Португалийн шигшээ багийн од Криштиану Роналду Евро-2020 тэмцээний хэсгийн тоглолтуудын нэг болох Унгарын багийн эсрэг тоглож эхлэхийнхээ өмнө уламжлалт хэвлэлийн бага хуралд оролцсон.
Тэр сэтгүүлчдийн өмнө гарч ирэхдээ ширээн дээр байсан Кока колаг зайлуулж ус тавиад хийжүүлсэн чихэрлэг ус аюултай гэж хэлсэн нь үнэн. Яалт ч үгүй үнэн агаад хүүхдүүддээ ийм ундаа хэрэглүүлж хэвшүүлэхгүй байх нь зөв. Харин маргаашаас нь эхлээд дэлхийн хэвлэлүүд Роналдугийн үйлдэл Coca cola компанид дөрвөн тэрбум ам долларын алдагдал авчирлаа гээд бичээд эхэлсэн. Энэ тухай санхүүгийн нэгэн сэтгүүлд ингэж тайлбарлажээ.
Роналдугийн ярилцлага мягмар гаригт өрнөсөн бол Coca-Cola компанийн хувьд өмнөх өдөр нь хувьцааны ашгаа тараах өдөр байсан. Coca-Cola компани хувьцаат компани гэдэг утгаараа жилийн дөрвөн улиралд дөрвөн удаа хувьцаа эзэмшигчиддээ ашгаасаа хүртээдэг аж. Ийм үед ногдол ашиг буюу нэг дивидент(0.42 доллар)-ийн хэмжээгээр ханш нь унадаг юм байна. Гэхдээ үүнээс бага зэрэг их эсвэл арай доод төвшинд ч унах тохиолдол байдаг нь хувьцааг ихээр эзэмшдэг хүмүүсийн тоглолтоос шалтгаалдаг ажээ.
Даваа гаригт хөрөнгийн бирж нээгдэх үед Coca-Cola компанийн нэгж хувьцаа 55.9 доллар байсан бол хаагдах үед 55.36 болон хямдарсан байна. Өөрөөр хэлбэл дөрвөн тэрбум ам доллараар багассан. Харин Роналдугийн ярилцлага үүнээс хойш хоногийн дараа өрнөжээ. Coca-Cola компанийн хувьцааны ногдол ашгаа тараах үйлдлээс хамааран хувьцаа нь унадаг тохиолдол байдаг л нэг үзэгдэл гэсэн агаад ихэнхдээ дөрөв, таван хоногийн дараа буцаад хэвэндээ ордог. Роналдугийн ярилцлага үнэхээр нөлөөлсөн юм бол яагаад ганц хоногийн дараа нэгж хувьцаа 55.46 болон өссөн бэ гэдгийг тайлбарлах ёстой юм. Бас хоёр хоногийн дараа нь Францын шигшээ багийн тоглогч Погба бас л хэвлэлийн бага хурлын үеэр ширээн дээр Heineken шар айргийг зайлуулж лалын шашинд согтууруулах ундаа хориглодог гэх тайлбар тавьсны дараа Heineken-ий хувьцаа огт доргиогүй өнгөрсний санах хэрэгтэй.
Б.Хулан