БНАСАУ-ыг пуужин харвасантай холбогдуулан зохион байгуулсан НҮБ-ын Аюулгүйн Зөвлөлийн хуралдаан нэгдсэн зөвшилцөлд хүрэлгүйгээр өндөрлөжээ.
БНАСАУ мягмар гарагт хойд нутгаасаа зүүн зүгт пуужин харвасан бөгөөд түүнээс нэг хоногийн дараа Пёньян шинээр бүтээсэн дуунаас хурдан “Хвасон-8” пуужингийн анхны туршилтаа хийснээ мэдэгдсэн юм.
Үүнтэй холбоотойгоор НҮБ-ын Аюулгүй Зөвлөл АНУ, Их Британи, Францын хүсэлтийн дагуу баасан гарагт яаралтай хаалттай хуралдаан хийжээ.
Энэхүү зөвлөлийг 10 дугаар сард даргалж буй, Кени улсаас НҮБ-д суугаа Элчин сайд Мартин Кимани сэтгүүлчдэд мэдээлэхдээ, хуралдаанаас мэдэгдэл гаргахгүй гэжээ. Түүний хэлснээр, хуралдааны үеэр төлөөлөгчид өөрсдийн санал бодлоо илэрхийлжээ.
НҮБ-ын эх сурвалжуудын мэдээлснээр, АНУ болон Европын гишүүд баллистик пуужин турших нь Аюулгүйн Зөвлөлийн тогтоолуудыг зөрчих тул холбогдох мэдэгдэл гаргахыг уриалжээ. Гэвч БНХАУ, ОХУ эсрэг байр суурьтай байгаагаа илэрхийлсэн байна.
Аюулгүйн Зөвлөлийн энэхүү уулзалтыг анх пүрэв гарагт товлоод байсан ч БНХАУ хуралдаан хийхэд дурамжхан байгаагаа илэрхийлсэнтэй холбоотойгоор хойшлуулсан гэдгийг эх сурвалжууд мэдээлжээ.
Тус зөвлөл есдүгээр сарын 15-нд буюу Пёньяныг баллистик пуужин харвасны дараа яаралтай хуралдсан ч мөн л нэгдсэн зөвшилцөлд хүрч чадаагүй юм.