Үлэг гүрвэл устах болсон талаар “66 сая жилийн өмнө дэлхийг аварга том солир ирж мөргөсний улмаас их тоос шороо, утаа май босч нарыг халхалснаас болсон” гэсэн таамгийг сонсоогүй хүн ховор биз ээ. Тэгвэл энэ таамагтай холбоотой маш сонирхолтой олдворыг эрдэмтэд олон нийтэд дэлгэхэд бэлэн болжээ.
Олдвор нь арьстайгаа хамт хадгалагдаж үлдсэн үлэг гүрвэлийн хөл хэсэг бөгөөд аварга том солир дэлхийг ирж мөргөсөн /үлэг гүрвэл мөхөж, хөхтөн амьтан ноёрхоход хүргэсэн/ тэр өдөр үрэгдсэн гэж эрдэмтэд танилцуулж байгаа юм. Энэ гайхамшигтай олдвор АНУ-ын Хойд Дакотагийн Танис орчмоос олджээ. Олдворыг олон нийтэд танилцуулахын тулд гурван жилийн турш бэлдсэн бөгөөд ВВС агентлаг энэ бүх хугацааны турш баримтат кино бэлтгэснээ энэ сарын 15-нд олон нийтэд цацах юм байна.