Гудамжны тэнэмэл нохойг бар шиг харагдахаар болгож будсан этгээдийг Малайзын цагдаагийн газар хайж байгаа юм байна. Энэ хэрэг өнгөрсөн оны наймдугаар сард Малайзад болжээ. Наймдугаар сарын 28-нд уг нохойны зургийг Малайзын амьтан хамгаалах нийгэмлэгийнхэн нийтийн сүлжээнд байршуулж “Нохойг гутаан доромжилсон этгээдийг хайж байна.Энэ нохойны одоо хаана байгаа байршлыг хэлж өгнө үү” гээд холбоо барих утсаа тавьжээ.
Уг зарыг олон мянган хүн шэйрлэж, зарим иргэдээс “Бар шиг будсан энэ нохойноос хүүхэд, согтуу хүн айгаад байна” гэсэн гомдол ирсэн учир цагдаагийн газар нохойг болон нохойг будсан этгээдийг хайж байгаагаа мэдэгджээ. Нохойг угаагаад ч арилахааргүй хортой улбар шар будгаар будаж, хар будгаар судал тавьжээ.
Хэн, хэзээ энэ хэргийг хийсэн нь тодорхойгүй байгаа юм. Тийм учраас цагдаагийн байгууллага “Мэдээлэл өгсөн хүнд мөнгөн шагнал олгож, мэдээллийг чанд хадгална” гэжээ. Амьтан хамгаалагчид “Энэ бол инээдэм биш. Эмгэнэл. Амьтныг ямар ч хэлбэрээр тамлаж, зовоож, доромжилж болохгүй”, “Энэ нохойг усанд оруулж, будгийг нь арилгахын тулд химийн хүчтэй бодисоор арчих хэрэгтэй болно.
Эсвэл бүх үсийг нь хусна. Магадгүй хортой будагнаас болж арьс нь гэмтэж болзошгүй”, “Уучлаарай нохой минь, чамд ийм зүйл хийсэн этгээдийг олох болно оо”, “Нохойг будсан хүнд инээдтэй харагдаж болно.
Гэтэл
энэ чинь чиний нүүр рүү, бие рүү хэн нэгэн арилахгүй хортой будаг цацсан ижил үйлдэл” гэх мэтээр уур бухимдлаа илэрхийлцгээжээ.
Орон нутгийн телевизээр “Энэ бол нохойг бар шиг болгож будсан анхны тохиолдол биш. 
Өнгөрсөн жил Шивамоггагийн нэгэн фермерийнх нохойгоо бар шиг харагдуулахаар будсан байсан. Манай телевиз очиж сурвалжлага хийхэд бар мэт эрээн болгосон нохой нь байсан. Учрыг нь лавлахад тариалангийн талбайгаа сармагчнаас хамгаалах гэж нохойгоо будсан тухай тайлбарлаж байсан” хэмээн мэдээлжээ.
