Гаитийн иргэд хүн хулгайлах гэмт хэргийн эсрэг жагсаж байна. Лес Кайес хотод жагсаалд оролцогчид өчигдөр /2022.03.29/ АНУ-ын номлогчдын буюу “Агапе Флайс” бүлэглэлийн онгоцыг шатаасан гэж орон нутгийн хэвлэлүүд мэдээлэв. Агапе Флайс нь Карибын тэнгисийн орнууд руу шуудан болон хүмүүнлэгийн бараа илгээдэг, Флоридад төвтэй номлогчдын бүлэг юм.
Цагдаа нар жагсагчид руу нулимс асгаруулагч хий цацсан ч тэд нисэх онгоцны буудал руу нэвтэрсэн байна. “Cayes Infos” цахим хуудсаар цацагдсан бичлэгээс харвал, жагсагчид олноороо нийлэн, онгоцыг цардмал зам руу түлхэн гаргажээ. Дараа нь нисэх буудлын ойролцоох гудамжинд тус онгоцыг шатаасан бололтой. “Агапе Флайс” бүлэглэлийнхнээс гэмтэж бэртсэн хүн байхгүй бөгөөд хүмүүсээ аюулгүй газар руу буцаахаар бэлтгэж байгаа аж.
Жагсагчид яагаад заавал онгоцыг онилсон нь тодорхойгүй байна. Жагсаал анх тайван замаар эхэлсэн боловч идэвхтнүүд Хенригийн засгийн газраас хүчирхийлэл, тэр дундаа хүн хулгайлах гэмт хэргийн эсрэг арга хэмжээ авахыг шаарджээ.
