Сүхбаатар аймгийн Сүхбаатар сумын Баянгол багийн “Ухаа-Овоот” гэдэг газар хээрийн түймэр гарч, зургаан га талбай газар шатжээ. Энэ тухай дуудлагыг 11 дүгээр сарын 03-ны өдрийн 11:42 цагт холбогдох байгууллагын алба хаагчид хүлээн авсан байна. Дуудлагын дагуу сумын малчид нэг цаг 32 минут ажиллаж, 13:10 цагт түймрийг бүрэн унтраажээ.
Мөн Булган аймгийн Хангал сумын Сөрт багийн “Дээд эвэртэйн адаг” гэдэг газар хээрийн түймэр гарсан тухай дуудлагыг 14:30 цагт хүлээн авчээ. Дуудлагын дагуу аймгийн Онцгой байдлын газрын Гал түймэр унтраах, аврах 50 дугаар ангийн алба хаагчид, сумын Засаг даргын Тамгын газрын ажилтнууд, орон нутгийн иргэд хоёр цаг 35 минут ажиллаж, 18:35 цагт түймрийг бүрэн унтраасан байна. Улмаар сумын Засаг даргад хүлээлгэж өгчээ. Гал түймэрт нийт 70 га талбай шатсан аж.