“Өглөөний гудамж”-ны үйл ажиллагаа хэрхэн явагдаж буйг сурвалжлахаар тус гудамжийг зорилоо.
Монголын Үндэсний Музейн замын эсрэг талд өнгө өнгө алаглаж, нүдэнд тод тусахаар будсан дөрвөн давхар байшин харагдана. Энэ бол “Гутлын 22” гудамж юм.
Иргэдийн чөлөөт цагийг зөв боловсон өнгөрүүлэх, эртэч Улаанбаатарчууд болгохын тулд “Өглөөний гудамж”-ны тохижилтын ажил энэ долдугаар сарын эхээр эхлээд байсан билээ. Засварын ажил дуусаагүй байгаа бололтой кранаар байшингийн гадна талыг янзалж байв. Тэнд “Book art” кафе, “Caffe bene”, “Yuna ресторан”, “Pizza hut”, “Schwarzkopf” салон, “Urgoo” hotel, “Urgoo art” ресторан зэрэг газрууд үйл ажиллагаа явуулах бөгөөд хүний хөл бага байлаа.
Тус гудамжинд байрлах “Book art” кафены менежерээс тодруулахад тэрээр
“Өглөөний гудамж” хараахан нээлтээ хийгээгүй байна. Нээлтээ хийсэн гэсэн сургаар өнөө өглөө хэд хэдэн сэтгүүлчид зорьж ирлээ. Засварын ажил ч дуусаагүй байна. Засварын ажил уг нь долдугаар сарын эхээр эхэлсэн. Яг хэзээ дуусаж өглөө 06:00 цагаас ажиллаж эхлэх талаар мэдээлэл ажилчдад өгөөгүй байна” гэв.
Мөн тус кафе өглөөний 07:00 цагаас оройн 22:00 хүртэл ажилладаг бол бусад байгууллагууд бүгд өөр өөрийн цагийн хуваарьтай ба 09:00-21:00 хүртэл, 08:00-21:00 хүртэл ажиллаж байна.
Н.ЦОГЗОЛМАА