Манай улс АНУ руу шууд нислэгтэй болохоор яриа хэлэлцээ хийж байна. Энэ хавар OPEN SKY хэлэлцээрийг үзэглэсэн. Ерөнхий сайд Л.Оюун-Эрдэнэ АНУ-д айлчлах үеэр хэлэлцээрт гарын үсэг зурснаар хүчин төгөлдөр хэрэгжиж эхлэх юм. Энэхүү ажлын хүрээнд Зам, тээврийн хөгжлийн сайд С.Бямбацогт АНУ-ын Холбооны нисэхийн захиргааны Хойд Азийн бүс хариуцсан ахлах төлөөлөгч Ноэл Арбис, гадаад харилцааны мэргэжилтэн Ёлында Кю нартай уулзаж, санал солилцжээ.
Уулзалтаар талууд хоёр улсын хооронд шууд нислэг хийх бэлтгэл ажлыг шуурхайлахад анхаарч ажиллахаа илэрхийлсэн байна. Энэ талаар Зам, тээврийн хөгжлийн сайд С.Бямбацогт хэлэхдээ “Ази дахь ардчиллын арал болсон манай улсын хувьд гуравдагч хөрш болсон АНУ руу шууд нислэгтэй болох нь улс төр, нийгэм эдийн засгийн хувьд онцгой ач холбогдолтой. АНУ-д ажиллаж амьдарч буй 50 гаруй мянган монгол иргэний маань хувьд ч, үндэсний авиа компаниудын хөгжилд ч, иргэдийн цаг хугацаа, зардал мөнгийг хэмнэхэд шууд нислэг өгөөжөө өгнө” гэлээ.