Categories
мэдээ нийгэм

Европын Холбоо “Эдийн засгийн ногоон шилжилт” төслийг хэрэгжүүлж эхэллээ || DNN.mn

Европын холбоо манай улсын хүнс, ус, ундаа үйлдвэрлэлийн салбарт ногоон эдийн засгийн сайн туршлагыг нэвтрүүлэхэд дэмжлэг үзүүлэхээ мэдэгдэж байна.

Өнгөрсөн хугацаанд цар тахлын улмаас нийгэм, эдийн засагт үзүүлж буй сөрөг үр дагавар гүнзгийрч, ялангуяа бараа материал, түүхий эд, хүнсний бүтээгдэхүүний импорт буурсантай холбоотойгоор Монгол Улсын хэмжээнд хүнсний хомсдол үүссэн. Хүнс, ундааны үйлдвэрлэл импортоос өндөр хамааралтай байгаа нь үндэсний хэмжээний эрсдэл дагуулж буй тул, цаашид газар тариаланд суурилсан хүнс, ундаа үйлдвэрлэлийн салбарыг бие даасан болгож бэхжүүлэх хэрэгцээ шаардлага өндөр байгаа.

Тиймээс Европын Холбооны “Switch Asia programme” хөтөлбөрийн 1.76 сая еврогийн санхүүжилтээр хэрэгжих “Эдийн засгийн ногоон шилжилт” төслийн хүрээнд газар тариаланд суурилсан хүнс, ус, ундааны үйлдвэрлэл эрхэлдэг бичил, жижиг, дунд үйлдвэрлэгч, борлуулагчдыг доорх арга замаар дэмжиж ажиллах төлөвлөгөөтэй байгааг мэдэгджээ. Үүнд:

  • Бичил, ЖДҮ, борлуулагчдын бүтээгдэхүүн үйлчилгээг ногоон шошготой болгон баталгаажуулах,
  • Тэдэнд чиглэсэн ногоон санхүүжилтийн хүртээмжийг нэмэгдүүлэх,
  • Илүү байгальд ээлтэй, үр ашигтай ажиллах, эдийн засгийн сайн туршлагыг дэлгэрүүлэх юм.

Хэрэглэгчдийн дотоодод үйлдвэрлэсэн ногоон шошготой хүнс, ус, ундааны худалдан авалт нэмэгдсэнээр үндэсний үйлдвэрлэл хөгжих, үндэсний үйлдвэрлэгчдийн тогтвортой байдал хангагдах суурь нөхцөл бүрдэнэ гэж үзжээ.

“Эдийн засгийн ногоон шилжилт” төсөл нь 2030 он гэхэд хүлэмжийн хийн ялгаралтыг 22,7 хувиар бууруулах Парисын хэлэлцээрийг хэрэгжүүлэх Үндэсний хэмжээнд тодорхойлсон зорилтод хувь нэмэр оруулах, Монгол Улсын газар тариалангийн гаралтай хүнс, ус, ундаа үйлдвэрлэлийн салбарт хэрэгжиж буй “Свич Эйшиа” хөтөлбөрийн анхны төсөл юм.

Тус төслийг Пипл ин Нийд (ПИН), Каритас Чех репаблик (КЧР) болон Монголын Тогтвортой санхүүжилтийн холбоо (ТоС), “Хөгжлийн шийдэл” ТББ-ууд хамтран хэрэгжүүлж хүнс, ус, ундаа үйлдвэрлэдэг 1500 бичил, ЖДҮ, энэ чиглэлээр ажилладаг бизнесийн 30 холбоо болон 750 борлуулагчидтай ажиллах юм.

Энэхүү төсөл нь “Европын холбооноос дэвшүүлсэн Монгол Улсын ногоон хөгжлийг дэмжих зорилтыг бодитоор хэрэгжүүлэхэд чухал түлхэц болж байна. “Эдийн засгийн ногоон шилжилт” төсөл нь байгаль орчны тогтвортой байдалд эерэг нөлөөтэй хүнсний нийлүүлэлтийн сүлжээг дэмжиж Монгол Улсад үйлдвэрлэсэн хүнс, ундааг сурталчлах болно” гэж Европын холбооноос Монгол Улсад суугаа Онц бөгөөд Бүрэн эрхт Элчин сайд Аксель Никейз төслийн талаар дүгнэн хэлж байна.

“Монгол Улсын Засгийн газрын зүгээс манай орны эдийн засгийг ногоон болгоход үзүүлж буй Европын Холбооны дэмжлэг, хүчин чармайлтыг өндрөөр үнэлж байна. Бид “Эдийн засгийн ногоон шилжилт” (СОГЭ) төслийн хүрээнд нэвтрүүлэх Европын холбооны “Тариаланчаас таны ширээнд” стратегид суурилсан ногоон шошгожуулалтаар дамжуулан БЖДҮ, бизнесүүдийг ногоон шилжилт хийхэд нөлөө үзүүлэх энэхүү төсөлтэй нягт хамтран ажиллахдаа сэтгэл хангалуун байх болно” гэж БОАЖ-ын дэд сайд Г.Түвдэндорж мэдэгдлээ.

Leave a Reply

Your email address will not be published. Required fields are marked *