Түрүүч нь №194 (7067) дугаарт
“Ховд эко цемент” үйлдвэрийн чулуунцар үйлдвэрлэх хэсэгт гал өгөх ёслолын үеэр албаны хүмүүсийн байр суурийг сонслоо.
Үйлдвэрийн Ерөнхий инженер Д.Батсүрэн: Чулуунцрын чанар ямар гарна, цементийн чанар түүнээс шууд хамааралтай байдаг
-Цементийн үйлдвэр үндсэн хоёр хэсэгтэй. Нэгдүгээрт, чулуунцар үйлдвэрлэх хэсэг. Хоёрдугаарт цемент үйлдвэрлэх хэсэг гэж бий. Цементийн үйлдвэрийн гол зүрх гэж нэрлэгддэг эргэх зуухыг ашиглалтад оруулж, гал асаах ёслол болж байгаа юм. Чулуунцрыг үйлдвэрлэхийн тулд шохойн чулуу, шавар түүхий эд, төмрийн хүдэр гэх мэтчилэн 3-4 төрлийн түүхий эдийг ашигладаг. Эдгээр түүхий эдийг тус тусад нь бутлаад, нунтаглаад нэг төрлийн найрлагатай болгоод 900 градуст хүртэл халаагаад эргэх зууханд 1500 градуст шатааж гаргаж авсан хагас боловсруулсан бүтээгдэхүүнийг чулуунцар гэж нэрлэж байгаа юм. Чулуунцрын чанар ямар гарна, цементийн чанар түүнээс шууд хамааралтай байдаг. Гаргаж авсан чулуунцрыг гөлтгөнөтэй хольж тээрэмдээд цемент гаргаж авдаг.
Ийм дараалалтай. Эргэх зуух нь 3.2 метрийн диаметртэй, 50 метрийн урттай төхөөрөмж. Галлаж асаахын тулд эхлээд дизель түлшээр галлана. 24-48 цаг үргэлжилдэг процесс. Зуух болон бусад халаалтын системүүдээ халааж байгаад дараа нь 5500-6000 килкалори илчлэгтэй нүүрсээр шатааж байж эргэх зуухандаа орж ирсэн түүхий хольцыг 1500 градуст шатааж чулуунцраа гаргаж авдаг юм. Эргэх зуух бол ган төмөр. 1500 градусын халууныг энэ төмөр дангаар даах боломжгүй учраас дотор нь галд тэсвэртэй тоосгоор доторлосон байдаг. Галлагааны явцад доторлогооны тоосгоо мөн халуунаас хамгаалахын тулд наалдас үүсгэдэг. Ингэж байж бид зуухныхаа гадна корпусыг өндөр температураас хамгаалдаг. Хэрвээ зуух жигд ажиллаад байвал доторлогооны тоосго, галд тэсвэртэй материалын маань эдэлгээ уртасдаг. Ойр ойрхон зогсоож, дахин дахин асаагаад байвал доторлогооны материалын эдэлгээ богиносдог. Тиймээс энэ зуухаа аль болох тасралтгүй ажиллуулж байвал аль аль талдаа ашигтай.
“Нью Прогресс” группийн ерөнхийлөгч, “Вестерн холд” ХХК-ийн гүйцэтгэх захирал С.Балжинням: Манай хамт олон 3-4 жилийн турш тасралтгүй ажилласны үр дүн гарч байна
-Өнөөдөр бид үйлдвэрийнхээ чулуунцар үйлдвэрлэх хэсгийг ашиглалтад оруулж нээж байна. Гурав, дөрвөн жилийн хугацаанд бид өдөр болгон, өвөл ч гэлтгүй, зун ч гэлтгүй, хавар ч гэлтгүй тасралтгүй ажиллалаа. Тэрний хүчинд үр дүн маань гарч байна. Ажлын байрны хувьд энд байнгын 320 орчим ажлын байрыг бий болгоно. Цементийн үйлдвэр маань баруун бүс буюу Ховд, Увс, Завхан, Говь-Алтай, Баян-Өлгий гэсэн таван аймгийг хангах зорилготой.
Ховд аймагт нэг тонн цемент 700 мянган төгрөг байна. Тэгсэн мөртлөө олдоцгүй байна. Барилга, бүтээн байгуулалтын ажлууд зогсчихсон байна. Манай үйлдвэр ашиглалтад орсноор Улаанбаатарын түвшинд цементийн үнийг аваачна гэсэн зорилготой байгаа.
