Хууль зүй, дотоод хэргийн яаманд Авлигын индексийг бууруулах ажлын хэсгийн хурал эхэллээ. Авлига, хүнд суртлыг таслан зогсоож, авлигын индексийг бууруулах зорилго бүхий Ажлын хэсгийг Хууль зүй, дотоод хэргийн сайд Х.Нямбаатар ахалж байгаа юм.
Хууль зүй, дотоод хэргийн сайд Х.Нямбаатар: Газрын албадын дарга нар өөрийнхөө удирдлага ажиллаж байгаа албан тушаалтнуудад хандлагаа өөрчилье гэдэг аяныг өрнүүлмээр байна. Хоёр байгууллага газар олголттой холбоотой асуудал хариуцаж байна. Газар олголттой холбоотой асуудал маш их асуудал үүсч байна. Цахимаар газар хэрхэн олгох вэ гэдгийг хуулинд тодорхой тусгаж өгөх хэрэгтэй. Иймээс Газар олголтын хуульд нэмэлт өөрчлөлт оруулах ажлын хэсгийг өнөөдөр байгуулна.
Амьдрал болон хууль дүрэмд нийцдэггүй газрын маргаантай холбоотой асуудал үүсдэг. Цаашид Улаанбаатар хотын төвийн зургаан дүүрэгт өрхийн хэрэглээний 0.07 га газар олгохгүй гэдгийг хуульд тусгаж өгөх хэрэгтэй. Эдгээр дүүрэгт шинэ сургууль, цэцэрлэг, цагдаагийн байгууллага, эмнэлэг барих шаардлага үүсээд байхад иргэдэд 0.07 га газар олголтыг зогсоох хэрэгтэй. Сургууль, цэцэрлэг барих гээд газар чөлөөлөлт хийхээр иргэдэд үнэгүй өгсөн газрыг буцаан авахын тулд 600 сая төгрөг өгч байгаа тохиолдол бий.
Зарим иргэд 20 жилийн турш газрын маргаан үүсгэж байна. Хашааны хаалгаа аль талаас нь гаргах вэ гэх зэрэг асуудлаар маргаан үүсгэж байна шүү дээ. Иймээс дүүргийн Засаг дарга нарт хандаж хэлэхэд газрын маргаангүй 60 хоног гэсэн аяныг өрнүүлэх чиглэлийг өгч байна.
Манай ажлын хэсгийн гол үндсэн зорилго бол гурван үндсэн зарчимтай. Нэгдүгээрт, авлигын хэрэгт холбогдсон албан тушаалтнуудыг хууль хяналтын байгууллагад шилжүүлнэ. Хоёрдугаарт, иргэдийн амьдралд чирэгдэл учруулж байгаа асуудлыг шийднэ. Тухайлбал газар олголттой холбоотой хууль эрх зүйн орчныг боловсронгуй болгоно. Гуравдугаарт, төрийн албан хаагчдын хандлагыг өөрчлөх. Энэ үүднээс 1111 төвийг идэвхжүүлж, иргэдийн санал гомдлыг хүлээн авна.