Нефтийн үнэ лхагва гарагт мэдэгдэхүйц буурсныхаа дараа пүрэв гарагт өссөн байна. Лондоны “ICE Futures” биржийн лхагва гаргийн арилжааны явцад “Brent” маркийн нефтийн нэгдүгээр сард нийлүүлэх гэрээний үнэ 2.5 хувиар буурч, нэг торх нь 82.64 ам.доллар болж байсан бол пүрэв гарагт 0.25 хувиар /0.21 ам.доллар/ өсөж, нэг торх нь 82.85 ам.долларт хүрчээ.
Үүний зэрэгцээ Нью-Йоркийн барааны бирж дээр (NYMEX) “WTI” маркийн нефтийн 12 дугаар сарын фьючерс үнэ 0.22 хувиар өсөж, нэг торх нь 81.52 ам.долларт хүрчээ. Харин өмнөх өдөр нь нэг торх нь 81.31 ам.доллар болж, 3.3 хувиар буурсан байна.
Нефтийн үнэ ийнхүү өсөхөд АНУ-ын инфляцын түвшин сүүлийн 30 жил байгаагүй дээд хэмжээнд хүрсэн мэдээтэй холбоотойгоор ам.долларын ханш чангарсан, түүнчлэн тус улсын нефтийн нөөц нэмэгдсэн тухай мэдээ нөлөөлсөн гэж санхүү, хөрөнгийн зах зээлийн мэдээллийн “MarketWatch” цахим хуудас мэдээлжээ.
АНУ-ын нефтийн нөөц өнгөрсөн долоо хоногт 1 сая торхоор нэмэгдэж, 435.1 сая торх болсон гэж тус улсын Эрчим хүчний яам мэдээлсэн байна. Харин шатахууны нөөц 1.56 сая торхоор буурч, 212.7 сая тор болсон байна. Шинжээчид бензиний нөөц 1.6 сая баррелиар буурна гэж таамаглаж байжээ.
АНУ мөн стратегийн нөөцөөсөө нефть зарах төлөвлөгөөгөө зогсоосон тухай мэдээ зах зээлд эергээр нөлөөлсөн гэж “Commerzbank”-ны шинжээчид үзэж байна.