Нийгмийн даатгал, Эрүүл мэндийн даатгалын сангийн хөрөнгөтэй холбоотой асуудал болон цаг үеийн асуудлаар Монголын Үйлдвэрчний Эвлэлийн Холбоо(МҮЭХ)-ноос өнөөдөр мэдээлэл хийлээ.
МҮЭХ дараах шаардлагыг тавьж байна. Үүнд,
- Нийгмийн даатгал, Эрүүл мэндийн даатгалын Капитал банкнаас авах авлагын талаар нээлттэй сонсгол хийх, тус банкнаас зээл авсан хүмүүсийн нэрсийг ил тод мэдээлэх
- Нийгмийн даатгал, Эрүүл мэндийн даатгалын сангийн мэдээллийг нээлттэй ил тод байршуулах
- Хөгжлийн банкны зээлдэгчдэд хариуцлага тооцох, хүү алдангийг төлүүлэх, хуульд өөрчлөлт оруулах
- Гааль, ААН, хууль хяналтын байгууллагад хяналт шалгалт оруулах, уг системд өмнө нь ажиллаж байсан, байгалийн баялгийг хяналтгүй гаргасан хүмүүст хариуцлага тооцох
- Нүүрсний хулгайн мөнгөний хүү алдангийг тооцож төсөвт зарцуулж, цалин мөнгө нэмэх
- Иргэдийн 1072 хувьцаанд ногдол ашгийг өгөх тухай багтжээ.
МҮЭХ-ны Ерөнхийлөгч С.Эрдэнэбат “Иргэд Нийгмийн даатгал, Эрүүл мэндийн даатгалынхаа мөнгийг чадан ядаж төлж байдаг. НД, ЭМД, нийтийн сангийн тайланг олон нийтэд мэдээлэхийг хүсэж байна.
Мөн Хөгжлийн Банкны мөнгө ялгаа байхгүй бидний мөнгө. Тэгэхээр нэг хэсэг шуурч байгаад хаяж болохгүй. Иймд нийтийн сангууд, төрийн батлан даалттай сангуудаас зээл авсан хүмүүс хүү алдангиас чөлөөлөгддөггүй байх. Хуулиар дамжуулж хэдэн их наяд, тэрбумын хулгай хийж байгааг засах цаг болсон. Зээлийн тухай хууль, Банкны тухай хуульд өөрчлөлт оруулж, нийтийн сангаас мөнгө авчхаад өгөхгүй байгаа хүмүүст эрүүгийн хариуцлага хүлээлгэж, асуудлыг шийдэх хэрэгтэй байна.
Дараагийн нэг асуудал нь нүүрсний хулгай. Миний дуулснаар УИХ-ын 10-20 гишүүн өмгөөлж хамгаалж, нүүрсний сүлжээгээ хэвээр байлгахыг хүсэж байна гэдэг зүйл сонсогдсон. Нүүрсний мафийг дийлэхгүй гэж ярьдаг гэсэн. Бүр сүлжээ болчихсон юм байна. Монгол Улс баялгийн хараал хүртчихжээ. Маш их баялагтай мөртлөө иргэд нь ядуу байна. Татвараа авч чадахгүй, баялгаа зөв зохистой удирдаж чадахгүй байна. Энэ бол хоосон улс төржилт биш. 100 тонны нүүрс гарч байхад нүдээ аньж өнгөрөөнө гэж байх уу.
Шилний цаанаас чихэр долоолгож хэсэг хүмүүс нь хагартлаа баяжиж байна” гэлээ.