Оросын теннисчин Анастасиа Павлюченкова хасагдлаа

Талбайн теннисний эмэгтэйчүүдийн ганцаарчилсан төрлийн шөвгийн наймын тоглолтууд өнөөдөр болж Оросын итгэл найдвар Анастасиа Павлюченкова хасагдлаа.

Тэрээр шөвгийн наймд Швейцарын Белинда Бенчичтэй учраа тааран 0:6, 6:3, 3:6 харьцаагаар хожигдсон. Белинда Бенчич ингэснээр шөвгийн дөрөвт Казахстаны Элена Рибакинатай тоглохоор болов.

Мөн нөгөө талд Японы залуу од Наоми Осакаг ялсан Чехийн Маркета Вондрусова Испанийн Паула Бадосаг хожин шөвгийн дөрөвт шалгарлаа. Паула Бадосагийн бэртэл сэдэрч хоёрдугаар сетээс тэмцээнийг дуусгасан юм.

Ингэснээр шөвгийн дөрөвт Маркета Вондрусова Украины Элина Свитолинатай тоглохоор болсон. Уг төрөлд өрсөлдсөн Чехийн Каролина Плишкова, Барбора Кречикова гэсэн шилдэг тамирчид тэмцээнээс хасагдсан.

Талбайн теннисний эмэгтэйчүүдийн ганцаарчилсан төрлийн шөвгийн дөрөв:

• Белинда Бенчич (Швейцар) – Элена Рибакина (Казахстан)
• Маркета Вондрусова (Чех) – Элина Свитолина (Украин)

Медалийн тоглолтууд маргааш үргэлжилнэ.