Төслийн удирдагч С.Жавхланбаатар: Бид чадлаа
-Алслагдмал хязгаар нутаг, таван аймгийн ард иргэдийн хувьд дараа жилээс хямд цемент худалдан авах ийм баярт мөч гэж харж байна. Цар тахал хүнд нөлөөлсөн. Бүхий л аж ахуйн нэгжүүдэд нөлөөлсөн байх. Ялангуяа ийм том төсөл хэрэгжүүлж байгаа,
хүч их орсон, техник машин их орсон, маш их масс-тээврийг хилийн гаднаас, Улаанбаатараас тээвэрлэсэн ийм төслийн хувьд хүндээр нөлөөлсөн. Барилгын зарим бараа материал гурав, дөрөв дахин өсчихлөө. Цемент хомсдоод олдохоо байлаа. Ямар ч өндөр үнээр олж авч чадахаа болилоо. Гэх мэт зүйлс сөргөөр нөлөөлсөн ч бид чадлаа гэж бодож байна.
Ховд аймгийн Засаг дарга Э.Болормаа: МонголУлсадүйлдвэржилт явагдаж буйнтоджишээ бол“Ховдэко цемент” үйлдвэрболж байна
-Өнөөдөр Ховд аймагт цементийн үйлдвэрийн зуух галлах ёслол болж байна. Сарын дараа цементийн үйлдвэрлэл эхэлнэ гэсэн тооцоололтой байгаа. “Ховд эко цемент” үйлдвэрийн хувьд шинэ сэргэлтийн бодлогын Аж үйлдвэржилтийн сэргэлтийн хүрээнд хувийн хэвшлийн хамтын ажиллагааны хүрээнд үйлдвэржилт Монгол Улсад явагдаж байна гэдгийн тод жишээ болж байна. Ховд аймагт нэг шуудай цемент 30-35 мянган төгрөгийн үнэтэй байна. Хотоос бараг хоёр дахин үнэтэй гэсэн үг. Энэ бол ганц Ховд аймгийн асуудал биш. Баруун таван аймагт ийм асуудал бий. Хөдөө орон нутагт бүтээн байгуулалт явуулахад хамгийн их шаардлагатай, гол орц болох цементийн үнэ буурна гэдэг бол цаашид баруун таван аймгийн хөгжилд нэн чухал хамааралтай юм.
Барилга, хот байгуулалтын яамны Төрийн нарийн бичгийн дарга С.Магнайсүрэн: Монгол Улс жилд хоёр сая тонн цементийн хэрэглээтэй
-Цемент бол барилгын материал дотроо гол байр суурийг эзэлдэг. Материалын өртөг дотроо 20 орчим хувийг эзэлдэг. Барилгын талх гэж нэрлэдэг. Монгол Улсын хувьд суурилагдсан хүчин чадлаараа 4.1 саяын хүчин чадалтай цементийн дөрвөн том, нэг жижиг үйлдвэр ажиллаж байна. 2018 оны байдлаар сая хүрэхгүй тонн буюу 950 мянга орчим тонны хэрэглээтэй байсан бол 2022 оны эхний байдлаар үзвэл 1.8 сая тонн хэрэглээтэй. Өнөөдрийнхөөр үзвэл хоёр сая тонн энгийн хэрэглээтэй болсон. Тийм учраас цемент үйлдвэрлэл, үйлдвэрийг дэмжих, хямд, найдвартай, тасралтгүй бүтээгдэхүүнээр хангах нь манай барилгын салбарт чухал байна. Баруун бүсийн Ховд эко цемент” үйлдвэрийг Монгол Улсын Засгийн газрын үйл ажиллагааны хөтөлбөр, бусад бодлогын баримт бичигт заасны дагуу Барилга, хот байгуулалтын яамнаас дэмжиж, Хөгжлийн банкнаас багагүй санхүүжилт гаргаж дэмжсэний үр дүнд ийнхүү цементийн үйлдвэр нээлтээ хийж байна. Манай яамнаас жил болгон барилгын материалын үнийн индескийг баталдаг. Цементийн өсөлт хэвийн явж байсан бол өнөө жилийн хувьд огцом өсөлт ойр ойрхон гарлаа. “МАК цемент” үндсэндээ хоёр дахин өсгөчихсөн байгаа. Шударга өрсөлдөөн, хэрэглэгчийн төлөө газрын зохих шалгалтын үр дүнд харьцангуй буулгаад 430-450 мянган төгрөг болгосон бол “Евро цемент” тэрнээс харьцангуй бага үнийн дүнтэй.
“Хөтөл цемент” үнээ нэмээгүй, хуучин үнээр боловч бүтээгдэхүүнээ тасралтгүй нийлүүлж чадахгүй байна. Ийм нөхцөлд баруун бүсийг хямд, найдвар цементээр хангах асуудал их чухал байна. Яг энэ боломж дээр “Ховд эко цемент” үйлдвэр нээгдэж, чулуунцрыг зуухаа галлаж эхэлж байгаа нь 11 дүгээр сар гэхэд түрүүчийн бүтээгдэхүүнээ гаргах бололцоо бүрдэж байна гэж харж байна