГЭДИЙН БАЙР СУУРИЙГ СОНСЛОО
Иргэн Л.Р: Иргэдийн дийлэнх хувь нь залуус учир залуусын хот гэж боддог. Харин ээлтэй гэж боддоггүй. Ер нь л чөлөөт цагаа зөв боловсон өнгөрөөх газар ч байхгүй шүү дээ. Цаг нь боломжийн мөнгө төлөөд хөгжим дардаг ч юм уу, сонирхолтой тоглоом тоглож болох газар нээгдчихвэл ч…
Иргэн Б.Батбаатар: Улаанбаатар хот амьдрахад иргэддээ ээлтэй хот биш шүү дээ. Цалин гэхэд л өдрийн 50 мянган төгрөг. Үнэндээ юу ч авч хүрэхгүй мөнгө. Түүгээрээ байр түрээсэлнэ. Түрээсийн байрнууд нь бохир. Оронгуут л жоом, хорхой гээд байхгүй зүйл байхгүй.
Иргэн Ө.Өсөхбаяр: Чөлөөт цагаа өнгөрүүлэх газрууд нь ихэвчлэн зун л нээгддэг. Өвөл гэвэл ПС тоглоомын газар л байдаг. Кофе шоп гээл өртөг өндөртэй газар суухаар зарлага өндөр байдаг. Тиймээс төв номын сангаас өөр хичээл хийх газар нээвэл хэрэгтэй.
Иргэн н.Цолмон: Манай хот залууст ээлтэй биш. Хаа сайгүй шороо тоос ихтэй. Харшил, өвчлөл их байдаг. Хэрэгтэй газар гэвэл ногоон байгууламж л их байвал зүгээр.
Иргэн Номин-Эрдэнэ: Автомашинаа явган хүний зам дээр байрлуулчихдаг. Мөн тоглоомын талбай дээр тамхи татсан хүмүүс их байдаг.
Иргэн Н.Жигүүр: Ядаж л зам талбай, орон сууцныхаа хоорондын зайг бодолцоогүй байна шүү дээ
Иргэн Д.Анар-Эрдэнэ: Залуу гэр бүлээ дэмждэггүй. Залуу гэр бүлээ дэмжээд хөдөө орон нутаг руу явуулна гэдэг хэр нь бодитой арга хэмжээ авдаггүй. Ажлын байр байдаггүй. Амьдрах байр, орон сууц шийдвэрлэх хүртэл хэцүү байдаг. Орон нутагтаа амьдрах тохитой орчин, ажлын байр, цалин хөлсөө шийдвэрлэчихвэл орон нутгийг зорих хүсэлтэй залуус ч цөөнгүй байгаа байх. Хотод агаарын бохирдол, өвчлөл ихтэй учир хүүхдээ орон нутагт байлгаж хол амьдардаг.
Иргэн Л.А: Бараг л залуучууддаа ээлгүй хот ш дээ. Хамгийн эхэнд ядаж түгжрэлээ арилгачихмаар байна.
Долон настай н.Ирээдүй: Байгаль орчиндоо хог хаяхгүй байвал бид эрүүл агаарт тоглоно.
Т.САНЧИРМАА