Өмнөговь аймагт мотоциклтой замын хөдөлгөөнд оролцож осол гаргасны улмаас таван иргэн нас баржээ.
Он гарснаас хойш мотоциклтой холбоотой зам тээврийн осол нийт 9 бүртгэгдэж 5 хүн нас барж, 4 хүн хүнд болон хөнгөн гэмтсэн гэж аймгийн Цагдаагийн газраас мэдээллээ. Осол гарах шалтгаан нөхцөл нь хамгаалах малгайгүй, согтуугаар тээврийн хэрэгсэл жолоодох, хурд хэтрүүлэх, бүрэн бус тээврийн хэрэгсэлтэй замын хөдөлгөөнд оролцох зэргээс үүдэлтэй байна. Амиа алдсан 5 иргэн хамгаалах малгай хэрэглээгүйгээс тархиндаа хүнд гэмтэл авч энэ нь амь насаараа хохирох шалтгаан болжээ. Иймд жолооч нар замын хөдөлгөөнд оролцохдоо дүрмээ баримтлан хамгаалах малгайг тогтмол хэрэглэж техникийн бүрэн бүтэн байдлыг хангаж байхыг Цагдаагийн газраас анхааруулж байна.