Дөрвөн жилийн өмнө ерөнхийлөгчөөр сонгогдсон Жовенель Моизийг гэрт нь хөнөөжээ. Уг хэрэг долдугаар сарын 7-нд шилжих шөнө гарсан байна. Үл таних этгээдүүд төрийн тэргүүний өргөөнд нэвтрэн орж, хэдэнтээ гал нээжээ. Ж.Моиз газар дээрээ амиа алдсан бол гэргий нь суманд оногдсон ч амь наснаас нь холуур аж. Түүнийг эмнэлэгт хүргэсэн байна. Халдлагын дараа Гаитийн ерөнхий сайд удирдлагыг гартаа авч, хэргийн эздийг тодруулж, хатуу шийтгэхээ амлав. Жовенель Моиз нь 2017 онд болсон ерөнхийлөгчийн сонгуульд 55.7 хувийн саналаар ялалт байгуулж байжээ. Тэрбээр хэд хэдэн компанийг үүсгэн байгуулагч юм. Тухайлбал, эрчим хүчний болон хөдөө аж ахуйн салбаруудад өөрийн эзэмшлийн компанитай аж.
Д.ЦЭРЭНДОЛГОР