Нэгдүгээр сард Аргентин улсад инфляц 50.7 хувь байсан бол хоёрдугаар сард 52.3 хувь болж нэмэгджээ. Инфляц ийнхүү нэмэгдсэн нь тус улсад ган гачиг болж үр тарианы үйлдвэрлэлд сөргөөр нөлөөлж эхэлсэнтэй холбоотой юм. Учир нь тухайн улс шар буурцагны экспортлогчоор дэлхийд нэгдүгээрт, эрдэнэ шиш гаргадгаараа хоёрдугаарт ордог байна. Харин үр тариа хомсдож үнэ нь өссөнөөр экспортоос олох орлого нь багасжээ. Иймд тус улсын Төв банк бодлогын хүүгээ нэмэгдүүлж 44.5 хувь болгосон юм.
Өнгөрсөн долоо хоногт Аргентины Ерөнхийлөгч Альберто Фернандес инфляцыг тогтворжуулахын тулд шаардлагатай бүхий л арга хэмжээг авч хэрэгжүүлнэ гэж мэдэгдэв. Энэхүү арга хэмжээний хүрээнд Засгийн газар үр тарианы зарим бүтээгдэхүүнд экспортын хязгаар тогтоож, зарим хүнсний бүтээгдэхүүнд үнийг царцаах болжээ.