Энэ онд дэлхийн эдийн засаг 5.6 хувиар өсөх төлөвтэй байна. Харин эдийн засгийн тогтвортой сэргэлтийн гол түлхүүр нь дэлхийн хэмжээнд коронавирусийн эсрэг вакциныг эрчтэй, үр дүнтэйгээр хувиарлах явдал гэж Эдийн засгийн хамтын ажиллагаа, хөгжлийн байгууллагын шинэ тайлан илтгэлд тэмдэглэжээ.
Тус байгууллагын мэргэжилтнүүдийн урьдчилан тооцоолсноор энэ оны дундуур дэлхийн аж үйлдвэрлэлийн хэмжээ коронавирусний цар тахлын өмнөх түвшинд хүрэхээр байна. Харин 2022 онд дэлхийн эдийн засаг 4 хувьтай өснө гэж таамагласан байна. Хэрэв вакцины үйлдвэрлэл хурдасвал дэлхий даяар “Ковид 19”-ийн шинэ мутацид орсон хувилбар тархахаас өмнө хувиарлалт түгээлт нь жигдэрч цар тахлаас урьдчилан сэргийлэх хорио цээрийн дэглэмүүдийг тэр хэрээр хурдан сулруулах боломж бүрдэнэ гэж тооцоолжээ.
Мөн Эдийн засгийн хамтын ажиллагаа, хөгжлийн байгууллагын Ерөнхий эдийн засагч Лоуренс Бун “Засгийн газрууд юуны түрүүнд вакцины үйлдвэрлэл, хувиарлалт түгээлтээ хурдасгаж хүн амаа шуурхай дархлаажуулалтад хамруулах хэрэгтэй байна. Энэ нь эдийн засгийг сэргээх хүчин чармайлтыг идэвхжүүлэхэд чухал. Шуурхай, бүгдийг вакцинд хамруулах нь хямралаас гарах гарц. Улс орнууд вакцинжуулалтын хөтөлбөрийнхөө явцыг түргэсгэж эдийн засгаа нээх хэрэгтэй байна. Бид вирустай дайтаж байгаа л юм бол дайны байдалд шилжиж үйлдвэрлэлээ эрс нэмэгдүүлэх хэрэгтэй байна. Энэ нь холбогдох зөвшөөрлийг нь шуурхай, олноор өгөх, технологио харилцан илүү солилцох хэрэгтэй гэсэн үг. Мөн дархлаажуулалтын төвүүдээ 7 хоногийн 7 өдөр ажиллуул гэсэн үг. Вирусний халдвар тархаж байгаа цагт, шинээр мутацид орж байгаа үед бид хилээ хаахаас өөр аргагүй. Энэ л эдийн засгийн идэвхжил, үнэнд сөргөөр нөлөөлж, бүх салбар дахь үйл ажиллагааг доголдуулж байна.” хэмээн мэдэгдсэн байна.
Тайлан илтгэлд мөн санхүүгийн дэмжлэг үзүүлэх арга хэмжээнүүдийг улс орнуудын засгийн газрын зүгээс хэрэгжүүлж байгаа нь эдийн засгий идэвхжлийг сэргээхэд хүчтэй түлхэц өгч байна гэж дүгнэсэн байна. Үүний хамтаар цар тахал эдийн засгийн төрөл бүрийн субьект, салбаруудын ялгааг улам нэмэгдүүлж нийгмийн эмзэг давхаргынханд хүчтэй нөлөөлөн тэгш бус байдал газар авахад хүргэж байгаа нь урт хугацаандаа хөдөлмөрийн зах зээл дээрхи олон хүний ирээдүйг үгүй хийж, амьдралын чанарт нь сөргөөр нөлөөлөхийг тэмдэглэсэн байна.