ЭМЯ-ны өнөөдрийн хэвлэлийн хурлын үеэр ГХЯ-ны Консулын газрын дарга Л.Мөнхтүшиг “УОК, Монгол Улсын Шадар сайдаас өгсөн чиглэлийн дагуу хоёрдугаар сард гадаадаас нутаг буцах хүсэлтэй иргэдийг татан авах дөрвөн удаагийн нислэгийг урьдчилсан байдлаар батлаад байна.
Эдгээр нислэгээр нийтдээ 840 орчим иргэнийг татан авна.
Урьдчилсан байдлаар Сөүл, Токиогийн чиглэлд нэмэлт хоёр нислэг хийхээр төлөвлөж байна.
БНСУ-аас арваннэгдүгээр сард товлогдсон байсан нислэгийн иргэд болон эрүүл мэндийн шалтгаантай иргэдийг түлхүү авна. Япон улсаас нутаг буцахаар өргөдөл гаргасан иргэдийг эрэмбээр нь таван үндсэн шалгуурыг харгалзан үзэн татан авна. Турк улсаас нутаг буцах хүсэлтэй иргэд цөөнгүй байгаа. Мөн Туркээр дамжин Европын холбооны улсаас нутаг буцах хүсэлтэй байгаа цөөн тооны иргэнийг авахаар төлөвлөж байгаа.
Мөн эдгээр нислэгээр гадаад руу зорчих хүсэлтэй иргэд байгаа” гэв.
Нэгдүгээр сарын 27-ны өдрийн байдлаар 8625 иргэн нутаг буцах хүсэлт гаргаад байгаа аж.
