Дорнод аймгийн хэмжээнд ургац хураалт 52.5 хувьтай үргэлжилж байна. Тодруулбал, өнөөдрийн байдлаар улаан буудай 15830 га-аас 18102 тн, төмс 145 га-аас 1189.2 тн, хүнсний ногоо 115 га-аас 800 тн, бусад үр тариа 950 га-аас 1184 тн, тосны ургамал 2900 га-аас 1245 тн, малын тэжээл 110 га-аас 500 тн-ыг хураан авчээ.
Ургац хураалтад 190 хүн, буудайн тээвэрт л гэхэд 68 машин, мөн төмс, хүнсний ногооны 34 аж ахуйн нэгж байгууллага, 1243 өрхийн тариалан эрхлэгчид ажиллаж байна гэж ХХААГ-аас мэдээлэв.
Аймгийн ХХААГ-аас оюутан сурагчид, хугацаат болон гэрээт цэргийн албан хаагчдыг ургац хураалтад ажилуулах захиалгыг үр тариа, төмс, хүнсний ногоо, малын тэжээл гэсэн чиглэлүүдээр авч, 250 хүн хүч шаардлагатай гэсэн судалгааг гаргасан байна.
Монгол Улсын Засгийн газрын 2022 оны 7 дугаар сарын 20-ны өдрийн 276 дугаар тогтоолын хүрээнд Дорнод аймаг дахь Политехник коллежийн 165 оюутан намрын ургац хураалтын ажлыг гүйцэтгэж байгаа аж. Тус сургууль нь нийгмийн түншлэл, хамтын ажиллагааны хүрээнд “Дорнод гурил” ХХК, “Найнги” ХХК, “Сүүн Зээрд” ХХК, “Нарс мод” ХХК, “Галт-Өд” ХХК, “Алтай агро” трейд зэрэг компани оюутнуудыг хуваарилан ажиллуулж байгаа юм.