Афганистанд талибууд засаг төрөө төвхнүүлж, ард иргэд нь талибуудын засаглал дахь шинэ амьдралаа эхлүүлэн байна. Гэхдээ харамсалтай нь, шинэ амьдралд нь сайн сайхан зүйл тун ховор байгаа гэдгийг афганистанчууд өөрсдөө ярьж байна. Тэдэнд тохиолдож буй бэрхшээл нь ядуу хоосноос үүдэлтэй бөгөөд өдгөө Афганистанд өлсгөлөн нүүрлэхэд бэлэн болжээ.
Кабулд том барилгын төслүүд бүгд зогссон тул барилгын ажил хийж мөнгө олдог ажилчдын амьжиргааны эх үүсвэр тасаржээ. Банкууд хааж, олон улсын зүгээс цутган орж ирдэг асан цорго хаагдаж, хэдхэн дусал нь л хэвээр үлдсэн байна. Өнгөрсөн хугацаанд донор орнуудаас асар их тусламж орж ирсэн ч энгийн иргэдэд хүрдэггүй замдаа алга болдог байж. Ажилгүй иргэдийн төлөөлөл Хаят Хан “Хөрөнгө чинээтэй хүмүүс өөрсдийгөө л бодохоос ядуусыг огт боддоггүй. Би өнөөдөр талх худалдаж авч чадахгүй байна. Нэг доллар ч олж чадахгүй байхад баячууд барууны тусламжийг хуваац авцгаадаг. Тусламж ирлээ гэхэд эрх мэдэлтнүүд ядууст биш, хамаатан саднууддаа л өгдөг” хэмээн ярьсан байна.