Хөнгөлөлттэй эмийн цахим жор бичих журмыг шинэчилжээ. Ингэснээр 9-р сарын 1-нээс эхлээд дөрвөн ангиллын эмийг шат шатны эмнэлэгийн эмч нар журамд заасны дагуу өвчтөнд бичиж өгөх боломж бүрдэж буй. Өмнө нь зөвхөн өрх, сум, тосгоны буюу анхан шатны эрүүл мэндийн байгууллагын эмч нарын бичсэн эмийг хөнгөлөлттэй олгодог байсан. Тэгвэл өнгөрсөн онд Эрүүл мэндийн даатгалын тухай хуульд нэмэлт өөрчлөлт оруулж бүх шатны эрүүл мэндийн байгууллагын эмч хөнгөлөлттэй эмийн цахим жорыг бичих боломжтой болжээ.
ХӨНГӨЛӨЛТТЭЙ ЭМИЙН ЦАХИМ ЖОР БИЧИХ ЭРХТЭЙ ЭМЧ
- Өрх, сум, тосгоны ЭМТ, клиникүүд А, В ангиллын эм
- Нэгдсэн эмнэлэг
- Хэвтрүүлэн эмчлэх ортой клиник
- Амаржих газар, тусгай эмнэлгүүд С ангиллын эм
- Төрөлжсөн мэргэшлийн эмнэлэг D ангиллын эм
Орон нутгийн хувьд орон зай, ажиллаж байгаа хүний нөөц гээд нөхцөл байдлыг харгалзан үзэж, хөнгөлөлттэй эмийн цахим жорыг зарим тохиолдолд заавал аймгийн эмнэлэг рүү явах шаардлагагүй байхаар зохион байгуулалт хийх боломжтой гэлээ.
2021 оны эцсийн дүнгээр 2.3 сая даатгуулагч давхардсан тоогоор 60.7 тэрбум төгрөгийн эмийн хөнгөлөлт эдэлжээ.