Хилийн цэргийн 0166 дугаар анги Цэргийн гавьяаны одонгоор шагнууллаа

Монгол Улсынхаа баруун өмнөд хилийн хэсгийг 88 жилийн турш хамгаалж, эх орон төр засаг, ард түмнийхээ өмнө хүлээсэн үүрэг, өргөсөн тангарагтаа үнэнчээр зүтгэж ирсэн үе үеийн хилчдийн эр зориг, хүч хөдөлмөр, түүхэн замналыг ийнхүү төр засгаас өндрөөр үнэлж, Монгол Улсын Ерөнхийлөгчийн зарлигаар Цэргийн гавьяаны одонгоор шагнасан байна.Одон хүлээж авах ёслол энэ сарын 17-ны өдөр тус отрядад боллоо. Ёслолын ажиллагаанд Өмнөговь аймгийн Засаг дарга, Хил хамгаалалтад туслах хүчний зөвлөлийн дарга Р. Сэддорж, Ерөнхийлөгчийн Тамгын газрын төрийн цэргийн байгуулалт хариуцсан ахлах референт бригадын генерал Ч.Сайнтөр, Гурвантэс сумын Засаг дарга Г.Гангамаа, ангийн ахмад хилчдийн төлөөлөл, харилцан ажиллагаатай хилийн хяналтын байгууллагын удирдлагууд оролцжээ.

Цэргийн гавьяаны одонг ангийн оройн дээд сүлд, байлдааны аранзал улаан туганд бригадын генерал Ч.Сайнтөр зүүж, батламжийг Хилийн цэргийн 0166-р ангийн захирагч дэд хурандаа Л.Амарсанаад гардууллаа. Энэ үеэр аймгийн Засаг дарга, ХХТХЗ-ийн дарга Р.Сэддорж ангийн бие бүрэлдэхүүнд баяр хүргэж хэлсэн үгэндээ Өмнөговь аймгийг 2021 онд хөгжүүлэх жилийн төлөвлөгөөний хүрээнд Хил хамгаалах салбарт 1,742.0 /нэг тэрбум долоон зуун дөчин хоёр сая/ төгрөгийн хөрөнгө оруулалтын ажлыг хийхээр төлөвлөсөн гэдгийг онцоллоо.